HIHI mahoya nĩ matũgunaga na njĩra o yothe? Bibilia yonanagia atĩ mahoya ma ndungata njĩhokeku cia Ngai nĩ macigunaga mũno. (Luka 22:40; Jakubu 5:13) Ũrĩa kũrĩ nĩ atĩ, mahoya no matũgune kĩĩroho, kĩĩmeciria, na kĩĩmwĩrĩ. Na njĩra ĩrĩkũ?

Kwa ngerekano, ta nĩ tũtue atĩ mwana waku nĩ aheo kĩheo. Hihi ũngĩmũruta kũigua arĩ na ngatho tu, kana ũngĩmũruta gũcokagia ngatho? Rĩrĩa twacokia ngatho nĩ tũiguaga tũrĩ na ngatho o na makĩria. Hihi ũguo nĩguo tũiguaga rĩrĩa tũraria na Ngai? Hatarĩ nganja nĩguo tũiguaga. Ta wĩcirie ngerekano ici.

Mahoya ma gũcokia ngatho. Rĩrĩa twacokeria Ithe witũ ngatho nĩ ũndũ wa maũndũ mega marĩa matũhaanĩkĩire, tũkoragwo tũkĩiga meciria maitũ harĩ irathimo citũ. Nĩ ũndũ ũcio no tũigue tũrĩ na ngatho makĩria, tũrĩ akenu makĩria, na tũrĩ na muonere mwega wa maũndũ.​—Afilipi 4:6.

Ngerekano: Jesu nĩ aacokirie ngatho nĩ ũndũ wa ũrĩa Ithe aamũthikĩrĩirie na akĩmũcokeria mahoya make.—Johana 11:41.

Kũhoya tuoherũo. Rĩrĩa twahoya Ngai atuohere nĩ twĩkĩraga hinya thamiri citũ, tũkerira kuuma ngoro, na tũkona wega ũritũ wa mehia maitũ. Ningĩ nĩ tũtigaga kũritũhĩrũo nĩ mehia marĩa twĩkĩte.

Ngerekano: Daudi nĩ aahoire nĩguo acũnge mũhera na akĩonania kĩeha kĩrĩa aarĩ nakĩo nĩ ũndũ wa mehia make.—Thaburi 51.

Mahoya ma gũcaria ũtongoria na ũũgĩ. Kũhoya Jehova ũtongoria na ũũgĩ ũrĩa tũrabatara nĩguo tũtue matua mega no gũtũteithie gũkorũo tũrĩ na wĩnyihia. No gũtũririkanie maũndũ marĩa tũnyihĩirũo, na gũtũteithie kwĩhoka biũ Ithe witũ wa igũrũ.—Thimo 3:5, 6.

Ngerekano: Suleimani nĩ aahoire arĩ na wĩnyihia ũtongoria na ũũgĩ wa gwatha Aisiraeli.​—1 Athamaki 3:5-12.

Mahoya ma hĩndĩ ya mĩtangĩko. Tũngĩitũrũrĩra Ngai ngoro citũ rĩrĩa tũraigua tũhinyĩrĩrĩkĩte, nĩ tũkũhoorerio na twĩhoke Jehova handũ ha kwĩĩhoka.​—Thaburi 62:8.

Ngerekano: Mũthamaki Asa nĩ aahoire rĩrĩa aang’etheire thũ ĩrĩ na hinya mũno.—2 Maũndũ ma Matukũ ma Tene 14:11.

Kũhoera arĩa marĩ na ũbataro. Mahoya ma mũthemba ũcio nĩ matũteithagia gwĩthema mwĩyendo na tũkagĩa na tha na ũcayanĩri.

Ngerekano: Jesu nĩ aahoeire arũmĩrĩri ake.—Johana 17:9-17.

Mahoya ma kũgooca Ngai. Rĩrĩa twagooca Jehova nĩ ũndũ wa mawĩko make ma magegania na ngumo ciake, gĩtĩo gitũ na ngatho citũ harĩ we nĩ ciongererekaga. Mahoya ta macio no matũteithie gũkuhĩrĩria Ngai, o we Ithe witũ.

Ngerekano: Daudi nĩ aagoocire Ngai kuuma ngoro nĩ ũndũ wa indo iria ombĩte.—Thaburi 8.

Kĩrathimo kĩngĩ kiumanaga na kũhoya nĩ “thayũ wa Ngai ũrĩa ũkĩrĩte ũtaũku wothe.” (Afilipi 4:7) Gũkorũo na ngoro hooreru thĩinĩ wa thĩ ĩno njũru nĩ kĩrathimo kĩa mwanya mũno, na nĩ kĩrehaga nginya moguni ma kĩĩmwĩrĩ. (Thimo 14:30) No hihi kĩyo gitũ giki nĩkĩo gĩtũmaga tũgĩe na thayũ wa Ngai, kana nĩ harĩ ũndũ ũngĩ ũbataranagia?