Keti Beto Lenda Vanda Masonga na Nsi-Ntoto ya Me Fuluka ti Madesu ya Bana?

“Beto ke zola kuditwadisa na masonga na mambu yonso.”​—BAEBREO 13:18.

ATA BETO kele bantu ya masumu, nsi-ntoto ya beto ke zinga mpi Diabulu lenda vanda ti bupusi ya ngolo na luzingu na beto, beto lenda telamina bupusi na bo! Inki mutindu? Kana beto kekwenda pene-pene ya Nzambi mpi ke sadila minsiku yina kele na Ndinga na yandi Biblia. Bika beto tadila ba mbandu zole.

MUNSIKU YA BIBLIA: “Beno landa bikalulu ya bantu ya nsi-ntoto yai ve.”​—Baroma 12:2, Bible de Jérusalem.

Diambu yina salamaka: Guilherme kele muntu ya insi Brésil yina mumbongo na yandi ke tambulaka mbote mpenza. Yandi ke ndima nde yo kele pete ve na kuvanda masonga. Yandi ke tuba nde: “Muntu ya mumbongo lenda yantika kuyedisa kikalulu ya kukonda masonga, ziku sambu yandi ke zola nde kompani na yandi kununga to kompani ya nkaka kuluta ve kompani na yandi. Bantu mingi ke monaka nde kupesa madesu ya bana to kundima yo kele mbi ve. Kana nge kele muntu ya mumbongo yina kele ti mbongo mingi, yo kele pete ve na kuvanda masonga.”

Ata mpidina, Guilherme nungaka na kubikala muntu ya masonga. Yandi ke tuba nde: “Ata na bisika yina bo ke zitisaka ve bansiku ya mumbongo, muntu lenda vanda masonga. Nge fwete vanda ti minsiku ya bikalulu ya mbote. Biblia me sadisaka mono na kumona mambote ya kuvanda masonga. Muntu ya masonga ke vandaka ti kansansa ya bunkete, ngemba ya mabanza mpi luzitu. Yandi lenda vanda mbandu ya mbote sambu na bantu yina kele na nziunga na yandi.”

MUNSIKU YA BIBLIA: ‘Bantu yina kezola kukuma bamvwama ke bwaka na mpukumuna, na mutambu, mpi na banzala ya buzoba mpi ya mbi yina ke nataka bantu na lufwa mpi na kubeba. Zola ya mbongo kele musisa ya mambu yonso ya mbi.’​—1 Timoteo 6:9, 10.

Diambu yina salamaka: André kele munkwa ya kompani yina ke tulaka ba apareyi na ba lupangu ya bantu sambu na kuditanina na bantu ya mbi. Ekipi mosi ya nene ya nkweso kele na kati ya bantu yina yandi ke sadilaka kisalu. Kilumbu mosi, ekipi yango bulaka nkweso ya nene mpi André kwendaka kulomba mbongo na bo na mfumu yina ke twadisaka ekipi yango. Bantu yina ke talaka mambu ya mbongo vandaka ti kisalu mingi sambu bo vandaka kutanga mbongo yina bo bakaka. Sambu ntangu lutaka dezia, mfumu yango futaka nswalu-nswalu bantu yonso mpi André.

André ke tuba nde: “Na nzila, ntangu mono vandaka kuvutuka na nzo mono bakisaka nde mfumu yina lutisaka mbongo. Mono zabaka nde, ziku yandi zabaka ve muntu yina yandi lutisilaka mbongo. Kansi, mono zabaka mpi nde yo ta lomba nde mfumu yina kubasisa mbongo na yandi mosi sambu na kufuta mbongo yina lutanaka! Mono bakaka lukanu ya kuvutuka. Mono salaka yonso sambu na kusosa nzila na kati ya bantu mingi yina kwisaka kutala nkweso mpi  mono vutulaka mbongo yina lutanaka. Mfumu yango yitukaka ngolo. Ata muntu mosi ve me vutudilaka yandi mbongo mutindu yai.”

André ke yika nde: “Diambu yai ya masonga salaka nde mfumu yina kupesa mono luzitu. Tuka diambu yina me salamaka, bamvula mingi melutaka, kansi na kati ya bantu yonso yina vandaka kusala kisalu yina, mono mpamba me bikalaka. Mono kele na ntonda mingi, sambu kusadila minsiku ya kuzanguka ya Biblia me tanina lukumu na mono.”

Yo ke pesaka kikesa na kuzaba nde, ti lusadisu ya Nzambi beto lenda telamina bupusi ya mbi. Kansi, bikesa yina muntu lenda sala lenda manisa ve madesu ya bana sambu na kimakulu. Bikuma yina ke pusaka bantu na kupesa madesu ya bana me bakaka misisa ya ngolo, yo yina yo kele mpasi sambu na bantu ya kukonda kukuka na kumanisa yo na ngolo na bo mosi. Kansi, keti yo ke tendula nde madesu ya bana ta mana ve ata fioti? Disolo ya nsuka ya masolo yai ya kulandana ke pesa bamvutu ya ke siamisa ya me katuka na Biblia.