Timoteo vandaka leke ya bakala ya dibundu ya Listre. Tata na yandi vandaka Mugreki, mpi mama na yandi Muyuda. Mama na yandi Enise, mpi nkaka na yandi Loisi longaka yandi mambu ya me tala Yehowa banda na buleke na yandi.

Ntangu Polo kwendaka na Listre na nzietelo na yandi ya zole ya kulonga, yandi monaka nde Timoteo vandaka kuzola bampangi mpi vandaka ti nzala ya kusadisa bo. Polo lombaka Timoteo na kusala nzietelo ti yandi. Na nima, Polo pesaka Timoteo formasio sambu yandi vanda nsamuni mpi longi ya mbote ya nsangu ya mbote.

Mpeve santu vandaka kutwadisa Polo ti Timoteo bisika yonso yina bo vandaka kukwenda. Na mpimpa, na mbona-meso, bakala mosi songaka Polo na kukwenda na Masedonia mpi na kusadisa bo. Yo yina, Polo, Timoteo, Silasi, mpi Luka kwendaka kuna sambu na kusamuna mpi kukangula mabundu.

Na Tesalonika, mbanza mosi ya Masedonia, babakala mpi bankento mingi kumaka Bakristu. Kansi Bayuda ya nkaka wilaka Polo ti banduku na yandi kimpala. Bo vukisaka kimvuka ya bantu mpi bo nataka bampangi yai na bamfumu ya mbanza; bo tubaka na ndinga ya ngolo nde: ‘Bantu yai kele bambeni ya guvernema ya Roma!’ Luzingu ya Polo mpi ya Timoteo vandaka na kigonsa, yo yina bo tinaka na mpimpa na Berea.

Bantu ya Berea vandaka ti nzala ya ngolo ya kulonguka nsangu ya mbote, mpi Bayuda ti Bagreki kumaka Bakristu kuna. Kansi ntangu Bayuda ya nkaka yina katukaka na Tesalonika kwisaka mpi tulaka mavwanga, Polo kwendaka na Atene. Timoteo ti Silasi bikalaka na Berea sambu na kupesa bampangi kikesa. Na nima, Polo tindaka Timoteo na Tesalonika sambu na kusadisa bampangi na kunwana ti mbangika ya ngolo. Polo tindaka diaka Timoteo na kukwenda kutala mabundu ya nkaka mpi kupesa bo kikesa.

 Polo songaka Timoteo nde: ‘Bantu yina ke zola kusadila Yehowa, bo ta monisa bo mpasi.’ Bo monisaka Timoteo mpasi mpi bo tulaka yandi na boloko sambu na lukwikilu na yandi. Yandi vandaka na kiese sambu yandi vandaka ti dibaku ya kumonisa kwikama na yandi na Yehowa.

Polo songaka Bafilipi nde: ‘Mono ke tindila beno Timoteo. Yandi ta longa beno ntendula ya kutambula na kieleka, mpi yandi ta pesa beno formasio na kisalu ya kusamuna.’ Polo zabaka nde yandi lenda tudila Timoteo ntima. Bo salaka kumosi bonso banduku mpi bansadi na nsungi ya bamvula mingi.