“Mono ke bikila beno ngemba; mono ke pesa beno ngemba na mono. Mono ke pesa beno yo ve mutindu nsi-ntoto ke pesaka. Beno bika ve nde bantima na beno kukuma kisaka-saka mpi beno bika ve nde yo lemba sambu na boma.”—Yoane 14:27, Mbalula ya Nsi-Ntoto ya Mpa.

 “Mono ke bikila beno ngemba, ngemba ya mono ke pesa beno kele ya mono mosi. Mono ke pesa beno yo ve mutindu bantu ya nsi-ntoto yai ke pesaka. Beno vanda ntima na zulu ve, beno wa boma ve.”—Yoane 14:27, Bible en Kituba.

 Na bangogo yina, Yezu ndimisaka balongoki na yandi nde bo fwete kudiyangisa ve kuluta ndilu kana bo me kutana ti bampasi. Bonso yandi, bo lendaka kuvanda ti ngemba ya kati kana Nzambi me sadisa bo.

 Ngemba ya nki mutindu Yezu pesaka to bikilaka bantumwa na yandi? Yezu pesaka bo ngemba na yandi, disongidila, ngemba ya mutindu mosi ti yina yandi vandaka na yo. Ngemba yai vandaka ve ngemba yina bantu ke vandaka na yo kana bitumba to bampasi kele ve. (Yoane 15:20; 16:33) Ata bantu sadilaka Yezu mambu ya nku yina sukaka na lufwa na yandi, yandi vandaka ti ngemba ya mabanza mpi ya ntima. (Luka 23:27, 28, 32-34; 1 Piere 2:23) Yandi vandaka ti ngemba ya kati sambu yandi zabaka nde Yehowa, a Tata na yandi, vandaka kuzola yandi mpi kundima yandi.—Matayo 3:16, 17.

 Yezu pesaka bantumwa na yandi ngemba na mutindu yandi ndimisaka bo nde yandi ti Tata na yandi vandaka kuzola bo mpi kundima bo. (Yoane 14:23; 15:9, 10; Baroma 5:1) Ngemba yai ya vandaka kukatuka na mutindu bo vandaka kukwikila nde Yezu kele Mwana ya Nzambi, sadisaka na kulembika boma na bo mpi basusi na bo. (Yoane 14:1) Ata Yezu zolaka kuvanda diaka ve kimuntu-kimuntu ti bo, yandi silaka nde mpeve santu ya Nzambi ta sadisa bo na kuditudila ntima mpi na kuvanda ti ngemba ya kati. (Yoane 14:25-27) Balongoki ya Yezu lendaka kuvanda ti kikesa ntangu bo ke nwana ti mambu ya mpasi, sambu bo vandaka kuzaba nde Yehowa vandaka kundima bo mpi kusadisa bo.—Baebreo 13:6.

 Ntangu Yezu vandaka na ntoto, bantu vandaka ti kikalulu ya kuzodilana ngemba ntangu bo vandaka kupesana mbote. (Matayo 10:12) Kansi, Yezu zodilaka ve bantumwa na yandi ngemba; yandi pesaka bo ngemba. Diaka, ngemba yina Yezu pesaka bo me swaswana ti ngemba yonso yina nsi-ntoto b lenda pesa. Nsi-ntoto lenda pesa ndambu ya ngemba na nzila ya banduku, bimvwama, lukumu, to kiyeka. Kansi ngemba ya Yezu ke katukaka ve na bima yina kele na nganda ya nitu. Yo kele ngemba ya kati mpi ya ke zingaka mingi.

 Yezu songaka bantumwa na yandi ya kwikama mambu yai na mpimpa ya nsuka na ntwala nde yandi fwa. Na mpimpa yina, yandi songaka bo nde yandi ta yambula bo ntama mingi ve. (Yoane 13:33, 36) Diambu yai pesaka bo mpasi. (Yoane 16:6) Yo yina, Yezu bwisaka bo ntima; yandi songaka bo bikuma ya bo fwete kuma ve kisaka-saka sambu yandi ke yambula bo.

 Mambu ya Yezu tubaka lenda pesa mpi Bakristu ya bubu kikesa. Beto mpi lenda vanda na ngemba. (2 Batesalonika 3:16) Ntangu beto kumaka balongoki ya Yezu, beto longukaka nde Yezu mpi Yehowa, Tata na yandi, ke zolaka beto mpi ke ndimaka beto. (Bakolosai 3:15; 1 Yoane 4:16) Yo yina, beto fwete kudiyangisa ve kuluta ndilu. Sambu na nki? Sambu Nzambi kele na lweka na beto.—Nkunga 118:6; Bafilipi 4:6, 7; 2 Piere 1:2.

 Tala video yai ya nkufi sambu na kumona na bunkufi mambu yina kele na mukanda ya Yoane.