Keti nge kele ti nduku mosi ya ngolo yina nge ke zabaka ve zina na yandi? Mpenza ve. Irina, nkento mosi na Bulgarie tubaka nde: “Muntu lenda kwenda ve pene-pene na Nzambi kana yandi ke zaba ve zina na yandi.” Mutindu beto me tubila yo na disolo ya me luta, Nzambi ke zolaka nde nge kwenda pene-pene na yandi. Yo yina, na nsadisa ya Biblia, yandi ke zabisa nge zina na yandi. Yandi ke tuba nde: “Mono kele Yehowa. Yo yina zina na mono.”—Yezaya 42:8, NW.

Keti Yehowa ke zolaka nde beto zaba mpi beto sadila zina na yandi? Beto tadila diambu yai: Bo ke sonikaka zina ya Nzambi ti bisono ya Kiebreo iya yina bo ke bingaka Tétragramme. Zina yango ke monanaka bambala kiteso ya 7 000 na masonama ya kisina ya Kiebreo. Zina yai ke monanaka mbala mingi na Biblia kuluta bazina ya nkaka. Yo kele nzikisa ya ke monisa nde Yehowa ke zolaka nde beto zaba zina na yandi mpi beto sadila yo. *

Bantu ya nkaka lenda yindula nde kusadila zina Nzambi kele kukonda luzitu sambu yandi kele santu mpi nkwa-ngolo yonso. Ya kieleka, yo kele mbote ve na kusadila zina ya Nzambi na mutindu ya mbi kaka mutindu nge ta zola ve kusadila zina ya nduku na nge ya ngolo na mutindu ya mbi. Kansi, Yehowa ke sepelaka nde bantu yina ke zolaka yandi kupesa zina na yandi lukumu mpi kuzabisa yo na bantu ya nkaka. (Nkunga 69:31, 32; 96:2, 8) Kuvila ve nde Yezu longaka balongoki na yandi na kusamba nde: “Tata na beto yina kele na zulu, bika nde zina na nge kusantisama.” Beto ta santisa zina ya Nzambi kana beto ke zabisa yo na bantu ya nkaka. Kusala mutindu yai ta sadisa beto na kukwenda pene-pene na Nzambi.—Matayo 6:9.

Biblia ke tuba nde Nzambi ke tulaka dikebi ya ngolo na ‘bantu yina ke yindululaka [to ke bakaka na “mbalu”] zina na yandi.’ (Malashi 3:16) Yehowa ke sila bantu ya mutindu yai nde: “Mono ta taninaka bayina kuzaba [zina na] mono . . . Ntangu bo ta binga mono, mono ta ndima; ntangu bo ke na mpasi, mono ta vanda ti bo. Mono ta katula bo na mpasi.” (Nkunga 91:14, 15) Kuzaba mpi kusadila zina ya Yehowa kele mfunu kana beto ke zola kuvanda ti bangwisana ya ngolo ti yandi.