Keti Nzambi ta bika nde bantu kulanda kuyala bantu ya nkaka mpi kubebisa luzingu na bo na bilumbu ke kwisa? Ve. Mutindu beto me mona yo, Nzambi ta katula bantu na luzingu yai ya mawa mpi ya mpasi. Ngangi ya bantu mpi ya ntoto ke zola nge zaba nde ntangu yina yandi ta katula bampasi me kuma pene-pene. Inki mutindu yandi ke monisa mambu yai ya mfunu?

Beto baka mbandu: Kana nge ke zola kusala nzietelo na kamio, nge lenda sosa ntete bansangu na Internet, na bakarte to na mikanda. Ntangu nge ke sala nzietelo, kana nge me yantika kumona bidimbu mpi bima ya ke wakana ti bansangu ya nge bakaka, nge ta bakisa nde nge me kuma pene-pene ti kisika ya nge ke kwenda. Mutindu mosi, Nzambi me pesaka beto Ndinga na yandi ya ke monisa beto mambu ya ke salama na ntoto ya mvimba. Ntangu beto ke mona mambu yai yonso ke lungana, beto ke ndima kibeni nde nsuka me kuma pene-pene.

Biblia ke tuba nde nsi-ntoto ta kota na nsungi mosi ya me swaswana ti bansungi ya nkaka mpi nsungi yango ta nata na nsuka. Mambu ya ta salama na nsungi yai, ta salama na ntoto ya mvimba mpi yo ta swaswana ti yina me salamaka dezia na disolo ya luzingu ya bantu. Beto tadila mwa mambu na kati ya mambu yina Ndinga ya Nzambi ke tubila.

1. BANSOBA YA NENE TA SALAMA NA NTOTO YA MVIMBA Mbikudulu ya kele na Matayo kapu 24 ke tubila mambu mingi ya ke salama na ntoto, mpi mambu yango ke sala kidimbu mosi ya kele ti mambu mingi. Kidimbu yai ke monisa “nsukilu ya ngidika ya bima” mpi yo ta nata na ntangu yina “nsuka ta kwisa.” (Verse 3, 14) Mambu ya kidimbu yango kele bitumba, nzala, kunikana ya ntoto na bisika ya mutindu na mutindu, kikalulu ya kufwa bansiku ya ke kuma mingi, kukonda zola mpi mambu yina bantwadisi ya mabundu ke sala sambu na kukusa bantu. (Verse 6-26) Ya kieleka, mambu ya mutindu yai ke salamaka dezia bamvu-nkama mingi me luta. Kansi, sambu nsuka me finama, mambu yai yonso ta kuma mingi na nsungi yai ya mpasi. Mambu yai tatu ya ke landa ta vanda mpi na kati ya kidimbu yai ya nsuka.

2. BIKALULU YA BANTU Biblia ke tuba nde “na bilumbu ya nsuka,” disongidila, nsungi yina ta nata na nsuka, bikalulu ya bantu mingi ta beba. Yo ke yika nde: “Bantu ta vanda bantu ya ke kudizolaka, bantu ya ke zolaka mbongo, bantu ya ke kudisongaka, bantu ya lulendo, bantu ya ke vwezaka, bantu ya ke lemfukaka ve na bibuti, bantu ya ke pesaka ve matondo, bantu ya me konda kwikama, bantu ya ke zolaka ve bantu ya nkaka, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya me konda zola ya mambu ya mbote, bantu ya ke yekulaka bankaka, bantu ya ntu-ngolo, bantu ya me fuluka ti lulendo, bantu ya ke zolaka biese na kisika ya kuzola Nzambi.” (2 Timoteo 3:1-4) Ya kieleka, kukonda kuzitisa bantu kele ve kima ya mpa kansi “na bilumbu ya nsuka,” kikalulu yai ta kuma mingi. Yo yina, Biblia ke binga nsungi yai “bantangu ya mpasi mpi ya nku.” Keti nge ke monaka bikalulu yai ya mbi na bantu?

3. BANTU KE BEBISA NTOTO Biblia ke tuba nde Nzambi ta ‘bebisa bantu yina ke bebisa ntoto.’ (Kusonga 11:18) Inki mutindu bantu ke bebisa ntoto? Biblia ke tuba mpi mambu ya mutindu mosi sambu na ntangu ya Noa. Yo ke tuba nde: “Nzambi monaka mbi na bo, mbi ti nku na bo mpi panzanaka na nsi-ntoto yonso. Ntangu Nzambi talaka nsi-ntoto, yandi monaka nde yo me kuma mavanga [me beba].” Yo yina, Nzambi tubilaka bantu yai ya mbi nde: “Mono ta fwa bo.” (Kuyantika 6:11-13) Keti nge ke mona mambu ya ke monisa nge nde ntoto me fuluka ti mubulu? Nkutu, bantu me kuma na nsungi mosi ya me swaswana ti bansungi ya nkaka: Bo kele na makuki ya kubebisa ntoto, disongidila, ya kufwa bantu yonso na ntoto sambu bo kele ti minduki. Ntoto ke beba mpi na mutindu ya nkaka. Bima yina ke salaka nde luzingu kuvanda na ntoto, mu mbandu, mupepe, bambisi, banti, banzadi, mpi kuwakana  yina ke vandaka na kati ya bigangwa mpi bisika yina yo ke zingaka, kele na kubeba malembe-malembe sambu bantu ke sadila yo na mutindu ya mbi.

Kudiyula nde: ‘Na mvu-nkama ya me luta, keti bantu vandaka ti kiyeka ya kudifwa bo mosi?’ Kansi bubu yai, bantu me kuma ti mayele ya kusala minduki ya ngolo-ngolo mpi ya kubebisa ntoto. Ziku, bantu ke kuka ve kubakisa mpi kuyidika malanda ya mbi yina kutoma ya mambu ya Teknolozi ke basisa. Yo yina, muntu lenda zaba ve mambu yina ta salama na bilumbu ke kwisa. Na ntwala nde bantu kufwa bima yonso ya ke zingaka na ntoto, Nzambi ta fwa bantu yina ke bebisa ntoto. Nzambi muntu ke sila beto mambu yai!

4. KISALU YA KUSAMUNA YINA KE SALAMA NA NTOTO YA MVIMBA Kitini ya nkaka ya kidimbu ya nsuka monisaka na ntwala nde kisalu mosi ta salama na mutindu ya kuyituka. Biblia ke tuba nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso mpi na nima nsuka ta kwisa.” (Matayo 24:14) Kisalu yai ta swaswana kibeni ti yina mabundu mingi ke salaka bamvu-nkama mingi me luta. Na bilumbu ya nsuka, bantu ta samuna mingi “nsangu ya mbote ya Kimfumu.” Keti nge me zaba dibundu mosi ya ke kudipesaka na kusamuna nsangu yai? Ata bantu ya nkaka ke tubaka nde bo ke longaka nsangu yai, keti bo ke samunaka yo na bwala mosi to bo ke mwangaka yo na “ntoto ya mvimba sambu na kuta kimbangi na makanda yonso”?

Site Internet na beto www.mt1130.com ke tubilaka mingi “nsangu ya mbote ya Kimfumu.” Site yango kele ti mikanda mingi ya ke longaka nsangu yai na bandinga kuluta 700. Keti nge ke zaba kimvuka ya nkaka ya me bakaka bangidika ya mutindu yai sambu na kusamuna nsangu ya mbote ya Kimfumu na ntoto ya mvimba? Na ntwala nde bantu kuyantika kusadila Internet, Bambangi ya Yehowa zabanaka dezia sambu na kisalu na bo ya kulonga nsangu ya Kimfumu ya Nzambi. Tuka 1939, lutiti ya zulu ya Nzozulu ya Nkengi ke vandaka ti bangogo yai: “Kesamunaka Kimfumu ya Yehowa.” Mukanda mosi ya ke tubilaka mambu ya mabundu monisaka nde bantu lenda “fwanisa ve bunene ya kisalu ya Bambangi ya Yehowa ti ya bantu ya nkaka.” Nsangu ya mbote yina Bambangi ya Yehowa ke longaka ke monisaka nde ntama mingi ve na nsadisa yaKimfumu ya Nzambi “nsuka ta kwisa.”

Keti nge ke monaka mutindu bidimbu iya ya beto me tubila na disolo yai ke lungana bubu yai? Bamvula kuluta nkama mosi me luta, zulunalu yai ke zabisaka bantu mambu ya ke luta na nsi-ntoto sambu na kumonisa bo nde nsuka me kuma  pene-pene. Ya kieleka, bantu ya nkaka ya ke tulaka ntembe ke ndimaka ve banzikisa yai mpi bo ke tubaka nde yo kele bangindu ya bantu mpi bo lenda soba yo. Bo ke tubaka mpi nde mutindu mambu ya me tala communication ke kwenda na ntwala, yo ke monana nde mambu ya nsi-ntoto yai ta landa kaka na kubeba. Ata bo ke tula ntembe, mambu mingi ke monisa beto pwelele nde beto ke zinga na nsuka ya nsungi mosi ya mfunu ya disolo ya luzingu ya bantu.

Bantu ya nkaka ya mayele ke monaka nde ntama mingi ve, bansoba ya nene ta salama na ntoto. Mu mbandu, na mvu 2014, Zulunalu mosi (the Science and Security Board of the Bulletin of the Atomic Scientists) kebisaka Conseil de sécurité des Nations unies sambu na mambu mingi ya ke tula luzingu ya bantu na kigonsa. Bantu yai ya siansi tubaka nde: “Kutadila mbote-mbote mambu yai ke pusa beto na kutuba nde bigonsa yina teknolozi ke nata ta vanda kaka mingi.” Bantu mingi ke ndima nde beto ke zinga na nsungi mosi ya mfunu na disolo ya luzingu ya bantu. Bambasisi ya zulunalu yai mpi bantu mingi ya ke tangaka yo ke ndimaka nde beto ke zinga na bilumbu ya nsuka mpi nde nsuka me kuma pene-pene. Kansi na kisika ya kuwa boma ya kilumbu yina, nge lenda vanda na kiese sambu na mambu yina ta salama. Sambu na nki? Sambu nge lenda guluka ntangu nsuka ta kwisa!