BAKRISTU mingi kibeni ke salaka ve feti ya Noel. Inki mutindu bo ke kudiwaka sambu na lukanu yai ya bo me bakaka? Keti bo ke kudiyangisaka nde bo me konda kima mosi ya mfunu? Keti bana na bo ke kudiwaka mpi mutindu yina? Beto landa mambu yina Bambangi ya Yehowa ya ntoto ya mvimba ke tuba.

Bo ke zwaka mabaku ya mbote ya kuyibuka lufwa ya Yezu Kristu: “Na ntwala nde mono kuma Mbangi ya Yehowa, mono vandaka kukwenda kibeni ve na eglize. Mono vandaka kukwenda mingi-mingi na feti ya Noel to ya Paki. Ata mpidina, mono vandaka kibeni ve kuyindula mambu yina Yezu Kristu me sadilaka beto. Bubu yai, mono ke salaka diaka ve feti ya Noel kansi mono ke kwendaka na balukutakanu ya dibundu mbala zole konso mposo mpi mono ke longaka nkutu bantu ya nkaka mambu yina Biblia ke tubaka sambu na Yezu!”—EVE NA AUSTRALIE.

Bo ke zwaka mabaku ya mbote ya kukabila bantu ya nkaka: “Mono ke waka kiese mingi ntangu bantu ke pesaka mono bakado yina mono yindulaka ve. Mono ke sepelaka mingi kana bo me pesa mono kima mosi na ntangu yina mono yindulaka ve ata fioti! Mono ke sadilaka mpi bantu ya nkaka bakarti ti bifwanisu sambu yo ke pesaka bo ti mono mosi kiese mingi mpenza.”—REUBEN NA IRLANDE DU NORD.

Bo ke zwaka mabaku ya mbote ya kusadisa bantu ya kele na mpasi: “Beto ke sepelaka kulambila bantu ya ke bela. Bantangu ya nkaka, beto ke natilaka bo bintuntu, bagato to mpi kado mosi ya fioti sambu yo sadisa bo na kudiwa mbote. Beto ke sepelaka kusala mambu yai sambu yo ke sadisaka beto na kukwenda kutala bo na konso ntangu ya beto me zola.”—EMILY NA AUSTRALIE.

Bo ke zwaka mabaku ya mbote ya kulutisa ntangu ti bampangi na bo ya dibuta: “Ntangu beto ke vukanaka ti bampangi na beto ya dibuta, bana na beto ke sepelaka kulutisa ntangu ya kiese ti bangwasi, bamama-leki, bamama-mbuta, batata-nkento, ba-nkaka mpi bisoni na bo. Beto ke kudiyangisaka mpenza ve sambu beto ke vingilaka ve kaka badati ya bafeti sambu na kusala mambu yai mpi bampangi na beto ya dibuta ke zabaka nde beto ke kwendaka kutala bo sambu beto ke zolaka bo.”—WENDY NA ÎLES CAÏMANS.

Bo ke zwaka ngemba: “Na feti ya Noel, yo ke monanaka bonso nde mambu ya kusala ke vandaka mingi mpenza yo yina bantu fioti mpamba ke yindulaka mutindu ya kuzwa ngemba. Mono me longukaka mambu yina Biblia ke silaka bantu sambu na bilumbu ke kwisa mpi yo ke sadisaka mono na kuzwa ngemba. Mono ke zabaka nde bana na mono ta vanda ti luzingu ya mbote na bilumbu ke kwisa.”—SANDRA NA ESPAGNE.