Ka Jingtip kaba Pynjan ïa Ngi sha U Blei
U Nongthaw jong ngi um dei uba don tang ka bor, hynrei u don shibun ki jinglong kiba itynnad bad kiba sngewieid. U kwah ïa ngi ban tip shaphang jong u bad ban long ki paralok jong u. (Ïoannis 17:3; Jakob 4:8) Na kata ka daw u la ïathuh shibun kiei kiei shaphang lade.
U Nongthaw jong ngi u Don la ka jong ka Kyrteng
“Khnang ba kin ïoh tip ba tang ma me hi, uba ka kyrteng jong me long U Jehobah, U Bahakhlieh tam eh halor ka khyndew baroh.”—SALM 83:18.
Ka Baibl ka hikai ba U Jehobah u long U Blei bashisha marwei. U long u Nongthaw jong ka jingim bad kiei kiei baroh. Dei tang ma u uba don hok ban ïoh ïa ka jingmane jong ngi.—Jingpynpaw 4:11.
U Jehobah u long u Blei uba Ieid
“U Blei u long ka jingieid.”—1 ÏOANNIS 4:8.
U Jehobah u pyndonkam ïa ki jingthaw jong u bad ïa ka Baibl ban hikai ïa ngi shaphang ki jinglong jong u. Ka jingieid ka dei ka jinglong kaba kongsan tam jong u. Kaei kaei kaba u leh ka dei namar ka jingieid. Katba ngi nang pule shaphang U Jehobah katta ngin nang ieid ïa u.
U Jehobah u long u Blei uba kloi ban Map
“Me long U Blei uba kloi ban map.”—NEHEMAÏAH 9:17.
U Jehobah u tip ba ngi long kibym janai. Te u “kloi ban map” ïa ngi. Lada ngi pan map na u bad pyrshang katba lah ban ym leh shuh ïa kabym dei, un map ïa ngi bad un ym pynshitom ïa ngi namar ki pop jong ngi.—Salm 103:12, 13.
U Jehobah u kwah ba ngin Duwai ha U
“U Jehobah u long hajan kita baroh kiba khot kyrpad ïa u . . . U sngew ïa ka jinglynniar jong ki.”—SALM 145:18, 19.
U Jehobah um donkam ïa ki jinglehniam bakyrpang ne ban pyndonkam da ki dur ne kiei kiei ban mane ïa u. U sngap ïa ki jingduwai jong ngi kumba ki kmei ki kpa ki sngap ïa la ki khun baieid jong ki.
