Iheo imwe tũcionaga irĩ cia bata tondũ iheanĩtwo nĩ mũndũ ũrĩ igweta kana mũndũ tũheete gĩtĩo. O na gũtuĩka iheo ingĩ no ikorũo itarĩ cia goro, no tũcione irĩ cia bata tondũ iheanĩtwo nĩ mũndũ twendete wa famĩlĩ kana mũrata twĩhokete. Ũguo nĩguo Jordan ũrĩa ũkũgwetetwo gĩcunjĩ-inĩ kĩa mbere onaga kĩheo kĩrĩa aheetwo nĩ Russell. Ũndũ ũcio ũrahutania atĩa na igongona rĩa Jesu?

Wa mbere, Bibilia yugaga atĩ “Ngai nĩ aatũmire Mũrũ wake wa mũmwe gũkũ thĩ nĩguo tũgĩe na muoyo kũgerera harĩ we.” (1 Johana 4:9) Ũndũ ũcio nĩguo ũtũmaga kĩheo kĩu gĩkorũo kĩrĩ kĩa goro mũno. Gũtirĩ mũndũ kana kĩũmbe gĩkoragwo na ũnene gũkĩra Ngai. Mwandĩki ũmwe wa thaburi oigire ũũ ũhoro-inĩ wĩgiĩ Jehova: “Nĩguo mamenye atĩ wee, o wee wĩtagwo Jehova, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” (Thaburi 83:18) Gũtirĩ mũndũ kana kĩũmbe kĩnene gũkĩra Jehova kĩngĩtũhe kĩheo.

Wa kerĩ, Ngai nĩwe “Ithe witũ.” (Isaia 63:16) Na njĩra ĩrĩkũ? Nĩwe watũheire muoyo. Makĩria ma ũguo, atũrũmbũyagia o ta ũrĩa mũthuri wendete ciana ciake acirũmbũyagia. Ngai akĩaria ũhoro wa andũ amwe ake arĩa eetaga Efiraimu, oririe ũũ: “Anga Efiraimu towe mũrũ wakwa ũrĩa nyendete mũno? . . . Tondũ ũcio ngoro yakwa nĩĩgũtangĩka mũno nĩ ũndũ wake, na ti-itherũ nĩ ngamũiguĩra tha.” (Jeremia 31:20) Ũguo noguo Ngai aiguaga ũmũthĩ nĩ ũndũ wa andũ ake. Jehova nĩwe watũmbire, nĩwe Ithe witũ, na nĩ Mũrata. Na githĩ ũndũ ũcio ndũtũmaga kĩheo o gĩothe atũhe gĩkorũo kĩrĩ kĩa bata mũno?

Iheo imwe ikoragwo irĩ cia bata tondũ mũheani aheanĩte nĩ ũndũ wa wendo no ti tondũ wa kũringĩrĩrio. Mũndũ ũraheana kĩndũ eyendeire nderĩgagĩrĩra kũrĩhwo nĩ ũndũ wa ũrĩa ekĩte.

Ngai aarutire Mũrũ wake nĩ ũndũ witũ tondũ nĩ atwendete. Bibilia yugaga ũũ: “Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe.” Eekire ũguo nĩkĩ? “Nĩguo tũgĩe na muoyo kũgerera harĩ we.” (1 Johana 4:9) Hihi Ngai nĩ kũringĩrĩrio aaringĩrĩirio eke ũguo? Aca! “Thogora ũrĩa Kristo Jesu aarĩhire” wonanagia ‘ũtugi mũnene wa Ngai.’—Aroma 3:24.

Nĩ kĩĩ kĩngĩtũma tuuge atĩ kĩheo kĩa igongona rĩa Jesu kĩonanagia ‘ũtugi mũnene wa Ngai’? Bibilia ĩcokagia ũũ: “No Ngai nĩ atuonetie wendo wake tondũ hĩndĩ ĩrĩa twarĩ ehia, Kristo nĩ aakuire nĩ ũndũ witũ.” (Aroma 5:8) Wendo mũnene wa Ngai nĩguo watũmire ateithie andũ tondũ maarĩ ehia, na matiarĩ na ũhoti wa gwĩkũũra kuuma mehia-inĩ. Gũtirĩ ũndũ tũngĩekire nĩguo twagĩrĩre kuonio wendo ũcio na tũtingĩhota kũrĩha Ngai nĩ ũndũ waguo. Gũtirĩ mũndũ ũrĩ wonania wendo na njĩra ta ĩyo.

Iheo imwe ikoragwo irĩ cia bata nĩ ũndũ wa ũrĩa mũndũ eimĩte nĩguo aheane. Rĩrĩa mũndũ oya kĩndũ gĩake kĩa bata na atũhe na kwĩyendera ategũtara hathara, nĩ tũkenaga mũno tondũ wa ũrĩa eimĩte.

“Ngai nĩ ‘arutire Mũrũ wake wa mũmwe.’ (Johana 3:16) Gũtirĩ mũndũ ũngĩ endete mũno angĩatũheire tiga o Jesu. Mahinda-inĩ marĩa Ngai ombaga thĩ na igũrũ, Jesu aarutaga wĩra marĩ hamwe nake na Ngai nĩ “aakenaga” nĩwe. (Thimo 8:30) Jesu nĩ Mũrũ wa Ngai “ũrĩa endete” na nĩwe “mũhianĩre wa Ngai ũrĩa ũtonekaga.” (Akolosai 1:13-15) Ũrata ũrĩa ũkoragwo ho gatagatĩ ka Ngai na Jesu nĩ mũnene mũno ũũ atĩ tũtingĩhota gũtaarĩria.

O na kũrĩ ũguo, Ngai “ndaagirĩrĩirie nginya Mũrũ wake mwene anyamarĩke.” (Aroma 8:32) Jehova aatũheire kĩndũ kĩrĩa eendete mũno. Gũtirĩ kĩheo kĩngĩ kĩanatũma eime na njĩra nene ũguo.

Iheo imwe cionagwo irĩ cia goro nĩ ũndũ wa kũhingia bata mũna, nginya bata wa na ihenya. Kwa ngerekano, mũndũ angĩĩrutĩra gũkũrĩhĩra thibitarĩ nĩguo ahonokie muoyo waku na nduuma na ũhoti-rĩ, githĩ to ũmũcokerie ngatho mũno! Ũhoro wa ma nĩ atĩ ndũngĩhota kũmũrĩha nĩ ũndũ wa gĩĩko kĩu.

“O ta ũrĩa othe makuaga nĩ ũndũ wa Adamu, noguo othe makaariũkio nĩ ũndũ wa Kristo.” (1 Akorintho 15:22) Tondũ tũrĩ njiarũa cia Adamu, ithuothe nĩ ‘tũkuaga’ nĩ ũndũ tũtingĩhota gwĩthema mĩrimũ na gĩkuũ, o na kana twĩiguithanie na Ngai tũkorũo tũtarĩ na mahĩtia. Na tũtirĩ hinya wa kũhota ‘kũriũkia’ mũndũ ũngĩ o na kana ithuĩ ene. Bibilia yugaga ũũ: “Gũtirĩ ũngĩhota o na atĩa gwĩkũũrĩra mũrũ wa nyina, atĩ arutĩre Ngai kĩndũ kĩngĩmũkũũra.” (Thaburi 49:7) Nĩ tũbataraga ũteithio tondũ tũtingĩhota nginya kwĩrĩhĩra igongona rĩa gũtũkũũra. Ithuĩ tũtingĩhota gwĩkũũra.

Nĩ ũndũ wa wendo mũnene, Jehova nĩ aarĩhire “kĩrĩa” twabataraga nĩguo tũhonokio, na nĩ ũndũ ũcio “othe makaariũkio” kũgerera harĩ Jesu. Igongona rĩa Jesu rĩkahota atĩa gũtũma ũndũ ũcio  ũhinge? “Thakame ya Mũrũwe Jesu nĩ ĩtũtheragia mehia mothe.” Wĩtĩkio harĩ thakame ya Jesu ĩrĩa yaitirũo nĩ ũtũmaga tuoherũo mehia na tũgĩe na kĩĩrĩgĩrĩro kĩa muoyo wa tene na tene. (1 Johana 1:7; 5:13) Igongona rĩa Jesu rĩgaateithia andũ arĩa makuĩte atĩa? “Tondũ gĩkuũ gĩokire kũgerera mũndũ, arĩa akuũ o nao mariũkagio kũgerera mũndũ [Jesu].”—1 Akorintho 15:21. *

Igongona rĩa Jesu nĩrĩo kĩheo kĩrĩa kĩanaheanwo nĩ ũndũ wa wendo mũnene mũno na gũtirĩ kĩũmbe kana mũndũ ũkĩrĩte ũrĩa wakĩheanire. Gũtirĩ mũndũ ũrĩ waheana kĩheo kĩnene ũguo kũrĩ andũ, tiga o Jehova Ngai. Na gũtirĩ kĩheo kĩrĩ gĩatũhingĩria bata mũnene gũkĩra igongona rĩa Jesu rĩrĩa rĩtũkũũraga kuuma kũrĩ mehia na gĩkuũ. Igongona rĩa Jesu norĩo tu kĩheo kĩrĩa gũtarĩ ciugo ingĩtaarĩria ũrĩa gĩtariĩ.