Keti yo me fwana ve na kuyindula nde bafwa ta zinga diaka? Ntumwa Polo tadilaka ve mambu mutindu yai. Yandi sonikaka na nsadisa ya mpeve santu nde: “Kana beto me tulaka kivuvu na Kristu na luzingu yai kaka, beto kele bantu ya mawa kuluta bantu yonso. Kansi ya kieleka, Nzambi tedimisaka Kristu na bafwa, mbuma ya ntete ya bantu yina me lalaka na lufwa.” (1 Bakorinto 15:19, 20) Polo vandaka kukwikila na lufutumuku. Diambu ya pusaka yandi na kukwikila mutindu yai kele lufutumuku ya Yezu. * (Bisalu 17:31) Yo yina, Polo bingaka Yezu nde “mbuma ya ntete,” disongidila yandi vandaka muntu ya ntete yina Nzambi futumunaka sambu na kuzinga kimakulu. Kana Yezu vandaka muntu ya ntete ya futumukaka, yo ke monisa pwelele nde bantu ya nkaka mpi ta futumuka.

Kele ti kikuma ya nkaka ya lenda pusa nge na kundima nde bafwa ta futumuka. Yehowa kele Nzambi ya kieleka. Biblia ke tuba nde: “Nzambi . . . lenda kusa ve.” (Tito 1:2) Yehowa me kusaka ntete ve mpi yandi ta kusaka ve ata fioti. Keti yandi lenda sila na kufutumuna bantu mpi kumonisa nkutu nde yandi ta sala yo kansi na nima yandi sala yo ve? Yo lenda salama ve ata fioti!

Sambu na nki Yehowa me bakaka ngidika ya kufutumuna bantu na bilumbu ya ke kwisa? Sambu na zola na yandi. Yobi yulaka nde: “Kana muntu kufwa, keti yandi ta telama diaka? Pana nge zolaka kubinga mono, ebuna mono zolaka kwisa; mpidina nge zolaka kuvanda kiese na kumona mono muntu ya nge salaka.” (Yobi 14:14, 15) Yobi vandaka kundima nde Tata na yandi ya zulu ta vanda na mpusa ya ngolo ya kufutumuna yandi. Keti Nzambi me sobaka? Biblia ke tuba nde: “Mono kele Mfumu Nzambi, mono ke bikalaka kaka Mfumu Nzambi.” (Malashi 3:6) Nzambi ke vandaka ti mpusa ya ngolo ya kumona diaka bafwa me vutuka na luzingu na mavimpi ya mbote mpi na kiese. Mutindu mosi, bibuti ya zola ke vandaka ti mpusa ya ngolo ya kumona diaka bana na bo ya me fwaka. Kansi Nzambi me  swaswana ti bibuti sambu yandi kele ti ngolo ya kusala mambu ya yandi ke zola.—Nkunga 135:6.

Yehowa ta pesa Mwana na yandi ngolo ya kusepedisa bantu yina me vidisaka bantu ya bo vandaka kuzola mingi. Inki mutindu Yezu ke kudiwaka ntangu bantu ke fwaka? Na ntwala ya kufutumuna Lazare, Yezu monaka mpasi yina banduku mpi bampangi ya Lazare ya bankento vandaka ti yo; yo yina yandi “basisaka mansanga.” (Yoane 11:35) Kilumbu mosi, Yezu kutanaka ti mufwidi mosi ya bwala Naini yina fwisaka mwana na yandi mosi mpamba ya bakala. Yezu “wilaka yandi mawa, mpi tubilaka yandi nde: ‘Bika kudila.’” Kukonda kusukinina, yandi futumunaka mwana na yandi ya bakala. (Luka 7:13) Yo kele pwelele nde lufwa ke pesaka Yezu mpasi ya ngolo. Yandi ta sepela mingi ntangu yandi ta pesa bantu dibaku ya kuvanda na kiese.

Keti nge me kutanaka dezia ti diambu mosi ya mpasi? Nge lenda yindula nde lufwa kele diambu mosi ya lenda mana ve. Kansi, yo ta suka ntangu Nzambi ta sadila Mwana na yandi sambu na kufutumuna bantu. Kuvila ve nde Nzambi ke zola nge mona mutindu yo ta salama. Yandi ke zola nde nge vanda ntangu lufutumuku ta salama sambu na kuyambana diaka ti bantu ya nge vandaka kuzola yina me fwaka. Yindula mutindu beto ta yidika mambu ya beto ta sala mvula na mvula na ntangu yina ata muntu mosi ve ta kabwana diaka ti muntu ya nkaka.

Lionel, muntu ya beto tubilaka na disolo ya ntete ke tuba nde: “Nsuka-nsuka, mono yantikaka kulonguka mambu ya me tala lufutumuku. Na luyantiku, mono vandaka kundima ve kibeni dilongi yai mpi mono vandaka kutudila ve longi na mono ya Biblia ntima. Na nima, mono sosaka yo na Biblia mpi monaka nde lufutumuku kele ya kieleka! Mono ke vandaka ti mpusa ya ngolo ya kumona diaka nkaka na mono ya nkento.”

Keti nge ke zola kuzaba mambu mingi? Bambangi ya Yehowa ta vanda na kiese ya kusonga nge na Biblia na nge mosi kikuma yina ke pusaka bo na kundima nde lufutumuku ta vanda. *