Aca, Aira a Jehova ti gĩkundi kĩa nyamũkano. Handũ ha ũguo, tũrĩ Akristiano merutanagĩria kũrũmĩrĩra kĩonereria kĩa Jesu Kristo na gũtũũra kũringana na morutani make.

 Ciugo “gĩkundi kĩa nyamũkano” citaũkĩkaga na njĩra itiganĩte harĩ andũ mwanya mwanya. Ona kũrĩ ũguo, reke twĩcirie maũndũ merĩ andũ maugaga kwerekera ikundi cia nyamũkano, na tuone nĩkĩ ithuĩ tũtikoragwo na maũndũ ta macio.

•   Andũ amwe maugaga atĩ gĩkundi kĩa nyamũkano nĩ ndini njerũ kana ĩkaga maũndũ matarĩ metĩkĩrĩku. Aira a Jehova matiaambĩrĩirie ndini njerũ. Ngũrani na ũguo, tũrũmagĩrĩra kĩonereria kĩa Akristiano a tene ũthathaiya-inĩ witũ, arĩa kĩonereria kĩao, o hamwe na morutani mao ikoragwo ciandĩkĩtwo Bibilia-inĩ. (2 Timotheo 3:16, 17) Twĩtĩkĩtie atĩ Maandĩko Matheru nĩmo magĩrĩirũo kuonania maũndũ marĩa metĩkĩrĩku ũthathaiya-inĩ.

•   Andũ amwe maugaga gĩkundi kĩa nyamũkano nĩ ndini ĩkoragwo ĩrĩ ũgwati na ĩtongoragio nĩ mũndũ. Aira a Jehova matikoragwo na mũndũ ũmatongoragia. Handũ ha ũguo, twathĩkagĩra ũtongoria ũrĩa Jesu aaheire arũmĩrĩri ake rĩrĩa ooigire: “Mũtongoria wanyu nĩ ũmwe, nĩwe Kristo.”—Mathayo 23:10.

 Ngũrani na ũguo kwĩragwo atĩ Aira a Jehova nĩ gĩkundi kĩa nyamũkano gĩkoragwo kĩrĩ ũgwati, o mekaga maũndũ ma kũmaguna na kũguna andũ arĩa angĩ. Kwa ngerekano, ũtungata witũ nĩ ũteithĩtie andũ aingĩ gũtiga mĩtugo mĩũru ta kũhũthĩra ndawa cia kũrebia na kũnyua njohi. Makĩria ma ũguo nĩ tũkoragwo na irathi cia gũthomithia andũ ngiri nyingĩ arĩa matoĩ gũthoma na kwandĩka. Ningĩ nĩ tũteithagĩrĩria kũrĩa kwagĩa na icanjama. Nĩ twĩrutanagĩria gũkorũo tũrĩ kĩonereria kĩega harĩ andũ arĩa angĩ, o ta ũrĩa Jesu aathire arũmĩrĩri ake mekage.—Mathayo 5:13-16.