Kiugo gĩtheru kĩa Ngai, Bibilia, nĩ ndũmĩrĩri ya Ngai nyandĩke nĩ ũndũ witũ ithuothe. No mũhaka twĩrute Bibilia nĩguo tũmenye ũhoro wa Mũtungi wayo. (Johana 17:3; 2 Timotheo 3:​16) Thĩinĩ wayo, Jehova Ngai nĩ aguũrĩtie muoroto wake harĩ andũ na harĩ thĩ ĩrĩ mũciĩ wao.​—Kĩambĩrĩria 3:​15; Kũguũrĩrio 21:​3, 4.

Gũtirĩ ibuku rĩngĩ rĩhutagia ũtũũro wa andũ na njĩra nene ta Bibilia. Ĩtwĩkĩraga ngoro tũkũrie ngumo cia Jehova ta wendo, tha, na ũcayanĩri. Nĩ ĩheanaga kĩĩrĩgĩrĩro, ĩgateithia andũ gũkirĩrĩria o na mĩnyamaro mĩnene. Na nĩ ĩthiaga na mbere kũguũria maũndũ ma thĩ ĩno marĩa matatwaranaga na wendi mũkinyanĩru wa Ngai.​—Thaburi 119:105; Ahibirania 4:​12; 1 Johana 2:​15-​17.

Bibilia yaandĩkirũo rĩa mbere na rũthiomi rwa Kĩhibirania, Kĩaramu, na Kĩngiriki, no nĩ ĩtaũrĩtwo ĩrĩ yothe kana icunjĩ ciayo na thiomi makĩria ma 3,000. Nĩrĩo ibuku rĩrĩa rĩtaũrĩtwo na rĩgatheremio na gĩkĩro kĩnene gũkĩra marĩa mangĩ. Na ũguo nĩguo tũngĩĩrĩgĩrĩra. Ũrathi wa Bibilia uugĩte ũũ: “Ũhoro ũyũ mwega wa Ũthamaki [ndũmĩrĩri ĩrĩa ya mũthingi thĩinĩ wa Bibilia] nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.”​—Mathayo 24:14.

Nĩ ũndũ wa kũmenya bata wa ndũmĩrĩri ĩrĩa ĩkoragwo thĩinĩ wa Bibilia, muoroto witũ ũkoretwo ũrĩ kũmĩtaũra na wĩhokeku kwerekera maandĩko marĩa maandĩkirũo kĩambĩrĩria-inĩ, na kũmĩtaũra na njĩra ĩgũthomeka na ĩgataũkĩka na njĩra hũthũ. Icunjĩ ici cia Ũhoro Muongerere “Maũndũ ma Kũrũmĩrĩrũo Ũtaũri-inĩ wa Bibilia,” “Maũndũ Megiĩ Ũtaũri Ũyũ,” na “Ũrĩa Bibilia Yatũkinyĩire” nĩ itaarĩirie maũndũ mamwe marĩa marũmĩrĩirũo ũtaũri-inĩ ũyũ, na igataarĩria maũndũ mamwe marĩ thĩinĩ wa Bibilia ĩno.

Andũ arĩa mendete Jehova Ngai na mamũthathayagia nĩ mendete ũtaũri wa Kiugo kĩa Ngai ũtarĩ na mahĩtia na ũrataũkĩka wega. (1 Timotheo 2:4) Nĩkĩo tũtaũrĩte Bibilia ya New World Translation na rũthiomi rwa Gĩkũyũ. Ihoya ritũ na mwĩhoko witũ nĩ atĩ wee mũthomi mwende, nĩ ũkũgunĩka nĩ ũtaũri ũyũ wa Maandĩko Matheru ũkĩĩrutanĩria ‘gũcaria Ngai, nĩgetha ũmuone.’—Atũmwo 17:27.