Mambu Yina Yezu Kulongaka na Yina Metala Yandi Mosi

“Yezu kuzabaka mbote nani yandi vandaka, kisika yandi katukaka, sambu na inki yandi kwisaka na nsi-ntoto, mpi mambu yina makwisa vandaka kubumbila yandi.”​—NSONIKI HERBERT LOCKYER.

NA NTWALA ya kundima mpi kukwikila na mambu yina Yezu kulongaka, beto fwete zaba dyambu mosi ya metala yandi. Yezu kuvandaka mpenza nani? Yandi katukaka na wapi? Inki kuvandaka lukanu ya luzingu na yandi na ntoto? Na mutindu mosi buna, beto lenda wa bamvutu na munoko ya Yezu yandi mosi na Baevanzile​—Matayo, Marko, Luka, mpi Yoane.

Yandi zingaka na ntwala ya kubutuka na ntoto Kilumbu mosi Yezu kutubaka nde: ‘Ntangu Abrahami vandaka mebutuka ntete ve, mono vandaka.’ (Yoane 8:58) Abrahami kuzingaka bamvula kiteso ya 2 000 na ntwala ya lubutuku ya Yezu. Ya kyeleka, Yezu kuzingaka nkutu na ntwala nde tata ya mabuta yina ya kwikama kuzinga. Kansi, inki kisika Yezu vandaka kuzinga? Yandi tendulaka nde: “Mono katukaka na zulu.”​—Yoane 6:38.

Mwana ya Nzambi Yehowa kele ti bana mingi ya bawanzyo. Kansi, Yezu kele ya kuswaswana. Yandi kudibingaka nde ‘Mwana mosi kaka ya kubutukaka ya Nzambi.’ (Yoane 3:18) Bangogo yai ketendula nde Yezu kele kigangwa mosi mpamba yina Nzambi kugangaka yandi mosi. Nzambi kugangaka bima yonso yankaka na nzila ya Mwana mosi kaka ya kubutukaka.​—Kolosai 1:16.

“Mwana-muntu” Mbala mingi Yezu kusadilaka bangogo yai kuluta bangogo yonso yankaka sambu na kuditubila. (Matayo 8:20) Na mutindu yina yandi monisaka nde yandi vandaka ve wanzyo yina kulwataka nitu ya kinsuni. Kansi, yandi vandaka mpenza muntu. Na nsadisa ya mpeve santu na yandi, Nzambi kukatulaka luzingu ya Mwana na yandi na zulu mpi kunataka yo na ntoto, yandi salaka nde luzingu ya Yezu kuyela na divumu ya mwense Maria. Nsukansuka, Yezu kubutukaka bonso muntu ya kukuka, ya kukonda masumu.​—Matayo 1:18; Luka 1:35; Yoane 8:46.

Mesia ya lusilu Nkento mosi ya Samaria kuzabisaka Yezu nde: “Mono zaba nde Mesia, yandi ta kwisa.” Yezu kuvutulaka nde: “Mono yai ke solula ti nge, mono kele Mesia yango.” (Yoane 4:25, 26) Ngogo “Mesia,” bonso ngogo “Kristu,” ketendula “Mupakulami.” Nzambi kupakulaka to kuponaka Yezu sambu na kulungisa mukumba mosi ya sipesiali na kulungana ya balusilu na yandi.

Kisalu na yandi ya ntetentete Kilumbu mosi Yezu kutubaka nde: “Mono fweti zabisa nsangu ya mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.” (Luka 4:43) Ata yandi salaka mambu mingi ya mbote sambu na bansukami, lukanu na yandi ya ntete na luzingu kuvandaka ya kusamuna Kimfumu ya Nzambi. Beto tatubila na nima mambu yina yandi longaka na yina metala Kimfumu yango.

Yo kele pwelele nde, Yezu kuvandaka ve muntu bonso bantu yonso. * Mutindu beto tamona yo, luzingu yina yandi vandaka na yo na zulu kuyikaka ntendula na mambu yina yandi tubaka ntangu yandi vandaka na ntoto. Yo keyitukisa ve na kumona nde yandi samunaka nsangu mosi yina zolaka kuvanda na bupusi na luzingu ya bamilio ya bantu na nsi-ntoto ya mvimba!

[Noti na Nsi ya Lutiti]