ANTOINE SKALECKI arĩ kamwana, nĩ aakoragwo na mbarathi ĩrĩa aatindaga nayo. Akĩhũthĩra mbarathi ĩyo, nĩ aakuuaga mĩrigo ya mũthemba mũna wa makara marĩa menjagwo na gũkũ thĩ, miungu-inĩ yarĩ na ũtheri mũnini kware-inĩ ciarĩ na ũriku wa fiti 1,600. Baba wa Antoine nĩ aaguraririo hĩndĩ ĩmwe irima rĩamomokire, ũndũ ũrĩa watũmire Antoine athiĩ akarutage wĩra mathaa kenda o mũthenya marima-inĩ macio ma kwenja makara. Hĩndĩ ĩmwe Antoine aarĩ hakuhĩ gũkua rĩrĩa irima rĩrĩa aarĩ rĩamomokire.

Antoine nĩ ũmwe wa ciana nyingĩ iria ciaciarĩirũo Faranja nĩ aciari moimĩte Poland mĩaka-inĩ ya 1920 na 1930. Nĩ kĩĩ gĩatũmire andũ a kuuma Poland mathaamĩre Faranja? Hĩndĩ ĩrĩa Poland yacokeirio wĩyathi thutha wa Mbaara ya Mbere ya Thĩ, nĩ kwagĩire na thĩna wa gũkorũo kũrĩ na andũ aingĩ mũno. Nakuo Faranja, arũme makĩria ma milioni ĩmwe nĩ maakoretwo maakua mbaara-inĩ na kwoguo nĩ kwarĩ na bata mũnene wa andũ a kwenja makara. Nĩ ũndũ ũcio, kũrĩ Septemba mwaka-inĩ wa 1919, thirikari ya Faranja na ya Poland ikĩiguithanĩria andũ a Poland mathaamĩre Faranja. Gũkinyĩria mwaka wa 1931 andũ a kuuma Poland arĩa maarĩ Faranja maarĩ 507,800, na aingĩ ao maaikaraga icigo-inĩ iria ciarĩ na kware cia kwenjwo makara mwena wa rũgongo.

Andũ a kuuma Poland arĩa maarĩ na kĩyo nĩ mookire na ũndũire wao, o hamwe na maũndũ marikĩru ma ndini. Antoine ũrĩa rĩu wĩ na mĩaka 90, aririkanaga ũũ: “Guka witũ Joseph nĩ aaragĩrĩria ũhoro wa Maandĩko Matheru arĩ na wĩtĩkio ũrĩa aathomithĩtio nĩ baba wao.” Mĩthenya ya Kiumia, andũ acio a Poland nĩ meehumbaga wega magĩthiĩ kanitha, o ta ũrĩa meekaga marĩ mũciĩ kwao Poland o na okorũo andũ amwe a Faranja nĩ maamahũthagia mũno.

Gĩcigo-inĩ kĩa Nord-Pas-de-Calais nĩkuo aikari aingĩ a kuuma Poland maacemanirie na Arutwo a Bibilia riita rĩa mbere, arĩa maakoretwo makĩhunjia na kĩyo kuuma mwaka wa 1904. Kũrĩ mwaka wa 1915 The Watch Tower nĩ yambĩrĩirie gũcabwo o mweri na rũthiomi rwa Kĩpoland, nayo The Golden Age (ĩrĩa rĩu ĩtagwo Arahũkai!) ĩkĩambĩrĩria gũcabwo na rũthiomi rũu mwaka-inĩ wa 1925. Famĩlĩ nyingĩ nĩ cietĩkagĩra maũndũ ma Kĩĩmaandĩko marĩa maarĩrĩirio thĩinĩ wa ngathĩti icio, o hamwe na ibuku The Harp of God rĩa Kĩpoland.

Famĩlĩ ya Antoine yamenyire ũhoro wa Arutwo a  Bibilia kuuma kũrĩ mama wao, ũrĩa wathiire mĩcemanio rĩa mbere 1924. Mwaka-inĩ o ũcio, Arutwo a Bibilia nĩ meekire kĩgomano kĩao kĩa mbere thĩinĩ wa Bruay-en-Artois, na rũthiomi rwa Kĩpoland. Mweri ũmwe ũtarĩ mũthiru mũrũgamĩrĩri wa wabici nene ya Aira a Jehova Joseph F. Rutherford nĩ aaheanĩre mĩario taũni-inĩ ĩyo kũrĩa andũ 2,000 maagomanĩte. Thutha wa kuona ũrĩa andũ aingĩ a Poland mookĩte mũcemanio-inĩ ũcio, mũrũ wa Ithe witũ Rutherford aamerire ũũ: “Jehova aamũrehire Faranja mwĩrute ũhoro wa ma. Rĩu inyuĩ hamwe na ciana cianyu no mũhaka mũteithie andũ a Faranja! Kũrĩ na wĩra mũingĩ mũno wa kũhunjia, na Jehova nĩ ekũheana andũ a kũruta wĩra ũcio.”

Na ũguo noguo Jehova Ngai eekire! Akristiano acio a kuuma Poland meerutanagĩria na ngoro yao yothe wĩra-inĩ wa kũhunjia o ta ũrĩa meerutanagĩria kwenja makara. Amwe ao, ona nĩ maacokire kwao Poland nĩguo makahunjĩrie andũ arĩa angĩ ũhoro ũrĩa mwega meerutĩte. Teofil Piaskowski, Szczepan Kosiak, na Jan Zabuda nĩ amwe a arĩa moimire Faranja nĩguo mathiĩ makahunjie ũhoro mwega bũrũri-inĩ wa Poland.

No ahunjia aingĩ arĩa maaragia Kĩpoland maatigirũo Faranja na magĩthiĩ na mbere kũhunjia marĩ na kĩyo marĩ na Akristiano a kuuma Faranja. Kĩgomano-inĩ kĩa mwaka wa 1926 kĩrĩa gĩekĩirũo taũni-inĩ ya Sin-le-Noble, andũ 1,000 maathikĩrĩirie tabarĩra na Kĩpoland, nao andũ 300 magĩthikĩrĩria na Kĩfaranja. Ibuku rĩa Kitabu cha Mwaka rĩa 1929 rĩaheanire riboti ĩno: “Mwaka ũcio ũrathirire, aarĩ na ariũ a Ithe witũ 332 a kuuma Poland nĩ marabatithirio.” Mbaara ya Kerĩ ya Thĩ ĩtanambĩrĩria ciũngano 32 harĩ 84 iria ciarĩ Faranja ciaahũthagĩra rũthiomi rwa Kĩpoland.

Mwaka-inĩ wa 1947 aingĩ a Aira a Jehova nĩ maacokire bũrũri wa Poland thutha wa thirikari kũũria andũ macoke kwao. No o na thutha wa kũinũka kwao, wĩra ũrĩa maarutĩte marĩ hamwe na arĩa angĩ maaragia Kĩfaranja nĩ wonekire kũgerera wongerereku wa ahunjia mwaka ũcio. Mĩaka-inĩ ya 1948 nginya 1950 nĩ kwarĩ na wongerereku mũnene makĩria wa ahunjia. Nĩguo gũteithĩrĩria ahunjia acio erũ, wabici ya rũhonge ya Faranja nĩ yaamũrire arori a mũthiũrũrũko mwaka-inĩ wa 1948. Harĩ arori atano a mũthiũrũrũko arĩa maamũrirũo, ana ao mooimĩte Poland, na Antoine Skalecki aarĩ ũmwe wao.

Aingĩ a Aira a Jehova bũrũri-inĩ wa Faranja no makoragwo na marĩĩtwa ma Kĩpoland ma aciari ao a hau kabere, arĩa maarutire wĩra na kĩyo kware-inĩ cia kwenja makara na ũtungata-inĩ. O na ũmũthĩ, bũrũri-inĩ wa Faranja nĩ kũrĩ na andũ aingĩ moimĩte mabũrũri mangĩ mareruta ũhoro wa ma. O na angĩkorũo ahunjia kuuma mabũrũri mangĩ no macoke mabũrũri-inĩ mao kana maikare kũrĩa mathiĩ, marũmagĩrĩra kĩonereria kĩa ahunjia a Ũthamaki kuuma Poland arĩa maathamĩire Faranja marĩ na kĩyo.—Kuuma mũthithũ-inĩ witũ bũrũri-inĩ wa Faranja.