Maũndũ Marĩa Meekirũo nĩ Atũmwo 4:1-37
4 Rĩrĩa acio erĩ maaragĩria andũ-rĩ, magĩkorũo nĩ athĩnjĩri-Ngai, na mũnene wa hekarũ, na Asadukai.+
2 Andũ acio maarĩ arakaru tondũ atũmwo nĩ maarutaga andũ na makaaria cara-rũkũ ũhoro wĩgiĩ kũriũka kwa Jesu kuuma kũrĩ arĩa akuũ.*+
3 Kwoguo makĩmanyita na makĩmahingĩra+ o nginya mũthenya ũrĩa warũmĩrĩire, tondũ kwarĩ hwaĩ-inĩ.
4 No rĩrĩ, aingĩ a arĩa maathikĩrĩirie ciugo icio magĩtĩkia, na mũigana wa arũme ũgĩkinya ta 5,000.+
5 Mũthenya ũrĩa warũmĩrĩire, atongoria ao, athuri, na andĩki-watho makĩgomana hamwe Jerusalemu,
6 marĩ na Anasi+ mũnene wa athĩnjĩri-Ngai, Kaiafa,+ Johana, Aleksanda, na arĩa othe maarĩ a mbarĩ cia mũnene ũcio wa athĩnjĩri-Ngai.
7 Makĩrũgamia Petero na Johana gatagatĩ-inĩ kao makĩambĩrĩria kũmoria: “Mũreekire ũndũ ũcio na hinya ũrĩkũ kana thĩinĩ wa rĩĩtwa rĩa ũ?”
8 Nake Petero, aiyũrĩtwo nĩ roho mũtheru,+ akĩmeera:
“Inyuĩ atongoria a andũ na athuri,
9 angĩkorũo tũrorio ũmũthĩ nĩ ũndũ wa gĩĩko kĩega tũrekĩire mũndũ ũrarĩ muonju,+ na mũrenda kũmenya nũũ ũrahonirie mũndũ ũyũ,
10 menyai inyuothe o hamwe na andũ othe a Isiraeli atĩ thĩinĩ wa rĩĩtwa rĩa Jesu Kristo ũrĩa Mũnazarethi,+ o ũcio muoragĩire mũtĩ-inĩ+ no Ngai agĩcoka akĩmũriũkia kuuma kũrĩ arĩa akuũ,+ nĩ kũgerera harĩ we mũndũ ũyũ arũgamĩte haha mbere yanyu arĩ na ũgima mwega wa mwĩrĩ.
11 Rĩu nĩrĩo ‘ihiga rĩrĩa inyuĩ aaki mwatuire ta rĩtarĩ kĩene na nĩrĩo rĩtuĩkĩte ihiga rĩrĩa inene rĩa kona.’*+
12 Makĩria ma ũguo-rĩ, ũhonokio ndũngĩoneka harĩ mũndũ ũngĩ o na ũrĩkũ, tondũ gũtirĩ rĩĩtwa rĩngĩ+ mũhuro wa riũa rĩheetwo andũ tũngĩhonokio kũgerera harĩ rĩo.”+
13 Na rĩrĩa moonire ũrĩa Petero na Johana maaragia marĩ na ũmĩrĩru,* na mamenya atĩ maarĩ andũ matarĩ athomu* na matarĩ igweta,+ makĩgega. Makĩambĩrĩria gũtaũkĩrũo atĩ maakoragwo hamwe na Jesu.+
14 Maarora mũndũ ũcio wahonetio arũgamĩte hamwe nao,+ makĩaga wa kuuga ũhoro-inĩ ũcio.+
15 Nĩ ũndũ ũcio makĩmaatha moime nja ya nyũmba ya Sanhedrini, na makĩambĩrĩria kwarĩrĩria ũndũ ũcio,
16 makiuga atĩrĩ: “Tũgwĩka andũ aya atĩa?+ Tondũ nĩ ma nĩ maringĩte kĩama kĩnene, kĩrĩa kĩmenyekete nĩ aikari othe a Jerusalemu,+ na tũtingĩkararia ũndũ ũcio.
17 Nĩgetha ũndũ ũyũ ndũgathiĩ na mbere gũtherema kũrĩ andũ, rekei tũmehĩtĩre na tũmakaanie kwaria rĩngĩ na mũndũ o na ũrĩkũ thĩinĩ wa rĩĩtwa rĩu.”+
18 Nĩ ũndũ ũcio makĩmeta na makĩmaatha matikaarie kana marutane ũndũ o na ũrĩkũ thĩinĩ wa rĩĩtwa rĩa Jesu.
19 No Petero na Johana makĩmacokeria ũũ: “Tuai arĩ inyuĩ kana nĩ kwagĩrĩire maitho-inĩ ma Ngai tũmũthikĩrĩrie inyuĩ handũ ha gũthikĩrĩria Ngai.
20 Ĩndĩ ithuĩ-rĩ, tũtingĩtiga kwaria ũhoro wa maũndũ marĩa tuonete na tũkaigua.”+
21 Na thutha wa kũmehĩtĩra makĩria, makĩmarekereria nĩ gũkorũo mationire ũndũ wa gũtũma maherithio, o na ningĩ nĩ ũndũ wa andũ+ tondũ othe maagoocaga Ngai nĩ ũndũ wa ũrĩa gwekĩkĩte.
22 Nĩ gũkorũo mũndũ ũcio waringĩirũo kĩama kĩu gĩa kũhonio aarĩ na makĩria ma mĩaka 40.
23 Thutha wa kũrekererio, magĩthiĩ kũrĩ andũ ao na makĩmeera ũrĩa anene a athĩnjĩri-Ngai na athuri maameerĩte.
24 Maigua ũguo, makĩanĩrĩra na mĩgambo mĩnene harĩ Ngai marĩ kĩndũ kĩmwe makiuga atĩrĩ:
“Mwathani Ũrĩa Mũnene, wee Nĩwe wombire igũrũ na thĩ na iria na indo ciothe iria irĩ thĩinĩ wacio,+
25 na kũgerera roho mũtheru nĩwe woigire na kanua ga ithe witũ Daudi,+ ndungata yaku ũũ: ‘Nĩ kĩĩ gĩatũmire ndũrĩrĩ itangĩke na ikundi cia andũ ciĩcũranie ũhoro wa maũndũ ma tũhũ?
26 Athamaki a thĩ makĩrũgama handũ hao nao atongoria magĩcokanĩrĩra hamwe marĩ kĩndũ kĩmwe nĩguo mokĩrĩre Jehova* na mokĩrĩre ũrĩa wake mũitĩrĩrie maguta.’*+
27 Tondũ hatarĩ nganja, Herode na Pontio Pilato+ marĩ na andũ a ndũrĩrĩ o hamwe na andũ a Isiraeli maagomanire hamwe itũũra-inĩ rĩrĩ mokĩrĩre Jesu ndungata yaku theru, ĩrĩa waitĩrĩirie maguta,+
28 nĩguo meke ũrĩa watuĩte na guoko gwaku na wendi waku o mbere kũngĩgeekĩka.+
29 Na rĩu Jehova,* thikĩrĩria ũrĩa maratwĩhĩtĩra, na wĩtĩkĩrie ngombo ciaku ithiĩ na mbere kwaria ũhoro waku irĩ na ũcamba,
30 na ũthiĩ na mbere gũtambũrũkia guoko gwaku ũhonanie na ũringe ciama na wĩke maũndũ ma magegania*+ thĩinĩ wa rĩĩtwa rĩa Jesu ndungata yaku theru.”+
31 Rĩrĩa maarĩkirie mathaithana macio,* handũ hau moonganĩte hagĩthingithio, nao othe makĩiyũrũo nĩ roho mũtheru+ na makĩambĩrĩria kwaria ũhoro wa Ngai marĩ na ũcamba.+
32 Makĩria ma ũguo-rĩ, arĩa othe meetĩkirie maarĩ na ngoro ĩmwe o na meciria* mamwe, na gũtirĩ o na ũmwe wao woonaga indo iria aarĩ nacio irĩ ciake, ĩndĩ maagayanaga indo ciothe.+
33 Atũmwo acio magĩgĩthiĩ na mbere kũruta ũira wĩgiĩ kũriũka kwa Mwathani Jesu+ marĩ na hinya mũingĩ, nake Ngai akĩmonia othe ũtugi wake mũnene na njĩra nene.
34 Ma nĩ atĩ, hatirĩ o na ũmwe wao waagaga kĩndũ,+ tondũ arĩa othe maarĩ na mĩgũnda kana nyũmba, meendagia na makarehe kĩrĩa mona,
35 magakĩiga magũrũ-inĩ ma atũmwo.+ Nakĩo gĩkagayanio o mũndũ akaheo kũringana na mabataro make.+
36 Nĩ ũndũ ũcio Jusufu, ũrĩa ningĩ wetagwo Baranaba+ nĩ atũmwo (rĩĩtwa rĩu rĩataũrũo nĩ kuuga, “Mũrũ wa Kũũmanĩrĩria”), Mũlawii waciarĩirũo Kuporo,
37 aarĩ na mũgũnda, akĩwendia na akĩrehe mbeca icio agĩciiga magũrũ-inĩ ma atũmwo.+
Tũũhoro twa magũrũ-inĩ
^ Kana “kũriũka kuuma kũrĩ arĩa akuũ ũhoro-inĩ wĩgiĩ Jesu.”
^ Ũkk., “mũtwe wa kona.”
^ Kana “ũcamba.”
^ Ũguo nĩ kuuga, matiathomeire cukuru cia kĩĩrabii; ti kuuga matioĩ gũthoma na kwandĩka.
^ Rora Ũhoro Muongerere A5.
^ Kana “Kristo wake.”
^ Rora Ũhoro Muongerere A5.
^ Kana “morirũ.”
^ Kana “kũhoya na kĩyo.”
^ Kĩngiriki, psy·kheʼ. Rora Ũthathaũri wa Ciugo.
