Ayubu 2:1-13
2 Thutha ũcio mũthenya ũgĩkinya rĩrĩa ariũ a Ngai ũrĩa wa ma*+ maatonyire nĩguo marũgame mbere ya Jehova,+ na Shaitani o nake agĩtonya hamwe nao nĩguo arũgame mbere ya Jehova.+
2 Jehova akĩũria Shaitani atĩrĩ: “Uuma kũ?” Nake Shaitani agĩcokeria Jehova akiuga: “Nyuma kũriũnga thĩ na gũthiũrũrũkanga kuo.”+
3 Jehova akĩũria Shaitani atĩrĩ: “Hihi nĩ wonete* Ayubu ndungata yakwa? Gũtirĩ ũngĩ take thĩinĩ wa thĩ. Nĩ mũrũngĩrĩru na mwĩkindĩru,*+ mũndũ wĩtigĩrĩte Ngai na wĩthemaga maũndũ marĩa moru. Ndarĩ aratiganĩria wĩkindĩru wake,+ o na gũtuĩka nĩ ũgeretie kũningĩrĩria ndĩmũũkĩrĩre+ nĩguo ndĩmwanange* hatarĩ gĩtũmi.”
4 No Shaitani agĩcokeria Jehova akĩmwĩra: “Ngothi* yumaga ngothi. Mũndũ no aneane kĩrĩa gĩothe arĩ nakĩo nĩguo ahonokie muoyo wake.
5 No nĩguo kũgĩe na ũgarũrũku, tambũrũkia guoko gwaku ũhutie mahĩndĩ na nyama cia mwĩrĩ wake, nake hatarĩ nganja nĩ egũkũruma o ũthiũ-inĩ waku.”+
6 Nake Jehova akĩra Shaitani ũũ: “Atĩrĩrĩ, nĩ ndamũneana guoko-inĩ gwaku.* No ndũkahutie muoyo wake!”
7 Shaitani agĩkĩehera mbere ya* Jehova na akĩrehera Ayubu mahũha marĩ ruo*+ kuuma ikinya-inĩ rĩa kũgũrũ o nginya mũtwe.
8 Ayubu akĩoya gĩcere kĩa nyũngũ nĩguo ethũage nakĩo, na agĩikara thĩ mũhu-inĩ.+
9 Thutha wa ihinda mũtumia wake akĩmwĩra atĩrĩ: “No ũrũmĩtie wĩkindĩru waku? Ruma Ngai ũkue!”
10 Nake akĩmwĩra atĩrĩ: “Ũraria o ta atumia arĩa matarĩ wĩcirio. Kaĩ twagĩrĩirũo o kwamũkĩra maũndũ marĩa mega kuuma kũrĩ Ngai ũrĩa wa ma na twage kwamũkĩra nginya marĩa moru?”+ Maũndũ-inĩ macio mothe, Ayubu ndeehirie na mĩromo yake.+
11 Na rĩrĩ, arata atatũ a Ayubu makĩigua ũhoro wa maũndũ mothe moru marĩa maamũkorete, na o ũmwe wao akiuma gwake—Elifazu+ ũrĩa Mũtemani, Bilidadi+ ũrĩa Mũshuhi,+ na Zofaru+ ũrĩa Mũnaamathi. Makĩrĩkanĩra macemanie nĩguo mathiĩ magacakae hamwe na Ayubu na mamũũmĩrĩrie.
12 Rĩrĩa maamuonire marĩ o haraihu, makĩaga kũmũmenya. Makĩambĩrĩria kũrĩra manĩrĩire na magĩtembũra nguo ciao, na magĩikia rũkũngũ rĩera-inĩ o na makĩikĩria mĩtwe.+
13 Magĩcoka magĩikara thĩ hamwe nake thikũ mũgwanja mũthenya na ũtukũ. Gũtirĩ o na ũmwe wao wamwĩrire kiugo o na kĩmwe, tondũ nĩ moonire atĩ aarĩ na ruo rũnene mũno.+
Tũũhoro twa magũrũ-inĩ
^ Nĩ ciugo cia Kĩhibirania iria ikoragwo ikĩaria ũhoro wa araika marĩ ariũ a Ngai.
^ Ũkk., “werekeirie ngoro yaku harĩ.”
^ Kana “mũndũ ũtarĩ ũcuke na mũrũngĩrĩru.”
^ Ũkk., “ndĩmũmerie.”
^ Kana “Gĩkonde.”
^ Kana “rungu rwaku.”
^ Ũkk., “ũthiũ-inĩ wa.”
^ Kana “ironda njũru.”
