Ũhoro Mwega Ũrĩa Waandĩkirũo nĩ Johana 8:12-59
8 12 Jesu agĩcoka akĩaria nao o rĩngĩ, akĩmeera: “Nĩ niĩ ũtheri wa thĩ.+ Mũndũ o wothe ũrĩnũmagĩrĩra ndarĩ hĩndĩ agaathiĩra nduma-inĩ, no arĩkoragwo na ũtheri+ wa muoyo.”
13 Nĩ ũndũ ũcio Afarisai makĩmwĩra: “Wee ũrutaga ũira waku mwene; ũira waku ti wa ma.”
14 Nake Jesu akĩmacokeria: “O na angĩkorũo ndutaga ũira wakwa mwene, ũira wakwa nĩ wa ma tondũ nĩ njũĩ kũrĩa ndoimire na kũrĩa ndĩrathiĩ.+ No inyuĩ mũtiũĩ kũrĩa ndoimire na kũrĩa ndĩrathiĩ.
15 Mũtuanagĩra kũringana na ithimi cia andũ;+ niĩ gũtirĩ mũndũ nduagĩra.
16 Na ingĩtuanĩra, ituĩro rĩakwa nĩ rĩa kĩhooto, tondũ ndikoragwo ndĩ nyiki, no Awa ũrĩa wandũmire akoragwo hamwe na niĩ.+
17 Ningĩ Watho-inĩ wanyu nĩ kwandĩke ũũ: ‘Ũira wa andũ erĩ nĩ wa ma.’+
18 Niĩ ndutaga ũira wakwa mwene, na Awa ũrĩa wandũmire o nake nĩ arutaga ũira igũrũ rĩakwa.”+
19 Nao makĩmũũria: “Thoguo arĩ kũ?” Jesu akĩmacokeria: “Inyuĩ mũtinjũĩ na mũtiũĩ Awa.+ Korũo nĩ mũnjũĩ, nĩ mũngĩũĩ Awa o nake.”+
20 Aaririe maũndũ macio akĩrutana hekarũ-inĩ arĩ harĩa haaigĩtwo mathandũkũ ma mĩhothi.+ No gũtirĩ mũndũ wamũnyitire tondũ ihinda rĩake rĩtiarĩ ikinyu.+
21 Nĩ ũndũ ũcio akĩmeera o rĩngĩ atĩrĩ: “Niĩ nĩ ngũthiĩ, na nĩ mũkaanjaria, no mũgaakua o na mehia manyu.+ Kũrĩa ndĩrathiĩ, mũtingĩhota gũka.”+
22 Nao Ayahudi makĩambĩrĩria kuuga ũũ: “Kaĩ arabanga kwĩyũraga? Tondũ aroiga, ‘Kũrĩa ndĩrathiĩ, mũtingĩhota gũka.’”
23 Nake agĩthiĩ na mbere kũmeera: “Inyuĩ muumĩte ciikaro cia gũkũ thĩ; niĩ nyumĩte ciikaro cia kũrĩa igũrũ.+ Inyuĩ mũrĩ a gũkũ thĩ; niĩ ndirĩ wa gũkũ thĩ.
24 Nĩkĩo ndamwĩra atĩrĩ: Mũgaakua o na mehia manyu. Nĩ gũkorũo mũngĩaga gwĩtĩkia atĩ niĩ nĩ niĩ we, mũgaakua o na mehia manyu.”
25 Nĩ ũndũ ũcio makĩambĩrĩria kũmũũria: “Wee nĩwe ũ?” Jesu akĩmacokeria: “O na ndĩraria na inyuĩ nĩkĩ?
26 Ndĩ na maũndũ maingĩ ma kwaria mamwĩgiĩ inyuĩ na ma gũtua ciira. Ũrĩa wandũmire nĩ wa ma, na maũndũ marĩa ndaiguire kuuma kũrĩ we nĩmo ndĩraria gũkũ thĩ.”+
27 Matiataũkĩirũo atĩ aameeraga ũhoro wa Ithe.
28 Jesu agĩcoka akĩmeera: “Mwarĩkia gũcuuria Mũrũ wa mũndũ,+ hĩndĩ ĩyo nĩ mũkaamenya atĩ nĩ niĩ we+ na atĩ gũtirĩ ũndũ njĩkaga ndĩĩrĩte niĩ mwene;+ no njaragia maũndũ maya o ta ũrĩa Awa aandutire.
29 Nake Ũrĩa wandũmire arĩ hamwe na niĩ; ndaandiganĩirie ndĩ nyiki, nĩ gũkorũo hingo ciothe njĩkaga maũndũ marĩa mamũkenagia.”+
30 Na rĩrĩa aaragia maũndũ macio, andũ aingĩ makĩgĩa na wĩtĩkio harĩ we.
31 Jesu agĩcoka akĩra Ayahudi arĩa maamwĩtĩkĩtie atĩrĩ: “Mũngĩtũũra kiugo-inĩ gĩakwa, mũgũkorũo mũrĩ arutwo akwa kũna,
32 na nĩ mũkũmenya ũhoro ũrĩa wa ma,+ naguo ũhoro ũrĩa wa ma ũmũkũũre ũkombo-inĩ.”+
33 Nao makĩmũcokeria: “Ithuĩ tũrĩ rũciaro rwa Iburahimu na tũtirĩ twakorũo twĩ ngombo cia mũndũ o na ũrĩkũ. Nĩ kĩĩ gĩagĩtũma uuge, ‘Nĩ tũgũkũũrũo ũkombo-inĩ’?”
34 Jesu akĩmacokeria: “Ngũmwĩra atĩrĩ o ma o ma, mũndũ o wothe wĩhagia, nĩ ngombo ya mehia.+
35 Makĩria ma ũguo-rĩ, ngombo ndĩtũũraga kwa mwathi wayo tene na tene; no mũrũ wake atũũraga kuo tene na tene.
36 Kwoguo Mũriũ angĩmũkũũra ũkombo-inĩ, mũngĩkorũo mũrĩ akũũre kũna.
37 Nĩ njũĩ atĩ mũrĩ rũciaro rwa Iburahimu. No mũracaria ũrĩa mũngĩnjũraga tondũ kiugo gĩakwa gĩtithiaga na mbere gatagatĩ-inĩ kanyu.
38 Niĩ maũndũ marĩa nyonete hĩndĩ ĩrĩa twarĩ na Awa nĩmo njaragia,+ no inyuĩ mwĩkaga maũndũ marĩa mũiguĩte kuuma kũrĩ ithe wanyu.”
39 Nao makĩmũcokeria makĩmwĩra: “Ithe witũ nĩ Iburahimu.” Nake akĩmeera: “Korũo mũrĩ ciana cia Iburahimu,+ mũngĩreka ciĩko cia Iburahimu.
40 No rĩu mũracaria ũrĩa mũngĩnjũraga, o niĩ mũndũ ũrĩa ũmwĩrĩte ũhoro ũrĩa wa ma ũrĩa ndaiguire kuuma kũrĩ Ngai.+ Iburahimu ndeekaga ũguo.
41 Inyuĩ mũreka ciĩko cia ithe wanyu.” Nao makĩmwĩra: “Tũticiarĩtwo kuumana na ũmaraya;* tũrĩ a Ithe ũmwe, nĩwe Ngai.”
42 Jesu akĩmeera: “Korũo Ngai nĩwe Ithe wanyu, no mũnyende,+ nĩ gũkorũo ndokire nyumĩte kũrĩ Ngai na rĩu ndĩ haha. Ndiũkĩte ndĩĩtũmĩte niĩ mwene, no Ũcio nĩwe wandũmire.+
43 Nĩ kĩĩ kĩratũma mwage gũtaũkĩrũo nĩ ũrĩa ndĩroiga? Nĩ tondũ mũtiretĩkĩra kũigua kiugo gĩakwa.
44 Inyuĩ muumĩte kũrĩ ithe wanyu Mũcukani, na merirĩria ma ithe wanyu nĩmo mwendaga gwĩka.+ Ũcio aarĩ mũũragani kuuma o kĩambĩrĩria,+ na ndeehandire wega ũhoro-inĩ ũrĩa wa ma, nĩ gũkorũo ũhoro ũrĩa wa ma ndũrĩ thĩinĩ wake. Hĩndĩ ĩrĩa ekwaria maheeni, aragia kũringana na mwerekera wake mwene, tondũ we nĩ wa maheeni na nĩwe ithe wa maheeni.+
45 Ĩndĩ niĩ, tondũ ndĩmũheaga ũhoro ũrĩa wa ma, mũtinjĩtĩkagia.
46 Nũũ gatagatĩ-inĩ kanyu ũngĩruta ũira atĩ ndĩ mwĩhia? Angĩkorũo njaragia ma-rĩ, mwagaga kũnjĩtĩkia nĩkĩ?
47 Mũndũ ũrĩa uumanĩte na Ngai nĩ athikagĩrĩria ciugo cia Ngai.+ Kĩu nĩkĩo gĩtũmaga mwage gũthikĩrĩria, tondũ mũtiumanĩte na Ngai.”+
48 Nao Ayahudi makĩmũũria atĩrĩ: “Hihi no tũkorũo tũhĩtĩtie tũkiuga, ‘Wee ũrĩ Mũsamaria+ na ũrĩ na ndaimono’?”+
49 Jesu akĩmacokeria akĩmeera: “Niĩ ndirĩ na ndaimono, no nĩ heete Awa gĩtĩo, na inyuĩ mũtiiheete gĩtĩo.
50 No niĩ ndirecarĩria rũgooco;+ nĩ kũrĩ Ũrĩa ũcaragia na agatuanĩra.
51 Ngũmwĩra atĩrĩ o ma o ma, mũndũ o wothe angĩathĩkĩra kiugo gĩakwa, gũtirĩ hĩndĩ akoona gĩkuũ.”+
52 Ayahudi makĩmwĩra: “Rĩu nĩ twamenya atĩ ũrĩ na ndaimono. Iburahimu nĩ aakuire, o na anabii, no wee ũroiga atĩ, ‘Mũndũ o wothe angĩathĩkĩra kiugo gĩakwa, gũtirĩ hĩndĩ agaacama gĩkuũ.’
53 Kaĩ wee ũrĩ mũnene gũkĩra ithe witũ Iburahimu, na we nĩ aakuire? Anabii o nao nĩ maakuire. Kaĩ wee arĩ we ũ?”
54 Jesu akĩmacokeria atĩrĩ: “Niĩ mwene ingĩĩgoocithia, rũgooco rũu nĩ rwa tũhũ. Awa nĩwe ũngoocithagia,+ o ũcio mũroiga atĩ nĩwe Ngai wanyu.
55 No mũtirĩ mwamũmenya,+ ĩndĩ ũcio niĩ nĩ ndĩmũũĩ.+ Na ingĩoiga ndimũũĩ, ingĩakorũo ndĩ mũheenania o ta inyuĩ. No nĩ ndĩmũũĩ, na nĩ njathĩkagĩra kiugo gĩake.
56 Ithe wanyu Iburahimu nĩ aakenagĩra mũno kĩĩrĩgĩrĩro gĩa kuona mũthenya wakwa, na nĩ aawonire na agĩkena.”+
57 Nao Ayahudi makĩmũũria atĩrĩ: “Wee ũroiga nĩ wonete Iburahimu na ndũkinyĩtie nginya mĩaka 50?”
58 Nake Jesu akĩmeera: “Ngũmwĩra atĩrĩ o ma o ma, o na Iburahimu atanaciarũo, ndarĩ o kuo.”+
59 Nĩ ũndũ ũcio makĩoya mahiga mamũhũũre namo, no Jesu akĩĩhitha na akiuma hekarũ-inĩ.
Tũũhoro twa magũrũ-inĩ
^ Kana “ngomanio itagĩrĩire.” Kĩngiriki, por·neiʹa. Rora Ũthathaũri wa Ciugo.
