Angĩkorũo Ngai tiwe ũrehaga mĩnyamaro-rĩ, maũndũ ta ng’aragu, ũthĩni ũrĩa ũrathiĩ wongererekete, mbaara, mĩrimũ mĩũru, na icanjama cia ndũire ciumaga kũ? Kiugo kĩa Ngai Bibilia, nĩ kĩonanagia maũndũ matatũ manene marĩa matũmaga andũ manyamarĩke:

1. Mwĩyendo, Ũkoroku, na Rũmena. “Mũndũ akoretwo agĩatha mũndũ agatũmaga one o maũndũ moru.” (Kohelethu 8:9, NW) Kaingĩ andũ nĩ manyamarĩkaga nĩ ũndũ wa kũhinyĩrĩrio nĩ andũ ehia, meyendete na matarĩ tha.

2. Ihinda na Maũndũ Materĩgĩrĩirũo. Kaingĩ andũ manyamarĩkaga tondũ “ihinda na maũndũ materĩgĩrĩirũo [nĩ] makoraga andũ.” (Kohelethu 9:11, NW) Ũguo nĩ kuuga atĩ andũ nĩ makoragwo marĩ handũ harĩa hatagĩrĩire hĩndĩ ĩrĩa ĩtagĩrĩire, ũndũ ũterĩgĩrĩirũo ũkahaanĩka, kana andũ kwaga kũmenyerera ũrĩa mareka kana mageka ũndũ ũrĩa gũtagĩrĩire.

3. Mũtongoria Mũru Ũrĩa Ũtongoragia Thĩ. Bibilia nĩ yonanagia gĩtũmi kĩrĩa kĩnene gĩtũmaga andũ manyamarĩke. Yugaga ũũ: “Thĩ yothe ĩtongoragio nĩ ũrĩa mũru.” (1 Johana 5:19) Ũcio “mũru” nĩ kĩũmbe gĩa kĩĩroho kĩrĩ hinya, Shaitani ũrĩa Mũcukani, ũrĩa kĩambĩrĩria-inĩ warĩ mũraika wa Ngai no “ndeehandire wega ũhoro-inĩ ũrĩa wa ma.” (Johana 8:44) Nĩ kũrĩ araika angĩ maanyitanĩire na Shaitani harĩ kũremera Ngai nĩguo meke kũringana na merirĩria mao ma mwĩyendo, na ũndũ ũcio ũgĩtũma matuĩke ndaimono. (Kĩambĩrĩria 6:1-5) Kuuma hĩndĩ ĩyo Shaitani na ndaimono ciake maaremire, makoretwo magĩtũma gwĩkĩke maũndũ moru na matarĩ ma tha gũkũ thĩ na gĩkĩro kĩnene. Ũndũ ũcio nĩ wonekete wega makĩria mahinda-inĩ maya tũrĩ. Rĩu Mũcukani ‘arahĩtithia thĩ yothe’ tondũ arĩ na marakara manene, na ũndũ ũcio nĩ ũtũmĩte ‘thĩ ĩgĩe na haaro.’ (Kũguũrĩrio 12:9, 12) Nĩ ma, Shaitani nĩ mũtongoria mũru ũtarĩ tha. Aiguaga akenete mũno rĩrĩa andũ maranyamarĩka. Shaitani nĩwe ũtũmaga andũ manyamarĩke, no ti Ngai.

TA WĨCIRIE: Mũndũ ũtarĩ tha na mũũru biũ nowe tu ũngĩenda andũ matarĩ na mahĩtia manyamarĩke. Ngũrani na ũguo, Bibilia yugaga: “Ngai nĩ wendo.” (1 Johana 4:8) Nĩ ũndũ wa wendo wake, “gũtingĩhoteka Ngai ũrĩa wa ma eke maũndũ ma waganu, kana Mwene-Hinya-Wothe eke maũndũ moru!”—Ayubu 34:10, NW.

O na kũrĩ ũguo-rĩ, mũndũ no eyũrie, ‘Ngai Mwene-Hinya-Wothe ekũrekereria Shaitani athiĩ na mbere na wathani wake mũũru nginya rĩ?’ O ta ũrĩa tuona, Ngai nĩ athũire maũndũ moru, na nĩ aiguaga ũũru mũno rĩrĩa tũranyamarĩka. Makĩria ma ũguo, Kiugo gĩake kiugaga: ‘Mũikagĩriei mĩtangĩko yanyu yothe, nĩ ũndũ nĩ amũrũmbũyagia.’ (1 Petero 5:7) Ngai nĩ atwendete na nĩ arĩ ũhoti wa kweheria mĩnyamaro yothe na wagi wa kĩhooto, ta ũrĩa gĩcunjĩ kĩrĩa kĩrũmĩrĩire gĩgũtaarĩria. *