Ngiufula 1: Keti Luzingu na Mono Kele ti Lukanu?

ROSALIND yina me yelaka na Angleterre, vandaka ti mpusa ya ngolo ya kuzaba mambu. Yandi vandaka mpi ti mpusa ya kusadisa bantu. Na nima ya kumanisa nzo-nkanda, yandi bakaka kisalu mosi ya lukumu yina ke lombaka kusadisa bantu yina me konda banzo, bantu yina kele ti bifu na nitu mpi bayina me zaba kutanga ve. Ata yandi vandaka ti kisalu mosi ya mbote mpi ti luzingu ya mbote na kinsuni, yandi ke tuba nde: “Tuka bamvula mingi, mono ke kudiyulaka ‘Sambu na nki beto kele awa na ntoto?’ mpi ‘Inki kele lukanu ya luzingu?’”

Sambu na nki kuyula ngiufula yina? Bantu kele ve bonso bambisi sambu bambisi ke yindulaka ve. Beto kele ti makuki ya kubaka dilongi na mambu yina me lutaka, kudibongisa sambu na bilumbu yina ke kwisa, mpi kusala nde luzingu na beto kuvanda ti lukanu.

Bantu ya nkaka ke pesaka nki mvutu? Bantu mingi ke monaka nde lukanu ya ntete-ntete ya luzingu kele kubaka kimvwama to lukumu mpi mambu yina yonso ke pesaka kiese.

Mvutu yina ke monisa nki? Beto ke ponaka mambu ya kutula na kisika ya ntete na luzingu na beto. Bampusa na beto me luta luzolo ya Nzambi na mbalu.

Biblia ke longaka nki? Ntotila Salomo vandaka ti kimvwama mingi mpi sosaka biese kansi yandi monaka nde bima yina yonso salaka ve nde luzingu na yandi kuvanda ti lukanu. Yandi tubilaka diambu yina salaka nde luzingu na yandi kuvanda ti lukanu ntangu yandi sonikaka nde: “Nsuka ya mambu yonso, na nima ya kuwa yo, kele: Wa Nzambi ya kieleka boma mpi lemfuka na bansiku na yandi. Sambu yai kele diambu ya muntu fwete sala.” (Longi 12:13, NW) Kulemfuka na bansiku ya Nzambi ke lombaka nde beto sala nki?

 Lukanu ya Nzambi kele mpi nde beto sepela na luzingu. Salomo sonikaka nde: ‘Kima ya mbote ya muntu lenda sala kele kudia mpi kunwa mpi kumona kiese sambu na kisalu na yandi ya ngolo. Na nima mono kwisaka kuzaba nde, ata mambote yai mpi ke katukaka na Nzambi.’​—Longi 2:24.

Nzambi ke zolaka mpi nde beto zola dibuta na beto mpi beto lungisa bampusa na yo. Tala ndongisila ya pete mpi ya mbote yina yandi me pesa na konso muntu na kati ya dibuta.

‘Babakala fwete zola bankento na bo, bonso nitu na bo mosi.’​—Baefezo 5:28.

“Nkento fwete vanda ti luzitu ya mudindu sambu na bakala na yandi.”​—Baefezo 5:33.

“Bana, beno lemfuka na bibuti na beno.”​—Baefezo 6:1.

Kana beto sadila bandongisila yai ya Biblia, beto ta vanda na kiese mpi ta sepela na bima yina beto kele ti yo. Kansi, kima ya kuluta mfunu kele kulonguka mambu yonso yina beto lenda zaba na yina me tala Ngangi na beto mpi kukuma banduku na yandi. Nkutu, Biblia ke lomba beto na ‘kukwenda pene-pene na Nzambi.’ Mpi yo ke pesa beto lusilu yai: “Yandi ta kwisa pene-pene na beno.” (Yakobo 4:8) Kana nge ndima kusala mpidina, luzingu na nge ta vanda mpenza ti lukanu.

Rosalind yina beto tubilaka na luyantiku, ke tuba nde ntangu yai yandi me zaba lukanu ya luzingu.

Sambu na kuzaba mambu mingi na mutindu nge lenda vanda ti luzingu yina ke sepedisaka Nzambi, tala kapu 12 ya mukanda Inki Biblia kelongaka mpenza? Nge lenda zwa yo mpi na Internet na www.mt1130.com

[Lupangu ya kele na lutiti 5]

Inki Yezu Tubaka Sambu na Lukanu ya Luzingu?

Ntembe kele ve nde, Yezu zabaka lukanu ya luzingu. Yandi tubaka nde: “Mono butukaka sambu na diambu yai, mpi mono kwisaka na nsi-ntoto sambu na diambu yai, sambu mono ta kimbangi na kieleka.” (Yoane 18:37) Yezu lutisaka luzingu na yandi ya mvimba na kulonga bantu kieleka na yina me tala Nzambi mpi lukanu na yandi.

Luzingu na beto ta vanda ti lukanu ya kieleka kana beto landa mbandu ya Yezu. Nkutu, Yezu ke lomba beto na kulonguka na yandi. (Matayo 11:29) Beto tadila kaka mitindu zole yina beto lenda sala yo.

Yezu longaka nde sambu na kuvanda na kiese, beto fwete vanda na “nzala ya mambu ya kimpeve.” (Matayo 5:3) Beto lenda lungisa mpusa yango kana beto longuka na kuzaba “Nzambi mosi kaka ya kieleka, mpi muntu yina [yandi] tindaka, Yezu Kristu.”​—Yoane 17:3.

Yezu pesaka balongoki na yandi ntuma ya kulonga ba nkaka mambu yina bo longukaka. Yandi tubaka nde: “Yo yina, beno kwenda mpi beno kumisa bantu ya makanda yonso balongoki, beno botika bo na zina ya Tata mpi ya Mwana mpi ya mpeve santu, beno longa bo na kuzitisa mambu yonso ya mono tumaka beno.”​—Matayo 28:19, 20.

Bantu yina longukaka Biblia sambu na kulungisa mpusa na bo ya kimpeve mpi sadilaka mambu yina bo longukaka, monaka nde luzingu na bo kumaka mbote mingi mpenza. Bo ndimaka nde luzingu na bo kumaka ti lukanu ya kieleka ntangu bo yantikaka kusadisa bankaka na kulonguka mambu ya me tala Nzambi.