“Ntangu ya Metulamaka” Mefinama
“Ntangu ya Metulamaka” Mefinama
BONSO profete Habakuki, balongoki ya Yezu kuvandaka ti mpusa ya ngolo ya kumona nsuka ya bampasi. Na nima ya kubakisa mambu yina Kimfumu ya Nzambi zolaka kusala sambu na kusungika mambu na ntoto, bo yulaka Yezu nde: “Inki ntangu mambu yai yonso tabwa, mpi nki tavanda kidimbu ya kuvanda na nge [na kiyeka ya Kimfumu] mpi ya kemonisa nde ngidika ya bima kekwenda na nsuka?” (Matayo 24:3, NW) Na mvutu yina yandi pesaka, Yezu kutubaka nde kaka Yehowa Nzambi muntu kuzabaka ntangu ya sikisiki yina Kimfumu zolaka kutwadisa mambu yonso ya ntoto. (Matayo 24:36; Marko 13:32) Kansi, Yezu ti bantu yankaka kutubilaka na ntwala mwa mambu ya zolaka kusalama na ntoto yina zolaka kumonisa nde ntangu yango mefinama.—Tala lupangu na diboko ya kitata.
Keti nge kendima ve nde mambu yai kesalama mingi bubu yai? Yezu kutubaka mpi nde kisalu mosi ya kulonga zolaka kusalama na ntoto ya mvimba. Yandi tubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”—Matayo 24:14.
Yai kele dyambu ya kesalama mpenza bubu yai. Bambangi ya Yehowa ke na kusala kisalu yango. Na bansi kiteso ya 236, Bambangi kuluta bamilio nsambwadi ke na kuzabisa bantu mambu yina Kimfumu tasala, mpi bo ke na kusadisa bo na kuwakanisa luzingu na bo ti mambu ya lunungu ya Nzambi kelombaka, Nzambi yina kele ti luzolo ya kumanisa bampasi. Landa na kulonguka mambu ya metala Kimfumu ya Nzambi, mpi nge tavanda ti kivuvu ya kuzinga kimakulu na ntoto mosi ya kukonda mpasi.
[Lupangu ya kele na lutiti 8]
Baverse Yina Ketubilaka Bilumbu ya Nsuka
• Bamvita ya mesalamaka ntete ve
• Kunikana ya ngolo ya ntoto
• Banzala
• Bamaladi ya mbi
• Mambu ya mbi kekuma mingi
• Zola takuma madidi
• Bantu kebebisa ntoto
• Zola ya ngolo mpenza ya mbongo
• Kukonda bulemfu na bibuti
• Kudizola ya kuluta ndilu
• Kukonda zola ya bampangi
• Bantu kezinga kaka na kimbeni
• Bantu ya mitindu yonso kekonda kudiyala
• Kukonda kuzola bumbote kekuma mingi
• Zola ya byese kuluta zola sambu na Nzambi
• Bantu mingi ya luvunu ketuba nde bo kele Bakristu
• Baprofete mingi ya luvunu
• Minyoku ya Bakristu ya kyeleka
• Bantu ketula ve dikebi na balukebisu ya Biblia
[Kifwanisu ya kele na lutiti 8]
Na ntoto ya mvimba, Bambangi ya Yehowa kelonga bankaka mambu ya metala Kimfumu ya Nzambi