Bampasi ya Kele na Nsi-Ntoto ya Mvimba Tamana Yonso

BAMPASI kemonana bisika yonso, mpi mawa kepusaka bantu mingi na kusala mambu sambu na kusadisa bayina kemona mpasi. Mu mbandu, baminganga kesalaka bature mingi na lupitalu sambu na kusadisa bantu yina kebela to melwala. Bantu ya kesalaka kisalu ya kufwa tiya, bapolisi, bantu ya kesalaka bansiku, mpi bantu ya mebakaka formasio sambu na kugulusa bantu na kigonsa kesalaka kikesa sambu na kulembika bampasi ya bankaka to kukanga nzila na bampasi yango. Bikesa yai ya bantu kesalaka kesadisaka bantu fyoti mpamba, kansi yo kele mpasi sambu muntu to organizasio mosi buna kumanisa bampasi na ntoto ya mvimba. Ata mpidina, Nzambi lenda manisa bampasi na nsi-ntoto ya mvimba mpi yandi tasala yo.

Mukanda ya nsuka ya Biblia kepesa kivuvu yai: “[Nzambi] ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” (Kusonga 21:4) Bika beto tadila kiteso ya nene ya lusilu yai. Yo ketubila na bunkufi lukanu ya Nzambi ya kumanisa bampasi yonso. Yandi tasala yo ntangu yandi takatula bamvita, nzala, maladi, mpi kukonda lunungu na ntoto, kumosi ti bantu yonso ya mbi. Ata muntu mosi ve lenda sala mambu yai.

 Mambu Yina Kimfumu ya Nzambi Tasala

Nzambi talungisa balusilu na yandi na nzila ya muntu ya zole ya kuluta ngolo na luyalanganu, disongidila Yezu Kristu yina kufutumukaka. Ntangu kekwisa yina Yezu tayala ntoto ya mvimba bonso Ntotila, kukonda ata mbeni mosi. Bantotila, baprezida, to bantu ya politiki tayala dyaka ve bantu. Kansi, Ntotila mpi guvernema mosi kaka, disongidila Kimfumu ya Nzambi, tayala bo.

Kimfumu yina takatula kimakulu baguvernema yonso ya bantu. Banda ntama, Biblia kutubaka na ntwala nde: “Na bilumbu ya bantotila yina, Nzambi ya zulu tatula kimfumu mosi yina bo tabedisa ve. Mpi kimfumu yango taluta ve na maboko ya bantu yankaka. Yo tafwa mpi tasukisa bimfumu yai yonso, mpi yo tayala mvula na mvula.” (Daniele 2:44, NW) Bantu ya ntoto ya mvimba tavanda na bumosi na nsi ya guvernema mosi ya lunungu​—Kimfumu ya Nzambi.

Ntangu yandi vandaka na ntoto bonso muntu, Yezu kutubilaka Kimfumu yina mbala mingi. Yandi tubilaka yo na kisambu ya mbandu, mpi kulongaka balongoki na yandi na kusamba mutindu yai: “Kimfumu na nge kwisa, luzolo na nge kusalama awa na ntoto bonso na zulu.” (Matayo 6:10) Simba nde Yezu kumonisaka nde kele ti kuwakana na kati ya Kimfumu ya Nzambi ti kusalama ya luzolo na yandi na ntoto, mpi luzolo ya Nzambi kele ya kumanisa bampasi na ntoto ya mvimba.

Guvernema ya lunungu ya Nzambi tanata balusakumunu yina ata guvernema mosi lenda nata ve. Yibuka nde Yehowa kupesaka Mwana na yandi bonso nkudulu sambu bantu kubaka luzingu ya mvula na mvula. Na nsi ya luyalu ya mbote ya Kimfumu, bantu takuma malembe-malembe bantu ya kukuka. Inki tasalama na nima? Yehowa “ta sukisa lufwa kimakulu! Yandi ta katula mansanga na meso ya bantu yonso.”​—Yezaya 25:8.

Bantu yankaka lenda kudiyula nde: ‘Sambu na nki Nzambi mesalaka ve kima banda ntama? Inki yandi kevingila?’ Yehowa lendaka kusala kima banda ntama sambu na kumanisa bampasi yonso to nkutu kukanga nzila na bampasi yango. Kansi, yandi mepesaka nzila nde bampasi kulanda na kuvanda, sambu na bikuma ya bwimi ve, kansi sambu na mambote ya mvula na mvula ya bana na yandi na ntoto. Bibuti ya zola tapesa nzila nde mwana na bo kumona mpasi kana bo zaba nde yo tanata mambote ya ntangu mingi. Mutindu mosi, Yehowa kele ti bikuma ya mbote yina mepusaka yandi na kupesa nzila nde bantu kumona mpasi sambu na mwa ntangu, mpi Biblia metendulaka bikuma yina. Bikuma yango ketadila mambu bonso kimpwanza ya kupona, masumu, mpi ntembe ya metadila nswa ya Yehowa ya kuyala. Biblia ketendula mpi nde, Nzambi mepesaka nzila nde kigangwa mosi ya mbi ya mpeve kuyala nsi-ntoto sambu na mwa ntangu fyoti. *

Ata beto lenda tendula ve bikuma yango yonso awa, kele ti mambu zole yina lenda pesa beto kivuvu mpi kikesa. Ya ntete yo yai: Yehowa tapesa beto balusakumunu mingi kuluta bampasi yonso yina beto mekutanaka na yo. Dyaka, Nzambi kendimisa beto nde: “Makambu ya ntama bantu ta yindula yo diaka ve, yo ta kwisila bo mpi ve na mabanza.” (Yezaya 65:17) Ata Nzambi mepesaka nzila na mambi sambu na mwa ntangu fyoti, Yandi takatula kimakulu bampasi yina mambi yango menataka.

Dyambu ya zole yo yai: Nzambi metulaka ntangu mosi, yina yandi tasoba ve, sambu na kumanisa bampasi. Yibuka nde profete Habakuki kuyulaka tii nki ntangu Yehowa zolaka kupesa nzila na mambu ya nku mpi kuswana. Yehowa kupesaka mvutu nde: ‘Mbona-meso kele sambu na ntangu ya metulamaka . . . Yo tabwa ve na nima ya ntangu.’ (Habakuki 2:3, NW) Mutindu beto tamona yo na disolo yina kelanda, ‘ntangu yina ya metulamaka’ mefinama.

[Noti na Nsi ya Lutiti]

 [Lupangu ya kele na lutiti 7]

Baverse Yina Ketubilaka Makwisa ya Kitoko

BITUMBA TAVANDA DYAKA VE:

“Beno kwisa beno tala mambu ya Mfumu Nzambi me sala. Beno kwisa kutala mambu ya kuyituka ya yandi me sala awa na nsi-ntoto. Yandi ke sukisaka bitumba na nsi-ntoto yonso.”​—Nkunga 46:9, 10.

BANTU YA BETO KEZOLAKA TAVUTUKA DYAKA:

“Bantu ya mbote ti bantu ya [kukonda lunungu, NW] ta telama na lufwa.”​—Bisalu 24:15.

MADYA SAMBU NA BANTU YONSO:

‘Ntoto tafuluka na ble mingi, bangumba tafuluka na bima ya bilanga.’​—Nkunga 72:16.

MALADI TAVANDA DYAKA VE:

“Ata muntu mosi ve . . . ta tuba diaka nde: ‘Mono ke bela.’”​—Yezaya 33:24.

BANTU YA MBI TAVANDA DYAKA VE:

“Bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.”​—Bingana 2:22.

LUNUNGU TAVANDA NA NTOTO YA MVIMBA:

“Kilumbu kele ya ntotila mosi [Kristu Yezu] ta telama yina ta yalaka bantu na [lunungu, NW], bantu na yandi mpi ta sambisaka bantu na nzila ya mbote.”​—Yezaya 32:1.

[Bifwanisu ya kele na lutiti 7]

Kimfumu ya Nzambi takatula bampasi yonso yina beto lenda kutana na yo