Kĩng’ang’i nĩkĩo nyamũ ĩrĩa ĩkoragwo na ũhoti mũnene wa kũrũma kĩndũ gũkĩra nyamũ ciothe thĩinĩ wa thĩ. Kwa ngerekano, nĩ harĩ mũthemba wa kĩng’ang’i gĩikaraga maĩ-inĩ ma cumbĩ mwena wa Australia, kĩhotaga kũrũma kĩndũ na hinya maita matatũ makĩria ma mũrũthi kana kanyũtũ. O na kũrĩ ũguo, rũthĩa rwakĩo rũngĩhutio, nĩ rũiguaga narua nginya gũkĩra kaara ka mũndũ. Ũndũ ũcio ũhotekaga atĩa na nĩ nĩguo ngothi ya kĩng’ang’i ĩrĩ nyũmũ?

Rũthia rwa kĩng’ang’i rũkoragwo na ciĩga nini ngiri nyingĩ iria irũhotithagia kũigua rwahutio. Mũthuthuria ũmwe wĩtagwo Duncan Leitch oigire ũũ: “Mĩkiha yaruo ya gũtwara ũhoro ĩkoragwo ĩgereire irima-inĩ rĩrĩ ihĩndĩ-inĩ rĩa mũtwe.” Ũndũ ũcio nĩ ũgitagĩra mĩkiha ya gũtwara ũhoro ĩrĩa yumaga rũthĩa-inĩ, na ũgatũma rũkorũo na ũhoti mũnene wa kũigua rũkĩhutio, nginya icigo imwe igakĩria ũrĩa macini ingĩhota gũthima. Nĩ ũndũ ũcio, kĩng’ang’i nĩ kĩhotaga gũkũũrana irio na indo ta mahiga mangĩingĩra kanua. Ũguo noguo kĩng’ang’i kĩhotaga gũkuua kaana ga kĩo gĩtegũkahihinya. Rũthĩa rwa kĩng’ang’i nĩ kĩĩga gĩkoragwo na hinya mũingĩ na ũhoti mũnene wa kũigua kĩngĩhutio.

Ũgwĩciria atĩa? Hihi rũthĩa rwa kĩng’ang’i nĩ kwĩyumĩria rweyumĩririe-ĩ kana nĩ kũmbwo rwombirũo?