Dilongi ya Luvunu 2: Bantu ya Mbi Kenyokwamaka na Bilungi

Inki kele kisina ya dilongi ya luvunu? “Na bafilozofe yonso ya Grese, Platon muntu kuvandaka ti bupusi ya nene mpenza na bangindu ya ntama ya metala Bilungi.”​—Histoire des enfers (Disolo ya Bilungi), ya Georges Minois, lutiti 50.

“Banda na katikati ya mvu-nkama ya zole T.B. Bakristu yina vandaka kulonguka mwa filozofi ya Grese yantikaka kuwa nsatu ya kutubila lukwikilu na bo na kusadilaka bangogo na yo . . . Filozofi ya bo vandaka kusepela na yo mingi vandaka ya Platon [malongi ya Platon].”​—The New Encyclopædia Britannica (1988), Volime 25, lutiti 890.

“Malongi ya Dibundu kendimisa nde bilungi kele, mpi nde yo tavandaka mvula na mvula. Bantu yina kefwaka ti masumu yina kenataka lufwa, myoyo na bo kekulumukaka na bilungi mbala mosi na nima ya lufwa, kisika bo kemonaka mpasi na ndola ya bilungi, ‘tiya ya mvula na mvula.’ Ndola ya ntetentete ya bilungi kele kukabwana ya kimakulu ti Nzambi.”​—Catéchisme de l’Église Catholique (1992), ndambu ya I, kitini ya II, disolo ya 12, IV, ¶1035.

Biblia ketuba inki? “Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve. . . Sambu na [Sheole, NW] kisika ya nge ke kwenda, kisalu kele ve, ngindu kele ve, mayele mpi kele ve.”​—Longi 9:5, 10.

Bambalula yankaka ya Biblia kebalulaka ngogo ya Kiebreo Sheole, yina ketubila “nsi ya bafwa,” nde “bilungi.” Baverse yai kemonisa nki na yina metala nkadilu ya bafwa? Keti bo kenyokwamaka na Sheole sambu na kubaka ndolula ya masumu na bo? Ve, sambu bo ‘mezaba kima ve.’ Yo yina, ntangu yandi vandaka kunyokwama mingi na maladi ya ngolo, mfumu ya kikanda Yobi kubondilaka Nzambi nde: “Bumba mono na nsi ya bafwa [Kiebreo, Sheole].” (Yobi 14:13) Inki ntendula lombilu na yandi zolaka kuvanda na yo kana Sheole kuvandaka kisika mosi ya minyoku ya mvula na mvula? Na Biblia, bilungi ketendula kaka mazyamu ya bantu yonso, kisika ata kisalu mosi ve kesalamaka.

Keti ntendula yai ya bilungi kele ve ntendula ya mbote mpenza mpi yina kewakana ti Masonuku? Inki dyambu ya nku mpi ya mbi mingi, lendaka kupusa Nzambi ya zola na kunyokula muntu kukonda nsuka? (1 Yoane 4:8) Kansi kana bilungi ya tiya kele dilongi ya luvunu, inki beto lenda tuba na yina metala zulu?

Fwanisa baverse yai ya Biblia: Nkunga 146:3, 4; Bisalu 2:25-27; Roma 6:7, 23

DYAMBU YA KYELEKA:

Nzambi kepesaka ve bantu ndola na bilungi

[Kifwanisu ya kele na lutiti 5]

[Bangogo ya kemonisa kisina ya foto ya kele na lutiti 5]

Barrators​—Giampolo/​The Doré Illustrations For Dante’s Divine Comedy/Dover Publications Inc.