Beno Kuditambusa Bonso Bantu ya Kimfumu!

“Beno kuditambusa kaka na mutindu yina me fwana na nsangu ya mbote.”​—FILP. 1:27, NW.

INKI MVUTU NGE TAPESA?

Banani lenda vanda bantu ya Kimfumu?

Inki mutindu beto lenda longuka ndinga, disolo, mpi bansiku ya Kimfumu ya Nzambi?

Inki mutindu bantu ya Kimfumu kemonisaka nde bo kezolaka bansiku ya Nzambi?

1, 2. Sambu na nki ndongisila yina Polo pesaka dibundu ya Filipi vandaka ya mfunu mingi?

NTUMWA Polo syamisaka dibundu ya Filipi na “kuditambusa kaka na mutindu yina me fwana na nsangu ya mbote.” (Filp. 1:27, NW) Ngogo ya Kigreki yina Polo sadilaka na verse yai sambu na “kuditambusa” lenda tendula mpi ‘kuvanda ti bikalulu bonso yina muntu ya insi fwete vanda ti yo.’ Bangogo yai vandaka ya mfunu mingi sambu na dibundu ya Filipi. Sambu na nki? Sambu yo kemonana nde Filipi vandaka mosi ya bambanza yina Kintinu ya Roma pesaka bantu na yo nswa ya kukuma bantu ya insi ya Roma. Bantu ya Filipi mpi ya bambanza yankaka yina vandaka na nsi ya Kintinu ya Roma vandaka kudikumisa sambu dyambu yai mpi bansiku ya Roma vandaka kutanina bo.

² Bampangi ya dibundu ya Filipi vandaka ti kikuma ya mbote ya kudikumisa. Polo yibusaka bo nde sambu bo kele Bakristu ya kupakulama bo kele “basitwaye ya zulu.” (Filp. 3:20) Bo vandaka ve bantu ya insi mosi buna ya kele awa na nsi-ntoto, kansi bo vandaka bantu ya Kimfumu ya Nzambi. Sambu bo vandaka bantu ya Kimfumu, bo vandaka ti lutaninu mpi mambote ya mingi mpenza.​—Ef. 2:19-22.

3. (a) Banani kele ti dibaku ya kukuma bantu ya Kimfumu? (b) Inki beto tatadila na disolo yai?

³ Ndongisila ya Polo ya ‘kuvanda bantu ya insi’ vandaka kutadila ntete-ntete bayina tayala ti Kristu na zulu. (Filp. 3:20) Kansi, yo ketadila mpi bayina tazinga na ntoto na nsi ya Kimfumu ya Nzambi. Sambu na nki? Sambu Bakristu yonso yina kesadilaka Mfumu mosi, Yehowa, mpi bo fwete lemfukila bansiku ya mutindu mosi. (Ef. 4:4-6) Bubu yai, bantu kesala ngolo sambu na kukuma bantu ya insi yina kele ti kimvwama mingi. Yo yina, beto fwete baka na mbalu dibaku ya kuvanda bantu ya Kimfumu ya Nzambi! Sambu na kubakisa mpenza mfunu ya dibaku yina, bika beto fwanisa mwa mambu yina bo kelombaka sambu na kukuma muntu ya insi mosi buna ti mambu yina bo kelombaka sambu na kukuma muntu  ya Kimfumu ya Nzambi. Na nima, beto tatadila mambu tatu yina beto fwete sala sambu na kulanda kuvanda bantu ya Kimfumu ya Nzambi.

MAMBU YA NGE FWETE LUNGISA SAMBU NA KUKUMA MUNTU YA KIMFUMU

4. Ndinga ya kukonda mvindu kele nki, mpi nki mutindu beto “ketubaka” yo?

⁴ Kulonguka ndinga. Baluyalu yankaka kelombaka bantu yina kezola kukuma bantu ya insi na bo na kulonguka ndinga yina bantu mingi ketubaka na insi na bo. Ata na nima ya kukuma bantu ya insi, bantu yankaka kesalaka bamvula mingi sambu na kuzaba mbote-mbote ndinga yango. Bo lenda longuka mutindu ya kusonika mpi kutanga ndinga yango kansi bantangu yankaka yo kelombaka ntangu mingi sambu na kutuba yo mbote-mbote. Mutindu mosi, Kimfumu ya Nzambi kelombaka bantu yina kezola kukuma bantu na yo na kulonguka ndinga yina Biblia kebingaka “ndinga ya kukonda mvindu.” (Sof. 3:9, NW) Inki kele ndinga yango? Yo kele malongi ya kyeleka ya metala Nzambi mpi balukanu na yandi yina kele na Biblia. Beto “ketubaka” ndinga ya kukonda mvindu ntangu beto kelemfukilaka bansiku ya Nzambi. Bantu ya Kimfumu ya Nzambi lenda longuka nswalu malongi ya luyantiku ya Biblia mpi kubaka mbotika. Kansi ata na nima ya kubaka mbotika, bo fwete sala bikesa sambu na “kutuba” mbote-mbote ndinga ya kukonda mvindu. Na nki mutindu? Konso muntu na kati na beto fwete sala bikesa sambu na kusadila na luzingu na yandi mambu yina yandi kelonguka na Biblia.

5. Sambu na nki beto fwete longuka disolo ya organizasio ya Yehowa ya bilumbu na beto?

⁵ Kulonguka disolo ya insi. Muntu yina kezola kukuma muntu ya insi mosi buna, yandi fwete longuka disolo ya luyalu ya insi yango. Mutindu mosi, bantu yina kezola kukuma bantu ya Kimfumu fwete longuka mbote-mbote mambu yonso ya metala Kimfumu yango. Beto tadila mbandu ya bana ya Kore na Izraele ya ntama. Bo vandaka kusepela na mbanza Yeruzalemi, na kisika na yo ya lusambu mpi na kuta disolo ya mbanza yango. Bo vandaka kusepela na Yeruzalemi, kaka ve sambu bo tungaka yo na matadi ya nene, kansi bo vandaka kusepela na kima yina mbanza yango mpi kisika yina ya lusambu vandaka kumonisa. Yeruzalemi vandaka “mbanza ya Ntotila ya Nene, NW” Yehowa, sambu yo vandaka kisika ya nene ya lusambu ya bunkete. Bansiku ya Yehowa vandaka kulongama kuna. Yehowa vandaka kumonisa ntima mbote na yandi na bantu yina Ntotila ya Yeruzalemi vandaka kuyala. (Tanga Nkunga 48:2, 3, 10, 13, 14) Bonso bana ya Kore, keti nge mpi kezolaka kulonguka disolo ya organizasio ya Yehowa yina kele awa na ntoto mpi kuta disolo na yo? Kana nge kelonguka mambu ya metala organizasio ya Nzambi mpi mutindu yandi kesadisaka bansadi na yandi, nge tayantika kumona nde Kimfumu ya Nzambi kele dyambu ya kyeleka.  Mpusa na nge ya kusamuna nsangu ya mbote ya Kimfumu yango tayela.​—Yer. 9:24; Luka 4:43.

6. Sambu na nki yo mefwana nde Yehowa kulomba beto na kulonguka mpi kuzitisa bansiku ya Kimfumu?

⁶ Kulonguka bansiku. Baluyalu kelombaka bantu na bo na kulonguka bansiku ya insi mpi kuzitisa yo. Yo yina, yo mefwana nde Yehowa kulomba beto na kulonguka mpi kuzitisa bansiku yina yandi mepesaka bantu yonso ya Kimfumu ya Nzambi. (Yez. 2:3; Yoa. 15:10; 1 Yoa. 5:3) Mbala mingi bansiku ya bantu kevandaka ti bifu mpi bantangu yankaka yo kevanda ya kukonda lunungu. Kansi ‘bansiku ya Yehowa kele ya kukuka.’ (Nk. 19:8) Keti beto kesepelaka na bansiku ya Nzambi mpi ketangaka Ndinga na yandi konso kilumbu? (Nk. 1:1, 2) Beto tazaba bansiku ya Nzambi kaka kana beto kelonguka yo beto mosi. Ata muntu mosi ve lenda sala yo sambu na beto.

BANTU YA KIMFUMU KEZOLAKA BANSIKU YA NZAMBI

7. Sambu na nki bantu ya Kimfumu kezitisaka bansiku ya Nzambi?

⁷ Sambu na kulanda kuvanda bantu ya Kimfumu, beto fwete zaba bansiku ya Nzambi mpi kuzola yo. Bantu mingi ya insi ketubaka nde bo kendimaka bansiku ya insi na bo. Kansi, ntangu bo kemonaka nde nsiku mosi kele mbote ve mpi ata muntu mosi ve kemona bo, bo kefwaka nsiku yango. Mbala mingi bantu yina ‘kesepedisaka bantu.’ (Kol. 3:22, NW) Bantu ya Kimfumu kezitisaka bansiku ya Nzambi na luzingu na bo. Beto kesepelaka na kuzitisa bansiku ya Nzambi, ata muntu mosi ve kemona beto. Sambu na nki? Sambu beto kezolaka Yehowa, Mupesi-Bansiku.​—Yez. 33:22; tanga Luka 10:27.

8, 9. Inki mutindu nge lenda zaba kana nge kezolaka mpenza bansiku ya Nzambi?

⁸ Inki mutindu nge lenda zaba kana nge kezolaka mpenza bansiku ya Nzambi? Tadila mutindu nge kesalaka mambu kana bo mepesa nge ndongisila na mambu yina nge kemonaka nde yo ketadila kaka nge mosi mu mbandu, kulwata mpi kuyidika nitu. Mbala yankaka na ntwala ya kukuma muntu ya Kimfumu ya Nzambi, nge vandaka kuzola kulwata bilele ya kisakasaka to yina kemonisaka bitini yankaka ya nitu. Ntangu zola na nge sambu na Nzambi yelaka, nge kumaka kulwata na mutindu yina kepesaka yandi lukumu. (1 Tim. 2:9, 10; 1 Pie. 3:3, 4) Ziku, nge kemonaka nde ntangu yai nge mekumaka kulwata mbote. Kansi, nki nge tasala kana nkuluntu mosi kuzabisa nge nde kulwata na nge kebudisaka bampangi yankaka na dibundu dibaku? Keti nge tasosa kupesa bikuma, tawa makasi, to takuma ntu-ngolo? Nsiku mosi ya mfunu mingi ya Kimfumu ya Nzambi kele nde bantu yonso ya Kimfumu fwete landa mbandu ya Kristu. (1 Pie. 2:21) Na kutadila mbandu ya Yezu, ntumwa Polo sonikaka nde: ‘Konso muntu na kati na beto kupesa mpangi na yandi kiese . . . sambu na kupesa yandi kikesa. Sambu ata Kristo sosaka ve kudisepedisa.’ (Roma 15:2, 3) Sambu na kutanina ngemba na dibundu, Mukristu ya kuyela fwete vanda ya ti luzolo ya kundima bangindu ya bankaka kukonda kubudisa kansansa na bo dibaku.​—Roma 14:19-21.

⁹ Beto tadila dyaka mambu zole ya mfunu mingi: mutindu beto ketadilaka kuvukisa nitu mpi makwela. Bantu yina kele ntete ve bantu ya Kimfumu ya Nzambi kemonaka mbi ve na kuvukisa nitu babakala ti babakala mpi bankento ti bankento to na kutala pornografi mpi bo keyindulaka nde kusala bizumba mpi kufwa makwela kele desizio yina muntu yandi mosi fwete baka. Bantu ya Kimfumu meyambulaka nkadilu yai ya kukonda mayele mpi ya bwimi. Ata Bakristu mingi vandaka ti luzingu ya mansoni na ntama, bo kebakisaka ntangu yai nde kuvukisa nitu mpi makwela kele makabu yina mekatukaka na Nzambi. Bo kebakaka minsiku ya Yehowa na mbalu mingi mpi kendimaka na ntima ya mvimba nde bayina kelanda kusala pite to bizumba mefwana ve na kuvanda bantu ya Kimfumu ya Nzambi. (1 Kor. 6:9-11) Ata mpidina, bo kezabaka mpi nde ntima kele luvunu. (Yer. 17:9) Yo yina, bo kesepelaka mutindu  dibundu kepesaka bo balukebisu ya sikisiki sambu na kusadisa bo na kulanda kuzitisa minsiku ya kuzanguka ya bikalulu ya mbote.

BANTU YA KIMFUMU KESEPELAKA NA BALUKEBISU

10, 11. Inki balukebisu Kimfumu ya Nzambi kepesaka mbala na mbala, mpi nki nge keyindula sambu na balukebisu yango?

¹⁰ Baluyalu lenda kebisa bantu ya insi na bo sambu na madya mpi bankinsi yina lenda pesa bo maladi. Ya kyeleka, madya mpi bankinsi yonso ve kevandaka mbi. Kansi, kana madya to nkinsi mosi buna kele kigonsa sambu na bantu, luyalu lenda kebisa bantu ya insi na bo sambu na kuditanina. Luyalu kele ti mukumba ya kusala mpidina. Mutindu mosi, Kimfumu ya Nzambi kekebisaka beto mbala na mbala sambu na bikalulu mpi mambu yina lenda bebisa bangwisana na beto ti Nzambi. Mu mbandu, bantu mingi bubu yai kesadila Internet sambu na kusolula ti bantu yankaka, kutanga banzo-nkanda mpi kusala bansaka. Organizasio ya Nzambi kesadilaka Internet sambu na kusala mambu ya mfunu mingi. Kansi, basite mingi ya Internet kele kigonsa sambu na kimpeve mpi bikalulu ya mbote. Yo ke pwelele nde, basite yina kesongaka pornografi kele kigonsa sambu na kimpeve ya bantu ya Kimfumu ya Nzambi. Na nsungi ya bamvula mingi, kimvuka ya mpika ya kwikama kekebisa beto sambu na basite ya mutindu yai. Beto kesepelaka mingi mpenza na balukebisu yai!

¹¹ Na bamvula yina mekatuka kuluta, bantu mingi mekuma kusadila site yankaka ya Internet​—yina lenda sadisa beto kana beto kesadila yo na dikebi yonso. Bo kebingaka yo site ya Internet yina kesadisaka bantu yina kele ti nswa na kusolula (réseaux sociaux). Site yai lenda vanda mpi kigonsa. Kan muntu kesadila yo, yandi lenda yantika kusolula ti banduku ya mbi. (1 Kor. 15:33) Yo yina, organizasio ya Nzambi kepesa beto balukebisu sambu na kuvanda ti bukati-kati na mutindu ya kusadila basite yai. Keti nge metangaka masolo yonso yina mpika ya kwikama mekatuka kubasisa na mutindu ya kusadila basite yai? Yo tavanda kigonsa mpenza na kusadila basite yai kukonda kutanga masolo yina! * Yo tavanda bonso nde nge kenwa nkinsi mosi ya ngolo, kukonda kutanga mambu yina bo mesonika sambu na yo.

12. Sambu na nki kukonda kuwa balukebisu kele buzoba?

¹² Bantu yina kebuyaka kuwa balukebisu ya mpika ya kwikama kekudisalaka mbi mpi kesalaka bantu yankaka mbi. Bantu yankaka mekumaka kutala pornografi to mesalaka mansoni mpi na nima bo kekudikusaka na kuyindulaka nde Yehowa lenda mona ve mambu yina bo kesala. Yo kele buzoba na kuyindula nde beto lenda bumba mambu yina beto kesala na ntwala ya Yehowa! (Bing. 15:3; tanga Baebreo 4:13.) Nzambi kezola kusadisa bantu ya kesalaka mambu ya mutindu yina mpi yandi kesadila bankuluntu sambu na kusadisa bo. (Gal. 6:1) Kansi, kaka mutindu luyalu lenda katula nswa ya kuvanda muntu ya insi na bantu yina kesala mbi, Yehowa tabika ve nde bantu yina kefwa bansiku na yandi mpi kebalula ve ntima kulanda kuvanda bantu ya Kimfumu. * (1 Kor. 5:11-13) Ata mpidina yandi kele ntima mawa. Bantu yina mebalula ntima mpi meyambula kusala mambi lenda vutula bangwisana ya mbote ti Yehowa mpi kubikala bantu ya Kimfumu. (2 Kor. 2:5-8) Beto kele na dibaku ya kyese na kusadila Ntotila ya kele na zola ya mutindu yai!

 BANTU YA KIMFUMU KEBAKAKA KULONGUKA NA MBALU

13. Inki mutindu bantu ya Kimfumu kemonisaka nde bo kebakaka kulonguka na mbalu?

¹³ Baluyalu mingi kesalaka ngolo sambu bantu ya insi na bo kulonguka. Bo ketungaka banzo-nkanda sambu bantu kulonguka kutanga mpi kusonika. Bantu ya Kimfumu kemonisaka ntonda sambu na banzo-nkanda yango mpi kesalaka bikesa sambu na kulonguka kutanga, kusonika mpi kulonguka bisalu yina tasadisa bo. Kansi, bo kebakaka na mbalu mingi malongi yina Yehowa kelongaka bo na nzila ya organizasio na yandi. Mu mbandu dibundu ya Bukristu, kesyamisaka bantu na kuzaba kutanga mpi kusonika. Yo kesyamisaka bibuti na kulonga bana na bo mutindu ya kutanga. Konso ngonda, mpika ya kwikama mpi ya mayele kebasisaka Nzozulu ya Nkengi mpi Réveillez-vous ! yina kevandaka ti balutiti mingi. Kana nge ketanga balutiti zole konso kilumbu, nge talanda kubaka malongi yina Yehowa kepesaka beto.

14. (a) Inki formasio beto kebakaka? (b) Inki malongi ya metala nkokila ya Lusambu ya Dibuta nge mesadilaka?

¹⁴ Konso mposo, bantu ya Kimfumu kebakaka formasio na balukutakanu ya dibundu. Mu mbandu, tuka bamvula kuluta 60, Nzo-Nkanda ya Kisalu ya Teokrasi kesadisaka bana nzo-nkanda na kuzaba kulonga Ndinga ya Nzambi. Keti nge mesonikisaka zina na nge na nzo-nkanda yai? Tuka mwa bamvula, mpika ya kwikama kesyamisa mabuta na kusala konso mposo Lusambu ya Dibuta. Ngidika yai kesadisaka dibuta na kuvanda na bumosi. Keti nge kesadilaka malongi yina kebasikaka na mikanda na beto sambu na ngidika yai? *

15. Inki kele dibaku mosi ya nene yina beto kele ti yo?

¹⁵ Bantu ya insi yankaka kesosaka bantu sambu na kukota na kimvuka na bo ya politiki, nkutu bankaka kekwendaka nzo na nzo sambu na kusosa bantu. Na nsi-ntoto ya mvimba, bantu ya Kimfumu kesamunaka na ba bala-bala mpi nzo na nzo sambu na kumonisa nde bo kele na lweka ya Kimfumu ya Nzambi. Nkutu mutindu disolo ya kulonguka yina meluta kutubilaka yo, Nzozulu ya Nkengi, yina kesamunaka Kimfumu ya Yehowa, kele zulunalu yina bo kekabulaka mingi kuluta bazulunalu yankaka na nsi-ntoto! Mosi ya dibaku ya nene yina beto kele ti yo kele ya kuzabisa bankaka Kimfumu ya Nzambi. Keti nge kesalaka na kikesa yonso kisalu yai ya kusamuna?​—Mat. 28:19, 20.

16. Inki mutindu nge lenda monisa nde nge kele muntu ya mbote ya Kimfumu ya Nzambi?

¹⁶ Kubika fyoti, Kimfumu ya Nzambi tavanda luyalu mosi kaka yina tayala nsi-ntoto. Kimfumu yango tatwadisa mambu yonso ya luzingu ya bantu, yo vanda mambu ya kimpeve. Keti nge tavanda muntu ya mbote ya Kimfumu ya Nzambi na ntangu yina? Yai kele ntangu ya kumonisa nde nge tavanda mpidina. Ntangu nge kebaka badesizio na nge ya konso kilumbu, sala yonso sambu na lukumu ya Yehowa mpi mpidina nge tamonisa nde nge mefwana na kuvanda muntu ya Kimfumu ya Nzambi.​—1 Kor. 10:31.

[Banoti na nsi ya lutiti]

[Bangyufula ya disolo ya kulonguka]

[Bangogo sambu na kubenda dikebi ya kele na lutiti 21]

Keti nge kewidikilaka balukebisu ya Biblia sambu na Internet?

[Kifwanisu ya kele na lutiti 19]

Bonso bana ya Kore, keti nge kesepelaka na lusambu ya kyeleka mpi na disolo na yo?

[Kifwanisu ya kele na lutiti 22]

Nkokila ya Lusambu ya Dibuta lenda sadisa nge ti dibuta na nge na kukuma bantu ya mbote ya Kimfumu