Mvula yai, mosi na kati ya mambu yina Bambangi ya Yehowa vandaka kuvingila ti nzala ya ngolo vandaka kutala ya Kitini 1 ya video Disolo ya Kisalu ya Yezu. Bamilio ya bantu me tala yo dezia. Video yai kele ti bitini 18. Yina vandaka kitini ya ntete. Inki kisalu bampangi-babakala mpi bankento ke sala sambu na kupesa maboko sambu bitini ya video yai kubasika mpi inki mambu nge salaka ya ke monisa nde nge mpi nge pesaka maboko sambu kisalu yina kusalama?

 Bavideo mingi ya video yai ya kulandana Disolo ya Kisalu ya Yezu, bo ke filime yo na Betele ya Australasie. a Bantu kiteso ya 50 tii na 80 ke vandaka pana ntangu bo ke filimika bampangi na ntangu bo ke sala konso kitini ya video yango. Bampangi-babakala mpi bankento ke pesaka bampangi ya ke sala madia ya midi, ya nkokila mpi bima ya nkaka ya fioti-fioti ya kudia. Bilumbu mingi na ntwala, bo ke tadilaka inki madia bo ta pesa bampangi. Mpangi Esther ke pesaka maboko na Departema ya Ke Tadilaka Bima ya Kudia. Yandi ke tuba nde: “Beto ke sumbaka bima na bantu mingi sambu na kuzwa bima ya mbote yina bo ke tulaka na madia, na ntalu ya mbote. Beto ke tadilaka mbala na mbala bima ya bo ke tulaka na kati ya madia sambu na kuvanda sire nde beto ta losa ve bima ya kudia.” Konso kilumbu, beto ke sadilaka kiteso ya 4 dolare na muntu sambu na madia.

 Bampangi ya beto ke sadila na bavideo yai mpi baekipe na beto ke vandaka ve ti mfunu ya madia mpamba kansi mpi ya lutaninu. Lutaninu na nki? Tiya (chaleur) ke vandaka mingi na Australie. Ntangu ke vandaka mpi ya ngolo. Kansi ntangu ke pesaka mpi nsemo ya mingi kibeni mpi yo ke vandaka kigonsa. Sambu na kutanina konso muntu na ntangu mpi na kulemba ve sambu tiya ke vandaka mingi, bampangi-babakala mpi bankento yina ke salaka ngolo me tulaka batenta mpi bisika yina bantu lenda kwenda kupema. Bo ke zikisaka nde bima yina bantu ke pakulaka sambu na kuditanina na ntangu (crème solaire), baparapluwi, mpi masa kele. Mpangi Kevin ya audio-vidéo ke tuba nde: “Bampangi mingi ya babakala mpi ya bankento ya ke sala kisalu yai kele bampangi ya Betele yina ke kwisaka mpi ke vutukaka. Bo ke salaka kisalu yai mpi bisalu mingi ya nkaka ti kudikulumusa mpi kiese. Beto lenda sala ve kisalu yai kukonda lusadisu na bo.”

 Kana beto filimaka bitini ya nkaka ya bavideo yai na kati ya Betele, yo vanda na kati ya stidio to ve, yo zolaka ve kuvanda mbote kibeni. Yo yina bantangu ya nkaka, ekipe fwete kwenda kisika ya nkaka. Mu mbandu, sambu na kufilime bitini ya drame yina ke monisa bisika ya ntangu ya ntama, mbala mingi ekipe ke kwendaka na bisika ya ntama yina kura ke vandaka ve, mukidi ke vandaka ve, mpi banzo bonso ya bilumbu yai ke vandaka ve. Yo ke lombaka kukanga bilele, bima ya nkaka mpi bisadilu sambu na kufilime, kunata yo mpi kubumba yo bisika yina beto ta filime. Konso mbala na ntwala ya kufilime, bampangi yina ke twadisaka bampangi ya ke sadisaka sambu na kufilime ke salaka yonso sambu bamotere (générateurs électriques), masa ya mbote ya kunwa mpi batwalete kuvanda. Bampangi ya bo ke sadila na video mpi ekipe ya ke filime ke vandaka na banzo ya mabuta ya Bambangi ya Yehowa yina kele na bisika yina. Bo ke vandaka mpi na bakamio ya ke vandaka ti kakontenere (caravanes), na otele to na bisika ya nkaka ya kuvanda.

 Kufilime na nganda ya Betele ke vandaka ntalu. Yo ke babaka ntangu mingi mpi yo lenda lembisa bantu yonso ya ke sala kisalu yai. Yo yina na 2023, Nto-kimvuka ndimaka nde beto sumba kibaka mosi buna yina beto ta sadilaka (mur vidéo pour la production virtuelle). Kibaka yango ta monisaka bavideo bonso nde bo salaka yo na nganda, mpi bizuzi ya bafilme ta monisaka bonso nde yo salamaka na kisika ya nkaka. Beto sumbaka kibaka yango na 2,5 milio ya badolare. Mayele yai ya teknolozi ke sadilaka baekra video ya ke songisaka bizuzi mbote kibeni mpi nsemo na yo ke wakanaka ti nsemo ya nganda sambu video kumonana bonso nde bo salaka yo na nganda. Yo ke sadisaka na kusadila ve mbongo mingi ntangu beto ke filime na nganda ya Betele. Mpangi Darren yina kele na Komite ya Filiale ya Australasie ke tuba nde: “Kufilime na nsadisa ya kibaka ya video ke salaka nde bampangi ya bo ke sadila na video kulemba ve mingi mpi yo ke sadisaka bampangi ya ke filime na kuvutukila bisika ya nkaka ya basikaka ve mbote. Mu mbandu, kana beto ke filime na nganda ya Betele, beto ke bakaka minuta fioti mpamba sambu na kubaka bizuzi ya kudinda ya ntangu na ntwala nde ntangu kudinda. Kansi ti kibaka ya video, beto lenda sala beto mosi bitini (scènes) mingi ya ke monisa kudinda ya ntangu tii kuna beto ta zwa kitini (scène) mosi ya kudinda ya ntangu ya mbote kibeni.”

 Kufilime konso kitini ya video Kisalu ya Yezu ke lomba baaktere mingi mpi bampangi mingi diaka sambu na ekipe ya ke sala sambu na kubasisa yo. Inki bampangi yai ke yindula sambu mambu yonso yina organizasio ke sala sambu na kulungisa bampusa na bo?

 Amber katukaka na Melbourne. Yandi salaka nzietelo ya bakilometre 700 sambu na kukwenda kupesa maboko na kisalu yina. Yandi sonikaka nde: “Kaka ntangu mono kumaka na aeropore, bampangi ya Betele lungisaka mbote bampusa na mono. Bamingi na kati na bo vandaka kubingisa mono sambu na kudia mpi kunwa ti bo. Na kisika ya beto vandaka kufilime, konso mpangi salaka yonso sambu mono vanda mbote mpi mono mona nde bo ke zolaka mono. Mono bakaka balusakumunu mingi na nzietelo yina. Yo vandaka ve ata fioti bonso kibansa!”

 Derek ke salaka na ekipe yina ke basisa video yai. Yandi ke tuba nde: “Badepartema mingi sadisaka beto banda na luyantiku. Mono ke pesa mersi mingi mutindu mono kele ti bampangi-babakala mpi bankento yina me tambika ntangu na bo, bima na bo ya kinsuni mpi ngolo na bo sambu na kisalu ya video yai. Bo ke sadisa beto. Bo kele bavolontere mpi bo kele bantu ya mawete. Ya masonga, Yehowa ke sakumuna bo. Yandi ke sakumuna beto mpi. Mono ke ndima kibeni nde yandi ke kudibanza ve kaka sambu na mbuma ya kisalu ya beto ke sala, kansi mpi sambu na mutindu yina beto ke sala yo.”

 Beto ke pesa nge mersi sambu na makabu ya nge ke pesaka, yo vanda yina nge ke pesaka na nzila ya donate.mt1130.com. Yo ke sadisa na kusala bavideo yai ya kulandana.