Bambangi ya Yehowa ke salaka kisalu mosi ya mfunu sambu na kusadisa bantu na bansi kuluta 200. Kansi na kati ya bansi yina, bansi 35 mpamba ke bakaka makabu ya me fwana ya bansi na bo sambu na kusala badepanse. Inki mutindu bansi yina ya nkaka ke salaka badepanse na bo?

 Nto-Kimvuka ya Bambangi ya Yehowa ke tadilaka mambu yina Bambangi ya Yehowa na ntoto ya mvimba kele ti yo mfunu sambu na kusambila Yehowa mpi kulonga nsangu ya mbote. Bo ke yidikaka mbongo mpi ke sadilaka yo na mutindu ya mbote. Kana Betele mosi me zwa mbongo mingi kuluta yina bo kele ti yo mfunu sambu na kulungisa bampusa yina na teritware na bo, bo ke yidikaka mbongo yina me bikala na zulu sambu na kusadisa bampangi ya insi yina kele ve ti mbongo ya kufwana. Bo me yidikaka mambu yai na kutadila mutindu Bakristu ya mvu-nkama ya ntete vandaka kusala mambu. Bakristu yango yidikaka mambu sambu na kusadisana na nzila ya bima yina bo vandaka na yo sambu na kufika bima yina Bakristu ya nkaka kondaka. (2 Bakorinto 8:14) Bo vandaka kusadila bima yina bo vandaka ti yo mingi sambu na kufika dibulu ya bima yina Bakristu ya nkaka vandaka ve ti yo.

 Inki mutindu bampangi na beto yina ke bakaka mbongo ya ke katukaka na Babetele ya nkaka ke kudiwaka? Mu mbandu na Tanzanie, insi yina bantu mingi ke sadilaka kaka badolare zole sambu na kusala badepanse konso kilumbu, mbongo yina Babetele ya nkaka tindaka sadisaka bo na kuyidika Nzo ya Kimfumu yina Dibundu ya Mafinga ke sadilaka. Bampangi ya dibundu yina sonikaka nde: “Banda bo me yidikaka Nzo ya Kimfumu na beto, bantu me kumaka kukwisa mingi na balukutakanu. Beto ke pesa organizasio ya Yehowa mpi bampangi mersi mingi sambu na kikalulu na bo ya kukaba, yo me sadisa beto kuzwa kisika yai ya kitoko sambu na kusambila.”

 Bampangi na beto ya nkaka na Sri Lanka kondaka bima ya kudia sambu na maladi ya coronavirus yina panzanaka na ntoto ya mvimba. Fernando Imara ti mwana na yandi ya bakala Enosh vandaka na kati ya bampangi yango. Na nsadisa ya makabu yina katukaka na bansi ya nkaka, bo bakaka bima yina bo vandaka ti yo mfunu. Bo salaka karti mosi mpi bo sonikaka nde: “Beto ke pesa bampangi mersi mutindu na ntangu yai ya mpasi bo me monisaka nde bo ke zolaka beto. Beto kele kibeni na kiese ya kuvanda na kati ya dibuta ya mutindu yai, mpi beto ke landa kusamba Yehowa sambu yandi kusadisa bampangi na beto yonso na bilumbu yai ya nsuka.”

 Konso kisika yina bampangi na beto ya babakala mpi bankento kele, bo ke vandaka ti mpusa ya ngolo ya kukabisa ti bampangi ya nkaka bima yina bo kele ti yo. Mu mbandu, Enosh me salaka kakesi mosi yina yandi ke tulaka mbongo sambu yo sadisa yandi mpi na kupesa makabu sambu na kusadisa mabuta yina kele ti mfunu ya lusadisu. Mpangi-nkento Guadalupe Álvarez ke salaka mpi mutindu mosi. Yandi ke zingaka na kartie mosi na Mexique. Kuna bantu fioti mpamba ke bakaka salere ya fioti to nkutu bo ke bakaka yo ve. Ata mpidina, yandi ke pesaka makabu na kiteso yina makuki na yandi ke pesaka yandi nzila. Yandi me sonika nde: “Mono ke pesa Yehowa mersi sambu na ntima ya mbote na yandi mpi zola na yandi ya kwikama. Mono me zaba nde bo ta yika makabu na mono na zulu ya makabu ya bampangi ya nkaka mpi yo ta sadisa bampangi na mono yina kele ti mfunu ya lusadisu.”

 Babetele yina ke tindaka mbongo na bisika yina mpusa kele ke vandaka na kiese ya kusala yo. Mpangi Antony Carvalho yina kele na Komite ya Filiale ya Brésil ke tuba nde: “Banda bamvula mingi, mambu ya beto ke salaka na insi na beto vandaka kulomba nde bampangi ya bansi ya nkaka kusadisa beto na mbongo. Lusadisu yango me salaka nde beto mona kuyela ya mingi. Bubu yai, mambu ya me tala mbongo awa na beto me sobaka. Ntangu yai beto kele ti dibaku ya kusadisa bampangi ya nkaka. Bampangi na beto awa na Brésil ke talaka mutindu kisalu ya kulonga nsangu ya mbote ke salamaka na ntoto ya mvimba mpi bo ke monaka mambu yina bo lenda sala sambu na kusadisa bampangi.”

 Inki ke salaka nde Bambangi ya Yehowa kusadisa mbote bampangi na bo ya babakala mpi ya bankento yina kele ti mfunu ya lusadisu? Yo kele ve nde bo ke tindaka mbala mosi mbongo na Babetele ya nkaka, kansi bo ke tulaka makabu sambu na kisalu yina ke salama na ntoto ya mvimba. Bo ke tulaka makabu yango na kesi ya makabu yina kele na dibundu mpi ya bo me sonikaka na zulu nde “Oeuvre Mondiale” to bo ke salaka yo na nzila ya Internet na donate.mt1130.com. Beto ke pesa bampangi mersi mingi sambu na makabu yina.