Ayubu 1:1-22
1 Nĩ kwarĩ mũndũ wetagwo Ayubu*+ bũrũri-inĩ wa Uzu. Aarĩ mũndũ mũrũngĩrĩru na mwĩkindĩru;*+ nĩ eetigĩrĩte Ngai na nĩ eethemaga maũndũ marĩa moru.+
2 Aarĩ na anake mũgwanja na airĩtu atatũ.
3 Mahiũ make maarĩ ng’ondu 7,000, ngamĩra 3,000, ng’ombe 1,000,* na ndigiri 500,* hamwe na ndungata nyingĩ mũno ũũ atĩ nĩwe warĩ igweta mũno harĩ andũ othe a mwena wa Irathĩro.
4 Anake acio ake nĩ maaharagĩria iruga o mũndũ hĩndĩ yake gwake mũciĩ mũthenya ũrĩa maatuĩte.* Nĩ maanyitaga ũgeni aarĩ a nyina acio atatũ nĩguo marĩanĩre na manyuanĩre nao.
5 Thutha wa thikũ cia maruga gũthira, Ayubu nĩ aamatũmanagĩra nĩguo amatherie. Ookĩraga rũcinĩ tene akaruta igongona rĩa njino+ nĩ ũndũ wa o ũmwe wao. Tondũ ooigaga atĩrĩ: “No gũkorũo anake akwa nĩ mehĩtie na makaruma Ngai na ngoro.” Ũguo nĩguo Ayubu eekaga hĩndĩ ciothe.+
6 Na rĩrĩ, mũthenya ũgĩkinya rĩrĩa ariũ a Ngai ũrĩa wa ma*+ maatonyire nĩguo marũgame mbere ya Jehova,+ na Shaitani+ o nake agĩtonya hamwe nao.+
7 Jehova akĩũria Shaitani atĩrĩ: “Uuma kũ?” Nake Shaitani agĩcokeria Jehova akiuga: “Nyuma kũriũnga thĩ na gũthiũrũrũkanga kuo.”+
8 Jehova akĩũria Shaitani atĩrĩ: “Hihi nĩ wonete* Ayubu ndungata yakwa? Gũtirĩ ũngĩ take thĩinĩ wa thĩ. Nĩ mũrũngĩrĩru na mwĩkindĩru,*+ mũndũ wĩtigĩrĩte Ngai na wĩthemaga maũndũ marĩa moru.”
9 Nake Shaitani agĩcokeria Jehova akĩmwĩra: “Kaĩ Ayubu etigĩrĩte Ngai o ũguo tũhũ?+
10 Githĩ ti kũmũirigĩra ũmũirigĩire ũkamũgitĩra+ hamwe na nyũmba yake na indo ciake ciothe? Nĩ ũrathimĩte wĩra wa moko make,+ namo mahiũ make makaingĩha mũno bũrũri-inĩ.
11 No nĩguo kũgĩe na ũgarũrũku, tambũrũkia guoko gwaku ũhutie kĩrĩa gĩothe arĩ nakĩo, nake hatarĩ nganja nĩ egũkũruma o ũthiũ-inĩ waku.”
12 Nake Jehova akĩra Shaitani ũũ: “Atĩrĩrĩ, kĩrĩa gĩothe arĩ nakĩo kĩrĩ guoko-inĩ gwaku.* No we mwene ndũkamũhutie!” Shaitani agĩkĩehera mbere ya* Jehova.+
13 Na rĩrĩ, mũthenya ũmwe rĩrĩa anake na airĩtu ake maarĩaga na makanyua ndibei kwa mũrũ wa nyina ũrĩa mũkũrũ-rĩ,+
14 mũndũ ũmwe akĩrehera Ayubu ũhoro akĩmwĩra atĩrĩ: “Ng’ombe nĩ kũrĩma ikũrĩmaga nacio ndigiri ikũrĩaga o hau hakuhĩ nacio
15 nao Asabea matharĩkĩra na mathiĩ nacio, na moraga ndungata na rũhiũ rwa njora. No niĩ nyiki ndahonoka, ndoka gũkũhe ũhoro.”
16 O ũcio akĩaragia-rĩ, ũngĩ agĩũka akiuga atĩrĩ: “Mwaki wa Ngai* wagwa kuuma igũrũ wacina ng’ondu na ndungata cianiinwo! No niĩ nyiki ndahonoka, ndoka gũkũhe ũhoro.”
17 O ũcio akĩaragia-rĩ, ũngĩ agĩũka akiuga atĩrĩ: “Akalidei+ mekwĩbangĩte ikundi ithatũ, mahobanĩria ngamĩra na mathiĩ nacio, na moraga ndungata na rũhiũ rwa njora. No niĩ nyiki ndahonoka, ndoka gũkũhe ũhoro.”
18 O ũcio akĩaragia-rĩ, ũngĩ agĩũka akiuga atĩrĩ: “Anake na airĩtu aku mekũrĩaga na makanyua ndibei kwa mũrũ wa nyina ũrĩa mũkũrũ.
19 Rũhuho rũnene ruoka o rĩmwe kuuma werũ-inĩ rwahũũra kona inya cia nyũmba, yagwĩra anake na airĩtu acio, makua. No niĩ nyiki ndahonoka, ndoka gũkũhe ũhoro.”
20 Rĩrĩa Ayubu aaiguire ũguo, agĩũkĩra agĩtembũra nguo yake na akĩenja njuĩrĩ ya mũtwe wake; agĩcoka agĩturia maru na akĩinamĩrĩra
21 akiuga atĩrĩ:
“Ndoimire nda ya maitũ itarĩ kĩndũ,Na ngaacoka itarĩ kĩndũ.+
Nĩ Jehova waheanire,+ na nĩ Jehova woya.
Rĩĩtwa rĩa Jehova rĩrothiĩ na mbere kũgoocwo.”
22 Maũndũ-inĩ macio mothe, Ayubu ndeehirie o na kana akiuga atĩ Ngai nĩ ekĩte ũndũ o na ũmwe mũũru.
Tũũhoro twa magũrũ-inĩ
^ No kũhoteke rĩĩtwa rĩu riugĩte “Kĩndũ gĩa Kũmenwo.”
^ Kana “mũndũ ũtarĩ ũcuke na mũrũngĩrĩru.”
^ Ũkk., “ng’ombe igĩrĩ igĩrĩ maita 500.”
^ Ũkk., “ndigiri 500 cia mũgoma.”
^ Kana “o kwa mũndũ mũciĩ riita rĩake.”
^ Nĩ ciugo cia Kĩhibirania iria ikoragwo ikĩaria ũhoro wa araika marĩ ariũ a Ngai.
^ Ũkk., “werekeirie ngoro yaku harĩ.”
^ Kana “mũndũ ũtarĩ ũcuke na mũrũngĩrĩru.”
^ Kana “rungu rwaku.”
^ Ũkk., “ũthiũ-inĩ wa.”
^ Kana hihi, “Rũheni.”
