KŨRĨ ARĨA MAHIKANĨTIE
3: Kũheana Gĩtĩo
ŨGUO NĨ KUUGA ATĨA?
Andũ arĩa mahikanĩtie mangĩkorũo maheanĩte gĩtĩo, nĩ meciranagia o na hangĩkorũo na ũndũ mataraiguithanĩria. Ibuku rĩmwe rĩĩtagwo Ten Lessons to Transform Your Marriage riugaga ũũ: “Andũ acio nĩ methemaga kũnyitĩrĩra o mũndũ mawoni make, na handũ ha ũguo, mathiaga na mbere kwaranĩria igũrũ rĩgiĩ ũndũ ũrĩa mataraiguithanĩria. O mũndũ athikagĩrĩria mawoni ma ũrĩa mahikanĩtie nake na njĩra ya gĩtĩo, na marĩ hamwe magacaria ũrĩa mangĩiguithanĩria ũndũ-inĩ ũcio.”
ŨTAARO WA BIBILIA: “Wendo . . . ndũcaragia ũrĩa ũngĩĩguna guo mwene.”—1 Akorintho 13:4, 5.
“Gũtĩa mũtumia wakwa nĩ kuuga atĩ nĩ nyonaga arĩ wa bata na ndingĩenda gwĩka ũndũ o na ũmwe ũngĩmũtuurithia kana ũngĩthũkia kĩhiko gitũ.”—Micah.
ŨNDŨ ŨCIO NĨ WA BATA NĨKĨ?
Arĩa mahikanĩtie mangĩaga kũheana gĩtĩo, no makorũo makĩaranĩria na njĩra ya kũrutana mahĩtia, gũcinũrana, o na kana kũnyũrũrania. Athuthuria moigaga atĩ maũndũ macio nĩ ndariri cia mbere cia kuonania atĩ kĩhiko kĩu no kĩrigĩrĩrie na ndigano.
“Kwaria maũndũ matarĩ ma gĩtĩo, ma kũnyũrũria, kana ma itherũ igũrũ rĩgiĩ mũtumia waku, no gũtũme eyone atarĩ wa bata na atige gũkwĩhoka, na ũndũ ũcio no ũthũkie kĩhiko kĩanyu.”—Brian.
ŨRĨA ŨNGĨKA
WĨTHUTHURIE
Thuthuria mĩario yaku na ciĩko ciaku kwa ihinda rĩa kiumia kĩmwe. Ũcoke wĩyũrie ũũ:
-
‘Nĩ maita maigana ndĩrarutire ũrĩa tũhikanĩtie nake mahĩtia, na nĩ maita maigana ndĩramũcokeirie ngatho?’
-
‘Nĩ na njĩra irĩkũ ndĩronirie ũrĩa tũhikanĩtie nake gĩtĩo?’
ARĨRĨRIAI MAŨNDŨ MAYA NA ŨRĨA MŨHIKANĨTIE NAKE
-
Nĩ ciugo irĩkũ kana ciĩko ingĩteithia o ũmwe wanyu eigue atĩ nĩ aheetwo gĩtĩo?
-
Nĩ ciugo irĩkũ kana ciĩko itũmaga o ũmwe wanyu eigue ta ataheetwo gĩtĩo?
GERIA ŨŨ
-
Andĩka njĩra ithatũ iria ũngĩenda kuonio gĩtĩo nacio. Ĩra ũrĩa mũhikanĩtie nake eke o taguo. Cenjaniai maũndũ marĩa mwandĩka na mwĩrutanĩrie kuonanagia gĩtĩo kũgerera njĩra icio.
-
Andĩka maũndũ marĩa magũkenagia megiĩ ũrĩa mũhikanĩtie nake. Ũcoke ũmwĩre ũrĩa ũkenagio nĩ maũndũ macio.
“Gũtĩa mũthuri wakwa nĩ kuuga nĩ nyonanagia kũgerera ciĩko ciakwa atĩ nĩ nyonaga arĩ wa bata na atĩ nĩ nyendaga akorũo na gĩkeno. To mũhaka njĩke ũndũ mũnene; rĩmwe tũũndũ tũnini tũrĩa ndĩmwĩraga kana ndĩmwĩkagĩra no tuonanie atĩ nĩ ndĩmũtĩĩte kuuma ngoro.”—Megan.
Ũndũ ũrĩa wa bata gwĩciria ti kana nĩ wonaga ta ũheanaga gĩtĩo, no nĩ kana ũrĩa mũhikanĩtie nake nĩ aiguaga atĩ nĩ ũmũheete gĩtĩo.
ŨTAARO WA BIBILIA: “Mwĩhumbei wendo muororo ũrĩ na ũcayanĩri, ũtugi, wĩnyihia, ũhooreri, na wetereri.”—Akolosai 3:12.
