Na kutadila Biblia, bantu yonso kele bansumuki. Beto me bakaka nkadilu ya kusala masumu na Adami, kibuti na beto ya ntete. Yo yina, bantangu ya nkaka beto ke salaka mambu ya mbi mpi na nima beto ke waka mawa na ntima sambu na mambu yango. Yezu Kristu, Mwana ya Nzambi fwaka sambu na kufuta masumu na beto. Kimenga na yandi ya nkudulu me pesaka beto nzila ya kubaka ndolula ya masumu. Yo kele dikabu yina me katuka na Nzambi.​—Tanga Baroma 3:23, 24.

Bantu ya nkaka me salaka masumu ya nene mpi ke kudiyulaka kana Nzambi lenda lolula bo. Diambu ya kiese kele nde, Ndinga ya Nzambi ke tuba nde: “Menga ya Yezu Mwana na yandi ke yobisa beto na masumu yonso.” (1 Yoane 1:7) Yehowa ke lolulaka na luzolo yonso ata masumu ya nene, kana beto kele ti nkadilu ya mbote mpi me balula ntima.—Tanga Yezaya 1:18.

Kana beto ke zola nde Yehowa Nzambi kulolula beto, beto fwete longuka mambu ya me tala yandi, disongidila kubakisa banzila na yandi, bandongisila na yandi mpi minsiku na yandi. (Yoane 17:3) Yehowa ke lolulaka na luzolo yonso bantu yonso yina ke balulaka ntima na nkadilu na bo ya mbi mpi ke salaka bansoba.​—Tanga Bisalu 3:19.

Yo kele mpasi ve na kundimama na Nzambi. Yehowa ke bakisaka bifu na beto. Yandi ke wilaka beto mawa mpi kele ntima ya mbote. Keti ntima na yandi ya mbote ke pusa nge ve na kuzola kulonguka mambu mingi sambu na kuzaba mutindu nge lenda sepedisa yandi?​—Tanga Nkunga 103:13, 14.