Ũngĩkorũo ũkĩgerera ũndũ mũritũ, hatarĩ nganja no wĩrĩgĩrĩre atĩ mũrata waku mwega nĩ egũgũteithia. Nĩ ũndũ ũcio, andũ amwe moigaga atĩ Ngai ti mũrata mwega tondũ monaga ta ataramateithia. No ũhoro wa ma nĩ atĩ, Ngai to gwĩka aneka maũndũ maingĩ nĩ ũndũ witũ ihinda ihĩtũku, no nginya ihinda rĩrĩa rĩroka nĩ ekuoya ikinya rĩa kweheria mathĩna marĩa mothe tũcemanagia namo ũmũthĩ. Nĩ maũndũ marĩkũ Ngai abangĩte gwĩka?

Ngai nĩ akaaniina waganu wothe na njĩra ya kũniina kĩhumo kĩaguo. Bibilia nĩ yonanĩtie kĩhumo kĩa waganu nĩ kĩĩ tondũ yugaga: “Thĩ yothe ĩtongoragio nĩ ũrĩa mũru.” (1 Johana 5:19) ‘Ũcio mũru’ nowe ũrĩa wetirũo nĩ Jesu “mũnene wa thĩ ĩno,” o we Shaitani ũrĩa Mũcukani. (Johana 12:31) Ũgucania ũrĩa Shaitani akoragwo naguo harĩ andũ nĩguo kĩhumo kĩa maũndũ moru marĩa mekĩkaga thĩinĩ wa thĩ. Nĩ ũndũ ũrĩkũ Ngai abangĩte gwĩka?

Ica ikuhĩ Jehova Ngai nĩ ekuoya ikinya kũgerera harĩ Mũrũwe Jesu Kristo nĩguo “aniine ũrĩa ũkoragwo na ũhoti wa kũrehe gĩkuũ, nĩwe Mũcukani.” (Ahibirania 2:14; 1 Johana 3:8) Bibilia yonanagia atĩ o na Mũcukani we mwene nĩ oĩ atĩ atigĩtie “ihinda inini” aniinwo. (Kũguũrĩrio 12:12) Ningĩ Ngai nĩ akaaniina andũ arĩa othe mekaga maũndũ moru.​—Thaburi 37:9; Thimo 2:22.

Mũũmbi witũ arĩkia kũniina waganu wothe thĩinĩ wa thĩ, nĩ akooya ikinya rĩa kũhingia muoroto wake wa andũ gũtũũra tene na tene thĩinĩ wa thĩ. Nĩ maũndũ marĩkũ tũngĩĩrĩgĩrĩra?

Thayũ na ũgitĩri wa gũtũũra. “Andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”​—Thaburi 37:11.

Irio njega na cia kũigana. “Bũrũri ũrogĩaga na bũthi wa ngano nginya o irĩma igũrũ.”​—Thaburi 72:16.

Nyũmba njega na wĩra ũrĩ na maciaro. “Nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. . . . andũ akwa arĩa athure nĩmarĩkenagĩra wĩra wa moko mao ihinda iraya.”​—Isaia 65:21, 22.

Hihi nĩ wĩriragĩria kuona maũndũ ta macio? Ica ikuhĩ maũndũ macio nĩ marĩkenagĩrũo nĩ andũ othe o mũthenya.

Ũmũthĩ ũyũ gũtirĩ mũndũ ũtangĩrwara kana akue, no ihinda rĩroka maũndũ magaakorũo marĩ ngũrani. Ica ikuhĩ Ngai nĩ ekũrehe irathimo kũgerera igongona rĩa ũkũũri rĩa Jesu, nĩguo ‘mũndũ o wothe wonanagia wĩtĩkio harĩ we ndakaniinwo no agĩe na muoyo wa tene na tene.’ (Johana 3:16) Moimĩrĩro ma ũndũ ũcio magaakorũo marĩ marĩkũ?

Mĩrimũ nĩ ĩkaaniinwo. “Mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru; nao andũ arĩa matũũraga kuo nĩmakoherũo ũũru wao.”​—Isaia 33:24.

Gĩkuũ gĩtigaakorũo kuo rĩngĩ. “Nĩ akaameria gĩkuũ tene na tene, Na Jehova Mwathani Ũrĩa Mũnene nĩ akaagiria maithori mothiũ mothe.”​—Isaia 25:8, New World Translation.

Andũ magaatũũra tene na tene. “Kĩheo kĩrĩa Ngai aheanaga nĩ muoyo wa tene na tene kũgerera Kristo Jesu Mwathani witũ.”​—Aroma 6:23.

Andũ arĩa makuĩte nĩ makaariũkio. “Nĩ gũkaariũkio andũ arĩa athingu na arĩa matarĩ athingu.” (Atũmwo 24:15) O na andũ arĩa makuĩte nĩ makaagunĩka kuumana na kĩheo kĩa Ngai kĩa ũkũũri.

 Ngai akaahingia maũndũ macio mothe atĩa?

Ngai akaahũthĩra thirikari ya igũrũ kũhingia muoroto wake harĩ andũ na harĩ thĩ, na Jesu Kristo nĩwe wamũrĩtwo gũkorũo arĩ Mũtongoria wa thirikari ĩyo. (Thaburi 110:1, 2) Thirikari kana ũthamaki ũcio, nĩguo Jesu aarutire arũmĩrĩri ake mahoyage ũũke kũgerera ciugo ici: “Ithe witũ ũrĩ igũrũ, . . . Ũthamaki waku ũũke.”​—Mathayo 6:9, 10.

Ũthamaki ũcio wa Ngai nĩguo ũgaathana gũkũ thĩ na ũniine ruo na mathĩna mothe thĩinĩ wayo. Ũthamaki ũcio ũgaakorũo ũrĩ thirikari ĩrĩa njega biũ andũ manakorũo nayo. Nĩkĩo Jesu eerutanagĩria mũno kũhunjia “ũhoro ũrĩa mwega wa Ũthamaki” rĩrĩa aarĩ gũkũ thĩ na akĩĩra arutwo ake mekage o ũguo.​—Mathayo 4:23; 24:14.

Nĩ ũndũ wa wendo mũnene harĩ andũ, Jehova Ngai nĩ eranĩire atĩ nĩ ageeka maũndũ macio mothe nĩ ũndũ wao. Na githĩ ũndũ ũcio to ũtũme wende kũmũmenya na kũmũkuhĩrĩria? Ũngĩthuura gwĩka ũguo-rĩ, hihi ũngĩgunĩka atĩa? Gĩcunjĩ gĩkĩ kĩrũmĩrĩire nĩ gĩgũtaarĩria.