Cameron: Jon, mono kele na kiese ya kumona nge diaka. Mono ke sepelaka ntangu yonso mutindu beto ke longukaka Biblia konso mposo. * Ibwe nge?

Jon: Mono ke mbote.

Cameron: Mono me sepela mutindu mavimpi na nge ke mbote. Na mbala me luta, beto monaka kikuma yina Bambangi ya Yehowa ke tubaka nde Kimfumu ya Nzambi yantikaka kuyala na mvu 1914. * Ntangu beto solulaka, beto monaka banzikisa yango na mbikudulu yina kele na mukanda ya Daniele na kapu ya 4. Keti nge ke yibuka diaka mambu yina kele na mbikudulu yango?

Jon: Yo ke tubila nti ya nda yina Ntotila Nabukodonozore monaka na ndosi.

Cameron: Yo kele mutindu yina. Na ndosi yango, Nabukodonozore monaka nti mosi ya nda mingi yina kumaka tii na zulu. Ebuna yandi waka kinati-nsangu ya Nzambi ke pesa ntuma nde bo zenga nti kansi bo yambula kisina ti misisa na yo na ntoto. Mpi nti yango ta yela diaka na nima ya “bamvula nsambwadi.” * Beto tubilaka mpi mutindu mbikudulu yango lunganaka na mitindu zole. Keti nge ke yibuka diaka mutindu yo lunganaka na mbala ya ntete?

Jon: Yo lunganaka na Nabukodonozore, mpidina ve? Bo katulaka yandi mayele bamvula nsambwadi.

Cameron: Ee, bo katulaka Nabukodonozore mayele sambu na ntangu mosi buna disongidila ntangu yandi yambulaka ntete kuyala. Yo lunganaka na mutindu ya kuluta nene ntangu luyalu ya Nzambi sukaka na nsungi mosi buna ya bamvula nsambwadi. Mutindu beto monaka yo, bamvula nsambwadi yantikaka ntangu bo fwaka Yeruzalemi na mvu 607 N.T.B. Yantika ntangu yina, ata ntotila mosi ve vandaka diaka kumonisa luyalu ya Yehowa Nzambi awa na ntoto. Kansi na nsuka ya bamvula nsambwadi, Nzambi zolaka kutula Mfumu ya mpa na zulu sambu na kuyala bantu na yandi. Na kikongo ya nkaka, Kimfumu ya Nzambi yina kele na zulu zolaka kuyala ntangu bamvula nsambwadi zolaka kusuka. Beto tubilaka dezia ntangu yina bamvula nsambwadi yantikaka. Yo yina, kana beto zaba bantangu ikwa yo salaka, beto ta zaba ntangu Kimfumu ya Nzambi yantikaka kuyala. Keti nge ke bakisa?

Jon: Ee, mvutukilu yai me sadisa mono na kuyibuka mambu yina beto longukaka.

Cameron: Ok. Bika beto yantika disolo yango mpi beto tala bantangu ikwa bamvula nsambwadi salaka. Mono me katuka kusala bansosa ya disolo yai sambu na kusimba bangindu ya mfunu. Mpi mono ke tendudila nge yo.

Jon: Matondo.

Cameron: Ntangu mbikudulu yai lunganaka na mbala ya ntete na Nabukodonozore, ntembe kele ve nde bamvula nsambwadi salaka kaka bamvula nsambwadi mutindu beto ke tangaka. Kansi ntangu yo lunganaka na mutindu ya kuluta nene na Kimfumu ya Nzambi, bamvula nsambwadi fwete vanda nsungi mosi ya nda ya me swaswana ti bamvula nsambwadi.

Jon: Nki mutindu?

Cameron: Ntete-ntete, kuvila ve nde bamvula nsambwadi yantikaka ntangu bo fwaka Yeruzalemi na 607 N.T.B. Kana beto yantika kutanga banda mvula yai, bamvula nsambwadi ke bwa na 600 N.T.B. Kansi, na mvula yai ata diambu mosi ve ya nene salamaka na luyalu ya Nzambi. Mpi mutindu beto monaka yo, ntangu Yezu vandaka na ntoto bamvu-nkama mingi me luta, yandi monisaka nde bamvula nsambwadi vandaka me suka ntete ve.

Jon: Ee, mono me yibuka diaka.

Cameron: Na kisika ya kutanga bamvula yai mutindu beto ke tangaka, bamvula nsambwadi fwete vanda nsungi mosi ya nda.

Jon: Yo fwete vanda bamvula ikwa?

Cameron: Mambu ya mukanda ya Kusonga yina ke wakana ti ya mukanda ya Daniele, ke sadisa beto na kuzaba kibeni bantangu ikwa bamvula nsambwadi salaka. Mukanda yango ke monisa nde bantangu tatu ti ndambu kele nsungi mosi ya bilumbu 1 260. * Yo yina, bantangu nsambwadi, disongidila bilumbu 1260 fokula na zole ke sala bilumbu 2 520. Keti nge ke bakisa?

Jon: Mono ke landa. Kansi mambu yai ya nge ke tuba ke monisa ve nde Kimfumu ya Nzambi yantikaka kuyala na mvu 1 914.

Cameron: Kima ve, bika beto tala kana beto lenda wakanisa yo. Bantangu ya nkaka na bambikudulu ya Biblia, kilumbu mosi ke monisaka mvula mosi. * Kana beto sadila munsiku yina kilumbu mosi ke monisa mvula mosi, bamvula nsambwadi kele bamvula 2 520. Kana beto banda kutanga na mvu 607 N.T.B., bamvula 2 520 ta nata beto na mvu 1 914. * Kikuma yo yai, beto ke tubaka nde bamvula nsambwadi sukaka na mvu 1 914 mpi Yezu, Ntotila ya Kimfumu ya Nzambi yantikaka kuyala. Tuka mvu 1 914, mambu mingi ya nene ke salamaka na nsi-ntoto disongidila mambu yina Biblia bikulaka sambu na bilumbu ya nsuka.

Jon: Nki mambu?

Cameron: Beto tala mambu yina Yezu tubaka na Matayo 24:7. Sambu na ntangu yina Yezu zolaka kuyantika kuyala na zulu, yandi tubaka nde: “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ti kunikana ya ntoto ta vanda na bisika ya mutindu na mutindu.” Simba mambu yai. Yezu bikulaka nde nzala mpi kunikana ya ntoto ta vanda na ntangu ya nsuka. Mambu mingi ya mutindu yai salamaka na nsi-ntoto na mvu-nkama yai ya me luta, mpidina ve?

Jon: Yo kele mpidina.

Cameron: Na verse yai, Yezu bikulaka mpi bitumba na nsungi ya kukala na yandi bonso Ntotila ya Kimfumu ya Nzambi. Mukanda ya Kusonga bikulaka nde na ntangu ya nsuka, bitumba ta vanda ve kaka na nsi mosi kansi yo ta vanda mpi na ntoto ya mvimba. * Keti nge ke yibuka diaka ntangu yina bitumba ya ntete salamaka?

 Jon: Yo salamaka na 1914, mvula yina beno ke tubaka nde Yezu yantika kuyala! Ntete, mono vandaka kubakisa ve mambu mutindu yai.

Cameron: Yo kele mpenza mutindu yai kana beto tadila mbikudulu ya ke tubila bamvula nsambwadi mpi bambikudulu ya nkaka ya Biblia ya ke tadila ntangu ya nsuka. Bambangi ya Yehowa ke ndimaka nde Yezu kumaka Ntotila ya Kimfumu ya Nzambi mpi yantikaka kuyala na 1914, mpi nde bilumbu ya nsuka yantikaka na mvula yai. *

Jon: Mono ta sala ngolo sambu na kubakisa mambu yai yonso.

Cameron: Yo me fwana nde nge bakisa yo. Mutindu mono zabisaka nge, yo bakaka mono mpi ntangu sambu na kubakisa mambu yai mbote-mbote. Kansi, mono ke ndima nde masolo na beto me sadisa nge na kubakisa nde balukwikilu ya Bambangi ya Yehowa ya me tala mvu 1914 ke katukaka na Masonuku ata Biblia ke tubilaka yo ve na siki-siki yonso.

Jon: Konso ntangu, mambu ya beno ke tubaka ke simbaka ntima na mono sambu beno ke sadilaka baverse ya ke ndimisaka mambu yango. Mambu ya beno ke tubaka ke vandaka ve bangindu na beno. Kansi mono ke kudiyulaka sambu na nki mambu yango ke vandaka mpasi na kubakisa. Sambu na nki Nzambi zabisaka beto ve mbala mosi na Biblia nde mvu 1914 zolaka kuvanda mvula yina Yezu zolaka kuyantika kuyala na zulu?

Cameron: Jon, nge me yula ngiufula mosi ya kuluta mbote. Na masonga yonso, Biblia ke tendulaka ve mambu mingi na pwelele yonso. Kansi, sambu na nki Nzambi zolaka nde bo sonika Biblia na mutindu yina bantu fwete sala bikesa sambu na kubakisa yo? Ziku, beto ta tadila diambu yai na mbala ya nima.

Jon: Mono ta sepela.