Ve. Biblia ke tubaka na pwelele yonso nde Nzambi muntu gangaka bantu mpi “mitindu” yonso ya bambisi mpi ya banti. (Kuyantika 1:12, 21, 25, 27; Kusonga 4:11) Yo ke tubaka nde bantu yonso me katukaka na Adami ti Eva, bibuti na beto ya ntete. (Kuyantika 3:20; 4:1) Biblia ke monisaka ve nde Nzambi sadilaka evolisio (dilongi ya ke tubaka nde bima kudibasikilaka) sambu na kusala bima yonso ya ke zingaka. Kansi diambu ya kieleka kele nde, Biblia ke buyaka ve mutindu bantu ya siansi ke tubaka nde mitindu yonso ya bima lenda soba na kutadila mitindu na yo.

•  Bantu ya nkaka ke tubaka nki?

•  Keti Biblia ke ndimaka dilongi ya evolisio?

•  Inki beto lenda tuba na mpila banti mpi bambisi ke sobaka sambu bo landa kuzinga mbote na kisika yina bo kele?

 Bantu ya ke tubaka nde Nzambi sadilaka evolisio sambu na kusala luzingu ke vandaka ve na bangindu ya mpila mosi sambu na mutindu Nzambi salaka yo. Mukanda mosi (Encyclopedia Britannica) ke tuba nde bantu mingi ke ndimaka nde “Nzambi ke sadilaka kaka banti to bambisi ya me yikana ti kisika yo ke zingaka mpi ya ke butaka dezia sambu na kutwadisa bima ya kele na ntoto.”

 Yai kele mwa mambu yina bantu ya ke ndimaka dilongi ya evolisio ke kwikilaka:

•   Bima yonso ya ke zingaka me katuka na bankaka ya mutindu mosi ya zingaka ntama mpenza.

•   Kima mosi ya ke zingaka lenda soba mpi kukuma kima ya mutindu ya nkaka.

•   Yo lenda vanda nde Nzambi muntu ke salaka nde mambu kusalama mutindu yai.

 Bantu ya ke tubaka nde Nzambi sadilaka evolisio sambu na kusala luzingu, ke tubaka nde disolo ya Biblia ya kele na mukanda ya Kuyantika kele mpenza ve ya masonga. Kansi, Yezu monisaka nde masolo ya kele na mukanda ya Kuyantika kele ya kieleka. (Kuyantika 1:26, 27; 2:18-24; Matayo 19:4-6) Biblia ke tubaka nde na ntwala nde Yezu kukwisa na ntoto yandi vandaka kuzinga na zulu ti Nzambi mpi yandi sadisaka Nzambi na kuganga “bima yonso.” (Yoane 1:3) Yo yina, kutuba nde Nzambi sadilaka evolisio sambu na kusala bima yonso ya ke zingaka ke wakana ve ti malongi ya Biblia.

 Biblia ke tubilaka ve mpila mitindu ya bima ya ke zingaka lenda soba. Kansi yo ke buyaka mpi ve mutindu bantu ya siansi ke tubaka nde bambisi mpi banti ya mitindu yonso ya Nzambi me salaka lenda sobaka ntangu yo ke butaka to yo lenda yikana ti bisika yina yo ke zinga. Ata bantu ya nkaka ke tadilaka mutindu bima yai ke sobaka bonso evolisio, kansi yo ke butaka ve bima ya mpa ya mitindu ya nkaka.