Marũa ma Kerĩ ma Petero 1:1-21
1 Nĩ niĩ Simoni Petero, ngombo na mũtũmwo wa Jesu Kristo, kũrĩ arĩa magĩĩte na wĩtĩkio wa goro o ta witũ* kũgerera ũthingu wa Ngai witũ na Mũhonokia Jesu Kristo:
2 Mũroingĩhĩrũo nĩ ũtugi mũnene na thayũ kũgerera ũmenyo wa ma+ wĩgiĩ Ngai na wĩgiĩ Jesu Mwathani witũ,
3 nĩ gũkorũo hinya wake wa ũngai nĩ ũtũheete* maũndũ mothe marĩa marehaga muoyo na wĩrutĩri Ngai kũgerera ũmenyo wa ma wĩgiĩ Ũrĩa watwĩtire+ kũgerera riri o na wega wake mwene.
4 Nĩ ũndũ wa maũndũ macio nĩ atũheete* ciĩranĩro cia goro na cia magegania mũno,+ nĩguo kũgerera harĩ cio mũkaanyitanĩra harĩ kũgĩa mũhianĩre wa ũngai,+ thutha wa kũhonoka kuumana na maũndũ marĩa mathũku ma thĩ marĩa marehagwo nĩ merirĩria moru.*
5 Nĩ ũndũ wa gĩtũmi kĩu, mwĩrutanĩriei biũ+ kuongerera ngumo ya wega harĩ wĩtĩkio wanyu,+ na harĩ wega ũcio wanyu muongerere ũmenyo,+
6 harĩ ũmenyo wanyu muongerere kwĩgirĩrĩria,+ na harĩ kwĩgirĩrĩria kwanyu muongerere ũkirĩrĩria, harĩ ũkirĩrĩria wanyu muongerere wĩrutĩri Ngai,+
7 harĩ wĩrutĩri wanyu harĩ Ngai muongerere wendo ta wa andũ a nyina ũmwe, harĩ wendo wanyu ta wa andũ a nyina ũmwe muongerere wendo kwerekera andũ othe.+
8 Tondũ mũngĩkorũo na maũndũ macio na mũiyũrĩrĩrũo nĩmo, nĩ mekũmũgirĩrĩria mũtikagũtare kana mwage kũgĩa na maciaro+ ũhoro-inĩ wĩgiĩ ũmenyo wa ma wĩgiĩ Mwathani witũ Jesu Kristo.
9 Nĩ gũkorũo mũndũ o wothe wagĩte maũndũ macio nĩ mũtumumu, akahinga maitho make ndakone ũtheri,*+ na nĩ ariganĩirũo nĩ ũrĩa aatheririo mehia make+ marĩa eekĩte tene.
10 Nĩ ũndũ ũcio ariũ a Ithe witũ-rĩ, mwĩrutanĩriei o na makĩria nĩguo mwĩkĩre hinya gwĩtwo+ o na gũthuurũo kwanyu, tondũ mũngĩthiĩ na mbere gwĩka maũndũ macio, gũtirĩ hĩndĩ mũgaatoorio.+
11 Na njĩra ĩyo nĩ mũkaaheo kĩrathimo kĩnene gĩa gũtonya thĩinĩ wa Ũthamaki wa tene na tene+ wa Mwathani na Mũhonokia witũ Jesu Kristo.+
12 Nĩ ũndũ wa gĩtũmi kĩu, nĩ nyendaga kũmũririkania maũndũ macio hingo ciothe, o na gũtuĩka nĩ mũmoĩ na nĩ mwĩhandĩte wega ũhoro-inĩ wa ma ũrĩa ũrĩ thĩinĩ wanyu.
13 No nyonaga ũrĩ ũndũ mwagĩrĩru kũmwarahũraga na iririkania+ hĩndĩ ĩrĩa yothe ndĩ thĩinĩ wa hema ĩno,*+
14 ngĩmenyaga atĩ hema ĩno yakwa nĩ ĩkweherio ica ikuhĩ, o ta ũrĩa nake Mwathani witũ Jesu Kristo aanyonirie wega.+
15 Hingo ciothe ndĩrĩkaga ũrĩa wothe ingĩhota nĩguo ndarĩkia kwehera, mũkaahota kũririkana* maũndũ maya.
16 Aca, tũtiamũmenyithirie ũhoro wa hinya na gũkorũo kuo kwa Mwathani witũ Jesu Kristo nĩ ũndũ wa kũrũmĩrĩra ng’ano cia maheeni itungĩtwo na wara, no ithenya rĩa ũguo, ithuĩ ene nĩ tweyoneire riri wake.+
17 Nĩ gũkorũo nĩ aamũkĩrire kuuma kũrĩ Ngai o we Ithe witũ gĩtĩo na riri hĩndĩ ĩrĩa aaiguire ciugo ta ici* kuuma kũrĩ riri ũcio wa magegania: “Ũyũ nĩ Mũrũ wakwa, ũrĩa nyendete, na niĩ mwene nĩ ndĩmwĩtĩkĩrĩte.”+
18 Ti itherũ nĩ twaiguire ciugo icio ciumĩte igũrũ hĩndĩ ĩrĩa twarĩ nake kĩrĩma-inĩ kĩrĩa kĩamũre.
19 Nĩ ũndũ ũcio, kiugo kĩa ũrathi nĩ gĩĩkĩrĩtwo hinya o na makĩria, na nĩ mũreka wega nĩ kũiga meciria manyu harĩ kĩo o ta arĩ tawa+ ũramũrĩka handũ harĩ na nduma (o nginya gũkĩe na njata ya mũthenya+ yumĩre) ngoro-inĩ cianyu.
20 Nĩ gũkorũo o mbere nĩ mũĩ atĩ gũtirĩ ũrathi wa Rĩandĩko uumanaga na ũtaũri wa mũndũ kĩũmbe.
21 Tondũ gũtirĩ hĩndĩ ũrathi ũrĩ woka nĩ ũndũ wa kwenda kwa mũndũ,+ no andũ maaririe maũndũ moimĩte kũrĩ Ngai o ta ũrĩa maatongoririo* nĩ roho mũtheru.+
Tũũhoro twa magũrũ-inĩ
^ Kana “wĩtĩkio ũheetwo mweke wa mwanya o ta witũ.”
^ Kana “ũtũheete o ũguo tũhũ.”
^ Kana “atũheete o ũguo tũhũ.”
^ Kana “thuti.”
^ Kana hihi, “nĩ mũtumumu, ndonaga haraihu.”
^ Kana “gĩikaro gĩkĩ,” ũguo nĩ kuuga, mwĩrĩ wake arĩ gũkũ thĩ.
^ Kana “kũgweta.”
^ Ũkk., “mũgambo ta ũyũ.”
^ Ũkk., “maakuirũo.”
