KĨŨRIA GĨA 6
Nĩ Maũndũ Marĩkũ Bibilia yarathĩte Megiĩ Mesia?
ŨRATHI
“Nawe, Bethilehemu Efiratha, . . . kuuma harĩ wee nĩ gũkooimĩra ũrĩa ũgaathana thĩinĩ wa Isiraeli nĩ ũndũ wakwa.”
KŨHINGA
“Thutha wa Jesu gũciarĩrũo Bethilehemu ya Judea matukũ-inĩ ma mũthamaki Herode, atuĩria a njata kuuma mwena wa Irathĩro magĩũka Jerusalemu.”
ŨRATHI
“Magayanaga nguo ciakwa, na magacukĩra nguo yakwa mĩtĩ.”
KŨHINGA
“Hĩndĩ ĩrĩa thigari ciamũhũũrĩrĩire mũtĩ-inĩ na mĩcumarĩ, ikĩoya nguo ciake cia igũrũ na igĩcigayania maita mana . . . No nguo ĩyo ya thĩinĩ ndĩarĩ na rũtumo, yarĩ gĩtambaya kĩmwe kuuma igũrũ nginya thĩ. Kwoguo thigari ikĩĩrana atĩrĩ: ‘Tũtikamĩtinangie, no rekei tũmĩcukĩre mĩtĩ nĩguo tũmenye ĩgũtuĩka ya ũ.’”
ŨRATHI
“Nĩ agitagĩra mahĩndĩ make mothe; gũtirĩ o na rĩmwe riunĩtwo.”
KŨHINGA
“Rĩrĩa ciakinyire harĩ Jesu, ikĩona atĩ nĩ akuĩte, kwoguo itiamunire magũrũ.”
ŨRATHI
“Aathecirũo nĩ ũndũ wa mehia maitũ.”
KŨHINGA
“Mũthigari ũmwe akĩmũtheca mbaru-inĩ na itimũ, na o rĩo thakame na maĩ ikiuma.”
ŨRATHI
“Makĩndĩha mũcara wakwa, icunjĩ 30 cia betha.”
KŨHINGA
“Thutha ũcio ũmwe wa arĩa Ikũmi na Erĩ, ũrĩa wetagwo Judasi Mũisikariota, agĩthiĩ kũrĩ anene a athĩnjĩri-Ngai akĩmoria: ‘Mũkũhe kĩĩ nĩguo ndĩmũkunyanĩre harĩ inyuĩ?’ Nao makĩmwĩrĩra icunjĩ 30 cia betha.”
