1, 2. Nĩ ũndũ ũrĩkũ Jesu eekire hwaĩ-inĩ wa Nisani 14, mwaka wa 33? (Rora mbica kĩambĩrĩria-inĩ gĩa gĩcunjĩ gĩkĩ.)

NĨ HWAĨ-INĨ wa Nisani 14, mwaka wa 33. Mweri ũroneka wega ũrĩ wothe thĩinĩ wa Jerusalemu. No hĩndĩ Jesu na atũmwo ake marĩkia gũkũngũĩra Pasaka, makĩririkana ũrĩa Jehova aahonokirie Aisiraeli kuuma ũkombo-inĩ Misiri mĩaka 1,500 mĩhĩtũku. Thutha ũcio akarĩanĩra irio cia mwanya na atũmwo ake 11 ehokeku. Ũguo nĩguo arũmĩrĩri ake marĩkaga o mwaka makĩririkana gĩkuũ gĩake. *​—Mat. 26:​1, 2.

² Jesu agacokia ngatho agacoka akahĩtũkĩria atũmwo ake mũgate ũtarĩ mwĩkĩre ndawa ya kũimbia, akameera ũũ: “Kai, mũrĩe.” Ningĩ akoya gĩkombe kĩa ndibei, o rĩngĩ agacokia ngatho, agacoka akameera ũũ: “Nyuanĩrai inyuothe.” (Mat. 26:​26, 27) Mũgate ũcio na ndibei irarũgamĩrĩra kĩndũ kĩa goro mũno. Atũmwo acio ehokeku nĩ mekwĩruta maũndũ maingĩ mũno ũtukũ ũyũ wa mwanya.

3. Gĩcunjĩ gĩkĩ gĩkwarĩrĩria ciũria irĩkũ?

³ Nĩ ũndũ ũcio, Jesu akĩambĩrĩria Kĩririkano gĩa gĩkuũ gĩake  kana ‘Irio cia Hwaĩ-inĩ cia Mwathani.’ (1 Kor. 11:20) O na kũrĩ ũguo, andũ amwe mahota kwĩyũria ũũ: Twagĩrĩirũo kũririkana gĩkuũ kĩa Jesu nĩkĩ? Mũgate na ndibei irũgamĩrĩire kĩĩ? Tũngĩĩhaarĩria atĩa nĩ ũndũ wa Kĩririkano? Nĩa magĩrĩire kũrĩa mũgate na kũnyua ndibei? Akristiano maiyũkagia atĩa ũrĩa Maandĩko moigaga igũrũ rĩgiĩ kĩĩrĩgĩrĩro kĩrĩa marĩ nakĩo?

4. Gĩkuũ kĩa Jesu kĩahotithirie ũndũ ũrĩkũ?

⁴ Tondũ tũrĩ njiarũa cia Adamu, nĩ twagaire mehia na gĩkuũ. (Rom. 5:​12) Nĩ ũndũ wa kwaga gũkinyanĩra, gũtirĩ mũndũ ũngĩhota kũrutĩra Ngai kĩndũ gĩa gũkũũra muoyo wake kana wa andũ arĩa angĩ. (Thab. 49:​6-9) O na kũrĩ ũguo, kũgerera gĩkuũ gĩake, Jesu nĩ aarutire irĩhi rĩtĩkĩrĩku rĩa ũkũũri na nĩrĩo mwĩrĩ wake mũkinyanĩru na thakame ĩrĩa aaitire. Nĩ ũndũ wa gũtwarĩra Ngai thogora wa ũkũũri, Jesu nĩ aahotithirie andũ makũũrũo kuuma mehia-inĩ na gĩkuũ na makĩgĩa na kĩĩrĩgĩrĩro gĩa gũkaaheo muoyo wa tene na tene.​—Rom. 6:​23; 1 Kor. 15:​21, 22.

5. (a) Tũmenyaga atĩa atĩ Ngai na Kristo nĩ mendete andũ? (b) Twagĩrĩirũo gũthiĩ Kĩririkano gĩa gĩkuũ kĩa Jesu nĩkĩ?

⁵ Igongona rĩa ũkũũri nĩ ũira wa atĩ Ngai nĩ endete andũ. (Joh. 3:​16) Ningĩ Jesu gwĩtĩkĩra kũruta muoyo wake, nĩ ũira wa atĩ o nake nĩ atwendete. Atanoka gũkũ thĩ, aarĩ “njorua ya wĩra” ya Ngai na nĩ ‘aakenagio nĩ andũ.’ (Thim. 8:​30, 31, New World Translation) Twagĩrĩirũo kuonanagia ngatho citũ harĩ Ngai na Mũriũ wake na njĩra ya gũthiĩ Kĩririkano gĩa gĩkuũ kĩa Jesu, na nĩ ũndũ ũcio tũgathĩkĩra watho ũyũ: “Ĩkagai ũũ nĩgetha mũndirikanage.”​—1 Kor. 11:​23-​25.

6. Twagĩrĩirũo kuona atĩa mũgate na ndibei ĩrĩa ĩhũthagĩrũo hĩndĩ ya Kĩririkano?

⁶ Rĩrĩa Jesu aambagĩrĩria Kĩririkano, ndaacenjirie mũgate na ndibei igĩtuĩka mwĩrĩ na thakame yake. Ithenya rĩa ũguo, oigire ũũ igũrũ rĩgiĩ mũgate: “Ũyũ ũrũgamĩrĩire mwĩrĩ wakwa.” Akĩaria ũhoro wa ndibei, oigire ũũ: “Ĩno ĩrũgamĩrĩire ‘thakame yakwa ya kĩrĩkanĩro,’ ĩrĩa ĩgũitwo nĩ ũndũ wa andũ aingĩ.” (Mar. 14:​22-​24, NW) Kwoguo hatirĩ nganja atĩ mũgate na ndibei ciarĩ indo cia kũrũgamĩrĩra mwĩrĩ na thakame ya Jesu.

7. Mũgate ũrĩa ũhũthagĩrũo hĩndĩ ya Kĩririkano ũrũgamagĩrĩra kĩĩ?

⁷ Mũthenya ũcio wa mwanya mwaka-inĩ wa 33, Jesu aahũthĩrire mũgate ũtarĩ mwĩkĩre ndawa ya kũimbia ũrĩa watigarĩte marĩkia kũrĩa Pasaka. (Tham. 12:8) Rĩmwe na rĩmwe thĩinĩ wa Maandĩko, ndawa ya kũimbia ĩrũgamagĩrĩra thahu kana mehia. (Mat. 16:​6, 11, 12; Luk. 12:1) Gũkĩrĩ ũguo, mũgate ũtarĩ mwĩkĩre ndawa ya kũimbia ũrĩa Jesu aahũthĩrire, warũgamĩrĩire mwĩrĩ wake ũtarĩ na mehia. (Ahib. 7:​26) Mũgate ta ũcio nĩguo ũhũthagĩrũo hĩndĩ ya Kĩririkano.

8. Ndibei ĩrĩa ĩhũthagĩrũo hĩndĩ ya Kĩririkano ĩrũgamagĩrĩra kĩĩ?

⁸ Nayo ndibei ĩrĩa Jesu aahũthĩrire Nisani 14, mwaka wa 33, yarũgamĩrĩire thakame yake. Ndibei ĩrĩa tũhũthagĩra hĩndĩ ya Kĩririkano mahinda-inĩ maya o nayo ĩrũgamagĩrĩra thakame ya Jesu. Nĩguo “mehia mohanĩrũo,” thakame ya Jesu nĩ yaitirũo. Yaitirũo handũ heetagwo Gologotha, nja ya itũũra rĩa Jerusalemu. (Mat. 26:28; 27:33) Mũgate na ndibei iria ihũthagĩrũo hĩndĩ ya Kĩririkano irũgamagĩrĩra igongona rĩa goro rĩrĩa rĩarutirũo nĩ ũndũ wa andũ arĩa mathĩkagĩra Jehova, na nĩ tũcokagia ngatho mũno nĩ ũndũ wa kĩheo kĩu. Nĩ ũndũ ũcio, harĩ bata tũrĩ o mũndũ kĩũmbe twĩhaaragĩrie nĩ ũndũ wa Kĩririkano kĩa o mwaka kĩa Irio cia Hwaĩ-inĩ cia Mwathani.

9. (a) Nĩkĩ nĩ harĩ bata gũtwarana na mũtaratara wa ũthomi wa Bibilia wa Kĩririkano? (b) Wee wonaga atĩa igongona rĩa ũkũũri?

⁹ Tũngĩrũmĩrĩra mũtaratara wa ũthomi wa  Bibilia wa Kĩririkano ũrĩa ũkoragwo thĩinĩ wa karenda itũ na thĩinĩ wa kabuku ga Gũthuthuria Maandĩko o Mũthenya, no tũhote gwĩcũrania maũndũ marĩa Jesu eekire kahinda kanini mbere ya gĩkuũ gĩake. Gwĩka ũguo no gũtũteithie kũhaarĩria ngoro citũ nĩ ũndũ wa Irio cia Hwaĩ-inĩ cia Mwathani. * Mwarĩ wa Ithe witũ ũmwe aandĩkire ũũ: ‘Tũũragia Kĩririkano gĩgaakinya rĩ. O mwaka o mwaka, ihinda rĩu rĩtuĩkaga rĩa mwanya makĩria. Nĩ ndirikanaga mũthenya ũmwe ndũgamĩte mocarĩ-inĩ ndorete mwĩrĩ wa baba, na ũndũ ũcio nĩ watũmire ngĩe na ngatho cia kuuma ngoro nĩ ũndũ wa igongona rĩa ũkũũri. Ma nĩ atĩ, o na hau kabere nĩ ndoĩ na nĩ ingĩataarĩirie maandĩko mothe marĩa maragia ũhoro wa ũkũũri. Ĩndĩ hĩndĩ ĩrĩa ndaaiguire ruo rwa gũkuĩrũo, nĩrĩo ndecũranirie maũndũ marĩa tũkaahingĩrio kũgerera igongona rĩu rĩa goro mũno, na nĩ ũndũ ũcio ngĩigua ndacokwo nĩ thayũ.’ Hatarĩ nganja, rĩrĩa tũrehaarĩria nĩ ũndũ wa Kĩririkano, nĩ wega gwĩcũrania ũrĩa igongona rĩa Jesu rĩtũkũũraga kuuma thĩna-inĩ mũnene ũrĩa ũrehagwo nĩ mehia na gĩkuũ.

10. Nĩ atĩa ũngĩ tũngĩka tũkĩĩhaarĩria nĩ ũndũ wa Kĩririkano?

¹⁰ Njĩra ĩngĩ ya kwĩhaarĩria no ĩkorũo ĩrĩ kuongerera ũtungata witũ, hihi na njĩra ya gũtuĩka mapainia a gũteithĩrĩria mĩeri-inĩ ĩyo ya Kĩririkano. Rĩrĩa tũranyita ũgeni arutwo a Bibilia na andũ angĩ moke Kĩririkano, nĩ tũrĩgĩaga na gĩkeno kĩrĩa kiumanaga na kwaria ũhoro wa Jehova, Mũriũ wake, na irathimo iria ikaaheo arĩa mathĩkagĩra Jehova na makamũgooca.​​—Thab. 148:​12, 13.

11. Akristiano amwe a Korintho maagaga gwĩtĩkĩrĩka nĩkĩ maarĩa mũgate na ndibei ya Kĩririkano?

¹¹ Ũkĩĩhaarĩria nĩ ũndũ wa Irio cia Hwaĩ-inĩ cia Mwathani, wĩcirie ũrĩa mũtũmwo Paulo aandĩkĩire kĩũngano gĩa Gĩkristiano thĩinĩ wa Korintho. (Thoma 1 Akorintho 11:​27-34.) Paulo oigire atĩ mũndũ o wothe ũrĩa ũrĩaga mũgate ũcio kana akanyuĩra gĩkombe kĩu atarĩ mwagĩrĩru, ‘nĩ kwĩhia ehagia mwĩrĩ na thakame ya Mwathani’ Jesu Kristo. Nĩ ũndũ ũcio, Mũkristiano o wothe mũitĩrĩrie maguta agĩrĩirũo ‘kwamba gwĩtuĩria wega amenye ũrĩa atariĩ’ agĩcoka kũrĩa mũgate ũcio na kũnyuĩra gĩkombe kĩu. Angĩaga gwĩka ũguo, “nĩ cira ekwĩigĩra.” Nĩ ũndũ wa gũkorũo matarĩ na mĩthiĩre mĩega, Akristiano aingĩ a Korintho ‘maakoragwo mamocete na magaikara ta marũarĩte, ningĩ arĩa maakuĩte kĩĩroho ti anyinyi.’ No kũhoteke amwe maakoragwo marĩte na makanyua mũno mbere kana hĩndĩ ya Kĩririkano, nginya makaaga gũkorũo meiguĩte kĩĩroho na kĩĩmeciria.  Kũrĩa mũgate na kũnyua ndibei ya Kĩririkano matariĩ ũguo nĩ gwatũmaga mage gwĩtĩkĩrĩka nĩ Ngai.

12. (a) Paulo aaringithanirie Kĩririkano na kĩĩ, na nĩ mũkaana ũrĩkũ aaheanire? (b) Mũkristiano ũrĩaga mũgate na akanyua ndibei agĩrĩirũo gwĩka atĩa angĩkorũo nĩ ekĩte mehia maritũ?

¹² Paulo aaringithanirie Kĩririkano na irio irarĩanĩrũo nĩ andũ, na nĩ ũndũ ũcio akĩhe arĩa marĩaga mũgate na makanyuĩra gĩkombe kĩu mũkaana ũyũ: “Mũtingĩhota kũnyuĩra gĩkombe kĩa Mwathani o na mũnyuĩre gĩkombe kĩa ndaimono, cierĩ; na mũtingĩhota kũrĩa irio cia metha ya Mwathani o na cia metha ya ndaimono.” (1 Kor. 10:​16-​21) Angĩkorũo Mũkristiano ũrĩaga mũgate na akanyua ndibei hĩndĩ ya Irio cia Hwaĩ-inĩ cia Mwathani nĩ ekĩte mehia maritũ, agĩrĩirũo kwamba gũcaria ũteithio wa kĩĩroho. (Thoma Jakubu 5:​14-16.) Mũkristiano ta ũcio mũitĩrĩrie maguta angĩonania “maciaro marĩa maringaine na kwĩrira” acoke arĩe mũgate na anyuĩre gĩkombe kĩu, ndangĩkorũo akĩnyarara igongona rĩa Jesu.​—Luk. 3:8.

13. Nĩkĩ nĩ wega kũhoya igũrũ rĩgiĩ kĩĩrĩgĩrĩro kĩrĩa tũheetwo nĩ Ngai?

¹³ Tũkĩĩhaarĩria nĩ ũndũ wa Kĩririkano nĩ wega gwĩcũrania na njĩra ya mahoya kĩĩrĩgĩrĩro kĩrĩa Ngai atũheete tũrĩ o mũndũ, gĩkorũo kĩrĩ gĩa gũtũũra gũkũ thĩ kana gĩa gũthiĩ igũrũ. Gũtirĩ mũthathaiya wa Jehova na mũrũmĩrĩri mwĩhokeku wa Mũriũ wake ũngĩenda kũnyarara igongona rĩa Jesu na njĩra ya kũrĩa mũgate na kũnyuĩra gĩkombe kĩu, angĩkorũo ndarĩ na ma biũ atĩ we nĩ Mũkristiano mũitĩrĩrie maguta. Gũkĩrĩ ũguo-rĩ, mũndũ angĩmenya atĩa kana nĩ agĩrĩirũo nĩ kũrĩa mũgate na kũnyua ndibei?

14. Kĩrĩkanĩro kĩrĩa kĩerũ gĩkonainie atĩa na kũrĩa mũgate na kũnyua ndibei hĩndĩ ya Kĩririkano?

¹⁴ Arĩa marĩaga mũgate na makanyua ndibei hĩndĩ ya Kĩririkano nĩ makoragwo na ma biũ atĩ marĩ thĩinĩ wa kĩrĩkanĩro kĩrĩa kĩerũ. Akĩaria ũhoro wa ndibei, Jesu oigire ũũ: ‘Gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa.’ (1 Kor. 11:25) Kũgerera mũnabii Jeremia, Ngai nĩ aarathĩte atĩ nĩ angĩgaathondeka kĩrĩkanĩro kĩerũ ngũrani na kĩrĩkanĩro kĩa Watho kĩrĩa aarĩkanĩire na Aisiraeli. (Thoma Jeremia 31:​31-​34.) Ngai nĩ aarĩkanĩire kĩrĩkanĩro kĩu kĩerũ na Aisiraeli a kĩĩroho. (Gal. 6:​15, 16) Kĩrĩkanĩro kĩu nĩ kĩambĩrĩirie kũruta wĩra nĩ ũndũ wa igongona rĩa Kristo kũgerera thakame yake ĩrĩa yaitirũo. (Luk. 22:20) Jesu nĩwe Mũiguithania wa kĩrĩkanĩro kĩrĩa kĩerũ, nao Akristiano aitĩrĩrie maguta arĩa marĩ thĩinĩ wa kĩrĩkanĩro kĩu nĩ magaakorũo hamwe nake igũrũ.​—Ahib. 8:6; 9:​15.

15. Nĩa marĩ thĩinĩ wa kĩrĩkanĩro kĩa Ũthamaki, na makaaheo wĩra ũrĩkũ matũũra marĩ ehokeku?

¹⁵ Akristiano arĩa marĩaga mũgate na makanyua ndibei hĩndĩ ya Kĩririkano ningĩ nĩ mamenyaga atĩ marĩ thĩinĩ wa kĩrĩkanĩro kĩa Ũthamaki. (Thoma Luka 12:32.) Arĩa maatuĩkire arũmĩrĩri a Jesu aitĩrĩrie maguta na magĩtũũra marĩ ehokeku rungu rwa magerio, nĩ magaakorũo na itemi thĩinĩ wa Ũthamaki wake wa igũrũ. (Afil. 3:​10) Tondũ marĩ thĩinĩ wa kĩrĩkanĩro kĩa Ũthamaki, Akristiano acio ehokeku aitĩrĩrie maguta magaathamaka hamwe na Kristo kũrĩa igũrũ tene na tene. (Kũg. 22:5) Acio nĩo magĩrĩirũo nĩ kũrĩa mũgate na kũnyua ndibei hĩndĩ ya Irio cia Hwaĩ-inĩ cia Mwathani.

16. Taarĩria na njĩra nguhĩ ũrĩa Aroma 8:​15-​17 yugĩte.

¹⁶ Arĩa magĩrĩirũo nĩ kũrĩa mũgate na kũnyua ndibei hĩndĩ ya Kĩririkano no arĩa tu marĩ na ũira wa roho mũtheru atĩ o nĩ ciana cia Ngai. (Thoma Aroma 8:​15-​17.) Ũngĩrora nĩ ũkuona atĩ Paulo aahũthĩrire kiugo gĩa Kĩaramu “Abba,” kĩrĩa kiugĩte “Baba!” Mwana no ahũthĩre kiugo kĩu akĩaria na ithe, tondũ nĩ kiugo kĩhũthagĩrũo kuonania wendo o ta kiugo “awa” na nĩ gĩa gĩtĩo o ta kiugo “baba.”  Arĩa ‘mahetwo roho wa kũmatua ariũ’ nĩ matuĩkĩte ciana cia Ngai cia kĩĩroho. Roho wa Ngai nĩ ũrutaga ũira hamwe na maroho mao, ũkamateithia kũmenya atĩ hatarĩ nganja o nĩ ariũ a Jehova aitĩrĩrie maguta. To kwenda mendaga gũthiĩ igũrũ tu, ĩndĩ nĩ makoragwo na ma biũ atĩ, mangĩtũũra marĩ ehokeku nĩ magaathamaka na Jesu thĩinĩ wa Ũthamaki wa igũrũ. Harĩ Akristiano acio 144,000 arĩa “ahake maguta nĩ Ũrĩa Mũtheru,” Jehova, no anini atigaru ũmũthĩ. (1 Joh. 2:​20; Kũg. 14:1) Roho wake nĩguo ũmahotithagia kwanĩrĩra makoiga “Abba, Baba!” Na githĩ ti kĩrathimo kĩnene gũkorũo na ũkuruhanu ta ũcio na Ngai!

17. Arĩa aitĩrĩrie maguta makoragwo na kĩĩrĩgĩrĩro kĩrĩkũ, na maiguaga atĩa igũrũ rĩa kĩo?

¹⁷ Angĩkorũo ũrĩ Mũkristiano mũitĩrĩrie maguta, maita maingĩ nĩ ũgwetaga kĩĩrĩgĩrĩro gĩa gũthiĩ igũrũ mahoya-inĩ maku. Ningĩ rĩrĩa Bibilia ĩkwaria ũhoro wa ‘kĩrĩko gĩa kũhikio’ nĩ Jesu Kristo, Mũhikania wa kũrĩa igũrũ, nĩ ũmenyaga atĩ ũndũ ũcio nĩ ũkũhutĩtie, na ũkerirĩria mũno gũtuĩka gĩcunjĩ kĩa “mũhiki” wa Kristo. (2 Kor. 11:2; Joh. 3:​27-​29; Kũg. 21:​2, 9-​14) Rĩrĩa Ngai aroiga thĩinĩ wa Kiugo gĩake ũrĩa endete ariũ ake a kĩĩroho, ugaga ũũ: “Ndĩ ũmwe wao.” Na rĩrĩa Kiugo kĩa Jehova kĩrahe ariũ ake aitĩrĩrie maguta ũtongoria, roho mũtheru nĩ ũgũtindĩkaga gwathĩka na kuuga ũũ ngoro-inĩ yaku: “Hau nĩ niĩ ndĩrerũo.” Nĩ ũndũ ũcio, roho wa Ngai na roho waku ũkaiguithanĩria atĩ wee ũrĩ na kĩĩrĩgĩrĩro gĩa gũthiĩ igũrũ.

18. Arĩa a “ng’ondu ingĩ” makoragwo na kĩĩrĩgĩrĩro kĩrĩkũ, na ũiguaga atĩa igũrũ rĩa kĩo?

¹⁸ Ningĩ, angĩkorũo ũrĩ wa “kĩrĩndĩ kĩingĩ” kĩa “ng’ondu ingĩ,” Ngai akũheete kĩĩrĩgĩrĩro gĩa gũgaatũũra gũkũ thĩ. (Kũg. 7:9; Joh. 10:16) Ũiguaga ũkĩenda gũtũũra thĩinĩ wa Paradiso, na nĩ ũkenaga mũno ũgĩĩcũrania ũrĩa Bibilia yugaga ũhoro wa ũtũũro thĩinĩ wa thĩ mahinda maroka. Nĩ wĩriragĩria mũno rĩrĩa ũgaatũũra thĩinĩ wa thĩ ĩrĩ na thayũ mũingĩ ũthiũrũrũkĩirio nĩ andũ a famĩlĩ na andũ angĩ athingu. Nĩ wetagĩrĩra mũno gũkoona hĩndĩ ĩrĩa andũ matagacoka kũgio nĩ ng’aragu, ũthĩni, mĩnyamaro, mĩrimũ, na gĩkuũ. (Thab. 37:​10, 11, 29; 67:6; 72:​7, 16; Isa. 33:24) No mũhaka akorũo nĩ wĩriragĩria mũno kũnyita ũgeni andũ arĩa makaariũkio matũũre gũkũ thĩ tene na tene. (Joh. 5:​28, 29) Na githĩ ndũcokagĩria Jehova ngatho mũno nĩ ũndũ wa gũkũrathima na kĩĩrĩgĩrĩro kĩu gĩa gũtũũra gũkũ thĩ? O na gũtuĩka ndũrĩaga mũgate kana ũkanyua ndibei hĩndĩ ya Kĩririkano, nĩ ũthiaga Kĩririkano nĩguo wonanie ngatho ciaku nĩ ũndũ wa igongona rĩa ũkũũri rĩa Jesu Kristo.

19, 20. (a) Wagĩrĩirũo gwĩka atĩa nĩguo ũkaahingĩrio kĩĩrĩgĩrĩro gĩaku? (b) Ũkaagunĩka atĩa wathiĩ Kĩririkano?

¹⁹ O na angĩkorũo kĩĩrĩgĩrĩro gĩaku nĩ gĩa gũtũũra gũkũ thĩ kana nĩ gĩa gũthiĩ igũrũ, ũkaahingĩrio kĩĩrĩgĩrĩro kĩu angĩkorũo tu nĩ ũkuonania wĩtĩkio harĩ Jehova, Jesu Kristo, na harĩ igongona rĩa ũkũũri. Wathiĩ Kĩririkano, nĩ ũgaakorũo na mweke wa gwĩcũrania ũhoro wa kĩĩrĩgĩrĩro gĩaku na bata wa gĩkuũ kĩa Jesu. Nĩ ũndũ ũcio, tigĩrĩra atĩ ũgaakorũo ũrĩ ũmwe thĩinĩ wa andũ milioni nyingĩ arĩa magaakorũo kuo hĩndĩ ya Irio cia Hwaĩ-inĩ cia Mwathani riũa rĩathũa Njumaa, Ĩpuro 3, 2015. Igongona rĩu rĩgaakorũo thĩinĩ wa Nyũmba cia Ũthamaki na kũndũ kũngĩ thĩinĩ wa thĩ yothe.

²⁰ Gũthiĩ Kĩririkano no gũtũme ngatho ciaku harĩ igongona rĩa ũkũũri rĩrĩa Jesu aarutire ciongerereke. Gũthikĩrĩria na kinyi mĩario ĩrĩa ĩkaarutwo no gũgũtindĩke wonanie wendo waku harĩ andũ arĩa angĩ na njĩra ya kũmahunjĩria maũndũ marĩa wĩrutĩte megiĩ wendo wa Jehova na muoroto wake wa magegania harĩ andũ. (Mat. 22:​34-​40) Geria o ũrĩa wothe ũngĩhota nĩguo ũgaakorũo kuo hĩndĩ ya Irio cia Hwaĩ-inĩ cia Mwathani.