Marũa ma Kerĩ ma Petero 3:1-18
3 Endwa akwa, maya nĩ marũa ma kerĩ ndĩramwandĩkĩra, na o ta marũa-inĩ marĩa ma mbere, ndĩrarahũra ũhoti wanyu wa gwĩciria kũgerera kĩririkania,+
2 nĩguo mũririkane ciugo iria ciaarĩtio hau kabere* nĩ anabii arĩa aamũre na rĩathani rĩa Mwathani na Mũhonokia kũgerera atũmwo anyu.
3 O mbere menyai ũndũ ũyũ, atĩ matukũ-inĩ ma kũrigĩrĩria nĩ gũgooka anyũrũrania na kĩnyũrũri kĩao, mathiage kũringana na merirĩria mao+
4 na moigage ũũ: “Gũkorũo kuo gwake kũu kweranĩirũo gũkĩrĩ ha?+ Tondũ kuuma mũthenya ũrĩa maithe maitũ ma tene maakomire gĩkuũ-inĩ-rĩ, maũndũ mothe mathiaga o na mbere o ta ũrĩa maatariĩ kuuma kĩambĩrĩria kĩa ũũmbi.”+
5 Nĩ gũkorũo nĩ meriganagĩria ũndũ ũyũ, atĩ tene nĩ kwarĩ na igũrũ na thĩ nyũmũ ĩrĩa yehandĩte kuuma maĩ-inĩ na gatagatĩ ka maĩ kũgerera kiugo kĩa Ngai;+
6 na atĩ kũgerera harĩ cio, thĩ ya kahinda kau nĩ yaanangirũo rĩrĩa yahumbĩrirũo nĩ mũiyũro wa maĩ.+
7 Na kũgerera kiugo o ro kĩu, igũrũ na thĩ iria irĩ kuo rĩu ciigĩirũo mwaki na ciigĩtwo nginya mũthenya ũrĩa wa ciira na wa kũniinwo kwa andũ arĩa matetigĩrĩte Ngai.+
8 No rĩrĩ, mũtikanariganĩrũo nĩ ũndũ ũyũ, endwa akwa, atĩ mũthenya ũmwe harĩ Jehova* no ta mĩaka ngiri na mĩaka ngiri no ta mũthenya ũmwe.+
9 Jehova* ndekururagia ũhoro-inĩ wĩgiĩ kĩĩranĩro gĩake+ ta ũrĩa andũ amwe meciragia atĩ nĩ ekururagia, no nĩ akoragwo na wetereri kũmwerekera tondũ ndendaga mũndũ o na ũmwe akaaniinwo no endaga othe merire.+
10 No mũthenya wa Jehova*+ ũgooka o ta mũici,+ hĩndĩ ĩrĩa igũrũ rĩkeehera+ na mũrurumo mũnene, no indo cia mũthingi irĩ hiũ mũno nĩ igaathira, nayo thĩ na mawĩra marĩa marĩ thĩinĩ wayo maguũrio.+
11 Tondũ indo icio ciothe igaathira na njĩra ĩyo-rĩ, mwĩciriei mwagĩrĩirũo gũkorũo mũrĩ andũ a mũthemba ũrĩkũ mĩthiĩre-inĩ ya ũtheru na ciĩko cia wĩrutĩri Ngai,
12 o mũgĩetagĩrĩra na mũkĩigaga hakuhĩ meciria-inĩ* gũkorũo kuo kwa mũthenya wa Jehova,*+ ũrĩa kũgerera guo igũrũ rĩkaanangwo+ na mwaki na indo cia mũthingi itweke nĩ ũrugarĩ mũingĩ!
13 No kũringana na kĩĩranĩro gĩake, kũrĩ na igũrũ rĩerũ na thĩ njerũ twetereire,+ na thĩinĩ wacio nĩ gũgaatũũra ũthingu.+
14 Kwoguo endwa akwa tondũ nĩ mwetereire maũndũ macio-rĩ, ĩkai ũrĩa wothe mũngĩhota nĩguo mũthia-inĩ akaamũkora mũtarĩ na kameni kana karooro na mũrĩ na thayũ.+
15 Ningĩ, onagai wetereri wa Mwathani witũ arĩ ũhonokio, o ta ũrĩa Paulo mũrũ wa Ithe witũ twendete o nake aamwandĩkĩire kũringana na ũũgĩ ũrĩa aaheetwo,+
16 akĩaria ũhoro wa maũndũ maya o ta ũrĩa ekaga marũa-inĩ make mothe. Ĩndĩ, maũndũ mamwe marũa-inĩ macio nĩ maritũ gũtaũkĩrũo, na nĩmo andũ arĩa matarĩ ũmenyo* na matehandĩte wega marahong’ora, o ta ũrĩa mekaga Maandĩko marĩa mangĩ, makerehera mwanangĩko.
17 Nĩ ũndũ ũcio inyuĩ endwa akwa-rĩ, tondũ mũrĩ na ũmenyo ũyũ kabere, mwĩmenyagĩrĩrei nĩguo mũtikanahĩtithio hamwe nao mahĩtia-inĩ ma andũ arĩa moinaga watho, mũgwe mwehere mũrũgamo-inĩ wanyu mũrũmu.+
18 No thiagai mũgĩkũraga ũhoro-inĩ wĩgiĩ ũtugi mũnene na ũmenyo wĩgiĩ Mwathani na Mũhonokia witũ Jesu Kristo. Arogĩa na riri rĩu na nginya tene na tene. Ameni.
Tũũhoro twa magũrũ-inĩ
^ Kana “maũndũ marĩa maarathirũo.”
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Kana “mũkĩĩriragĩria mũno.” Ũkk., “mũkĩhĩkaga.”
^ Rora Ũhoro Muongerere A5.
^ Kana “matarĩ athomithie.”
