Sambu na Nki Makwela Kefwaka?

“Bafarize ya nkaka kwisaka kumeka Yesu nde: ‘Keti Bansiku na beto ke pesaka muntu nswa na kubikisa nkento na yandi na konso mambu ya mbi ya yandi me sala?’”​—Matayo 19:3.

BANTU yankaka yina vandaka kuzinga na bilumbu ya Yezu, kuyulaka yandi kana makwela lenda zinga mingi to ve. Yezu kusongaka bo nde: “Keti beno me tangaka ve mambu yai na Mukanda ya Nzambi? ‘Na luyantiku, ntangu Nzambi salaka bantu, yandi salaka bo bakala ti nkento. Ebuna Nzambi tubaka nde: Yo yina, bakala ta bikisa tata na yandi ti mama na yandi, yandi ta kwenda kuvukana na nkento na yandi. Ebuna bo zole ta kuma muntu mosi.’ Mpidina bo kele diaka bantu zole ve kansi kaka muntu mosi mpamba. Yo yina, muntu lenda kabula ve yina ya Nzambi me vukisaka.” * (Matayo 19:4-6) Ntembe kele ve nde, lukanu ya Nzambi sambu na makwela kuvandaka nde yo zinga mingi.

Na bansi mingi bubu yai, kiteso ya makwela 40 na kati ya nkama to kuluta ‘ke na kukabwana,’ disongidila kesuka na kufwa. Keti ndongisila yina Biblia kepesaka na yina metala makwela memanaka ngala? Keti yo lenda vanda nde makwela kenunga ve sambu ngidika na yo kele ya mbi?

Tadila mbandu yai: Bankwelani zole me sumba bakaminio ya mutindu mosi. Bankwelani ya ntete ketanina kaminio na bo mbote-mbote mpi ketambusa yo na dikebi yonso. Kaminio na bo mebeba ve. Kansi, bankwelani yina yankaka kebaka ve ntangu to kesala ve bikesa sambu na kutanina kaminio na bo, mpi bo ketambusa yo na mutindu mosi ya mbi. Kaminio na bo mefwa mpi bo meyambula yo. Na yina metala kaminio yai ya mefwa ya bankwelani yai ya zole, foti kele na nki​—na kaminio to na bankwa na yo? Yo kemonana pwelele nde, foti ya nene kele na bankwa kaminio.

Kiteso mosi, sambu makwela mingi kenungaka ve yo ketendula ve nde ngidika ya makwela kele mbi. Makwela mingi yina menungaka memonisaka nde ngidika ya makwela kele mbote. Makwela ya mutindu yina kenataka kyese mpi yo kesalaka nde bantu, mabuta, mpi babwala kuvanda ngolo. Kansi bonso kaminio, makwela kelombaka nde bo tanina yo mpi bo yidika yo mbala na mbala sambu yo zinga mingi.

Yo vanda makwela na beno mesala mwa bilumbu, to bamvula mingi, bandongisila ya Biblia na yina metala kutanina mpi kukumisa ngolo makwela kesadisaka mpenza. Tala bambandu yankaka na balutiti yina kelanda.

[Noti na Nsi ya Lutiti]