Bampasi Yina Bankento Kekutanaka ti Yo

“Ntangu mono kemonaka mutindu bankento kenyokwamaka, mono kezolaka ve kuyela.”​—ZAHRA, BAMVULA 15, bo mevutukila bangogo na yandi na zulunalu GEO na Kifalansa.

BANGOGO ya leke mosi ya nkento yina kele na diboko ya kitata, kele ya kyeleka​—na ntoto ya mvimba, bo kenyokula bankento yo vanda baleke to bambuta na luzingu na bo ya mvimba. Beto tadila mambu yai ya melanda.

● Kuzola bana-babakala kuluta ya bankento. Na Azia, bibuti mingi kezolaka bana-babakala kuluta bana-bankento. Na mvu 2011, rapore mosi ya O.N.U. monisaka nde na Azia, bankento penepene ya bamilio 134 kefwaka sambu na kubasisa mavumu, kufwa bana-fyoti mpi kukonda kutudila bo dikebi.

● Nzo-nkanda. Na nsi-ntoto ya mvimba, na kati ya bantu yina melutisaka ve ata bamvula iya na nzo-nkanda, beto lenda tanga bankento zole na kati ya tatu.

● Kuvukisa nitu ti bankento na kingolo-ngolo. Bankento kuluta bamiliare zole kezingaka na bansi yina babakala kemonaka nde kuvukisa nitu ti nkento na kingolo-ngolo kele mbi ve.

● Mavimpi. Na bansi ya kinsukami, na konso minuta zole yina keluta, nkento mosi kefwaka sambu na divumu to bampasi yina kebasikaka na ntangu ya kubuta sambu bo kebakaka ve lusansu ya mbote.

● Nswa ya kuvanda ti bima. Ata bankento kekunaka bima mingi yina nsi-ntoto ya mvimba kesadilaka, na bansi mingi bankento kevandaka ve ti nswa ya kuvanda ti bima to ntoto na bo mosi.

Sambu na nki bankento kele ve ti banswa yina muntu yonso fwete vanda ti yo? Binkulu yankaka kelandaka malongi ya mabundu yina kesiamisaka to nkutu kelongaka nde kuniokula bankento kele mbi ve. Zulunalu mosi ya France vutukilaka bangogo ya Chandra Rami Chopra, nkento mosi ya kele avoka na Inde. Nkento yango tubaka nde: “Bansiku ya mabundu yonso kele kiteso mosi na diambu yai: Yo kesiamisaka dibanza ya kuniokula bankento.”

Keti nge mpi keyindulaka mpidina? Keti nge keyindula nde Biblia kebakaka ve bankento na mbalu, mutindu mikanda yankaka ya mabundu kesalaka yo? Sambu na bantu yankaka, yo kemonana nde baverse yankaka ya Biblia kendimaka diambu yai. Kansi, nki mutindu Nzambi yina kele munkwa ya Biblia ketadilaka kibeni bankento? Ata bantu mingi kezolaka ve kutubila diambu yai, kutadila mbote-mbote mpi na masonga yonso mambu yina Biblia ketubaka lenda sadisa beto na kuzwa mvutu.

[Bangogo ya kemonisa kisina ya foto ya kele na lutiti 3]

© G.M.B. Akash/Panos Pictures