Beto lenda kudiyula ngiufula yai na mitindu mingi, mu mbandu: Sambu na nki beto kele na ntoto? To Sambu na nki beto ke zingaka? Biblia ke tubaka nde beto ke zingaka sambu na kusala kinduku ti Nzambi. Beto tadila mwa malongi ya mfunu ya Biblia:

•   Nzambi muntu salaka beto. Biblia ke tuba nde: “[Nzambi] muntu salaka beto, mpi beto kele bantu na yandi.”—Nkunga 100:3; Kusonga 4:11.

•   Nzambi ke vandaka ti kikuma mosi yina pusaka yandi na kusala bima yonso ti beto mpi.—Yezaya 45:18.

•   Nzambi salaka beto ti “nzala ya mambu ya [Nzambi],” mu mbandu nzala ya kuzaba sambu na nki beto kele na luzingu. (Matayo 5:3) Yandi ke zolaka nde beto lungisa nzala na beto yai.—Nkunga 145:16.

•   Beto ke lungisaka nzala na beto ya mambu ya Nzambi kana beto ke sala kinduku ti yandi. Bantu ya nkaka ke tubaka nde bantu lenda kuma ve ata fioti banduku ya Nzambi. Ata mpidina, Biblia ke songaka beto mambu yai ya ke pesa kikesa: “Beno kwenda pene-pene na Nzambi, ebuna yandi ta kwisa pene-pene na beno.”—Yakobo 4:8; 2:23.

•   Sambu beto kuma banduku ya Nzambi, beto fwete zinga mutindu yandi ke zolaka. Na Longi 12:13, Biblia ke tuba nde: “Zitisa Nzambi, lemfuka na bansiku na yandi, sambu yai kele kisina ya Nzambi me sadilaka muntu.”—Bible en Kituba.

•   Na bilumbu ke kwisa, beto ta kuma kuzinga mpenza mutindu Nzambi zolaka ntete nde bantu kuzinga ntangu yandi salaka muntu. Nzambi ta katula bampasi mpi ta pesa luzingu ya mvula na mvula na banduku na yandi yonso, disongidila bantu yina ke sambilaka yandi.—Nkunga 37:10, 11.