NTENDULA YA BAVERSE YA BIBLIA

Yezaya 42:8—“Mono muntu kele MFUMU NZAMBI”

TALA NA

“Mono kele Yehowa. Yo yina zina na mono; mono ke pesaka ve nkembo na mono na muntu ya nkaka, mono ke pesaka mpi ve lukumu na mono na biteki.”—Yezaya 42:8, Mbalula ya Nsi-Ntoto ya Mpa.

“Mono muntu kele MFUMU NZAMBI, yo yina zina na mono! Lukumu na mono, mono ta pesa yo ve na nzambi ya nkaka, ata na biteki mpi ve!”—Yezaya 42:8, Bible en Kituba.

Ntendula ya Yezaya 42:8

Nzambi ke songa beto zina na yandi mpi yandi ke songa beto nde beto fwete pesa ve nkembo to lukumu na biteki.

Nzambi kudipesaka zina yina yandi mosi; mbala mingi bo ke balulaka yo “Yehowa” na Kikongo. a (Kubasika 3:14, 15) Ata zina ya Nzambi kele mbala kiteso ya 7 000 na Kuwakana ya Ntama (Masonuku ya Kiebreo mpi ya Kiarameye), bambalula mingi ya Biblia ke yingisaka yo na titre “MFUMU NZAMBI” (na bisono ya nene). Mu mbandu na Nkunga 110:1, yina ke mbikudulu ya ke tubila Yehowa mpi Yezu. Na Bible en Kituba, bo me balula yo mutindu yai: “MFUMU NZAMBI [Yehowa] tubilaka Mfumu na mono [Yezu].” (Bisalu 2:34-36) Mbalula ya Nsi-Ntoto ya Mpa ke sadisa beto na kubakisa mbote luswaswanu ya kele na kati ya “bamfumu” yina zole na mutindu yo ke sadila zina ya Nzambi na kisika yina yo fwete vanda. Yo ke tuba nde: “Yehowa tubilaka Mfumu na mono nde: ‘Vanda na diboko na mono ya kitata tii kuna mono ta tula bambeni na nge bonso kazune sambu na makulu na nge.’”

Bantu mingi ya mayele ke yindulaka nde zina ya Nzambi ke tendula “Yandi Ke Kumisaka.” Zina yai me fwana kaka na Nzambi mosi kaka ya kieleka, sambu yandi mpamba lenda sala nde yandi mosi to lugangu na yandi kukuma konso kima yina ke mfunu sambu na kulungisa lukanu na yandi.

Sambu yandi kele Ngangi na beto mpi Nzambi mosi kaka ya kieleka, yo me fwana nde beto sambila kaka Yehowa mpamba. Beto fwete sambila ve ata muntu to kima mosi; diambu yai ke tadila mpi bifwanisu ti biteki.—Kubasika 20:2-6; 34:14; 1 Yoane 5:21.

Mambu Yina Bo Ke tubila na Baverse ya Kele na Ntwala mpi na Nima ya Yezaya 42:8

Na baverse ya luyantiku ya Yezaya kapu 42, Yehowa ke tubila kisalu ya ‘muntu yina yandi me solaka.’ Nzambi ke tuba nde, nsadi yai ya yandi ke ndimaka, “ta tula lunungu na makanda.” (Yezaya 42:1) Nzambi ke tuba mambu yai sambu na lusilu yina: “Ntangu yai mono ke zabisa mambu ya mpa. Na ntwala nde yo yantika, mono ke songa beno yo.” (Yezaya 42:9) Mbikudulu ya ke tadila “muntu ya Nzambi me solaka’ yantikaka, to lunganaka, bamvula mingi na nima ntangu Mesia, to Kristu, kwisaka mpi salaka kisalu na yandi ya kulonga awa na ntoto.—Matayo 3:16, 17; 12:15-21.

Yezaya 42:8 na Bambalula ya Nkaka

“Mono kele Yehowa, yina kele zina na mono; mpi mono ta pesa ve nkembo na mono na muntu ya nkaka, to lukumu na mono na biteki.”—The ‘Holy Scriptures,’ by J. N. Darby.

“Mono kele Yehowa; yina kele zina na Mono; mpi mono ta pesa ve nkembo na Mono na muntu ya nkaka, to lukumu na Mono na biteki.”—A Literal Translation of the Bible.

a Na Kiebreo, zina ya Nzambi kele bisono iya (ba consonnes iya); mbala mingi na Kikongo bo ke sonikaka yo nde YHWH. Bambalula ya nkaka ya Kikongo ke balulaka zina ya Nzambi nde “Yahweh.” Sambu na kuzaba mambu mingi, tala Bangindu ya Ngika A4 “Zina ya Nzambi na Masonuku ya Kiebreo” na Biblia—Mbalula ya Nsi-Ntoto ya Mpa.