Kuhĩrĩria Mũigua wa Mahoya

ANDŨ aingĩ arĩa moigaga nĩ metĩkĩtie Ngai matingĩhota gũtaarĩria mũthingi wa wĩtĩkio wao. O na matingĩhota gũtaarĩria nĩkĩ kaingĩ ndini ikoragwo irĩ njũru kana nĩkĩ gĩtũmaga Ngai etĩkĩrie mĩnyamaro. Ũrĩa mahotaga gwĩka no kũhoya Ngai ũrĩa matoĩ.

O na kũrĩ ũguo, wee no ũhote gũkuhĩrĩria Ngai makĩria ma ũguo. No wake wĩtĩkio waku ũngĩgĩa na ũtaũku ũrĩa ũtũmaga wende Ngai na wone arĩ wa bata. Wĩtĩkio wa ma ũkoragwo wĩhocetie harĩ ũira wa ma. (Ahibirania 11:1) Ũngĩĩruta ũhoro wa ma wĩgiĩ Ngai, no ũmũmenye na ũmwaragĩrie ta mũrata. Ta wĩcirie ũhoro wa andũ amwe maahoyaga o na gũtuĩka maarĩ na nganja kana Ngai nĩ akoragwo kuo.

◼ Patricia, ũrĩa ũgwetetwo gĩcunjĩ-inĩ kĩa mbere. “Mũthenya ũmwe twarĩ gakundi ka arata ta ikũmi rĩrĩa maambĩrĩirie kwaria ũhoro wĩgiĩ ndini. Nĩ ndaamerĩte atĩ ndehereire ndeereti gatagatĩ ka baba, ũrĩa ũtetĩkĩtie nĩ kũrĩ Ngai, na ũmwe wa Aira a Jehova, ũrĩa wokĩte kũhunjia gwitũ. Mũrata ũmwe akiuga ũũ: ‘No gũkorũo Aira a Jehova nĩo makoragwo na ũhoro ũrĩa wa ma.’

Ũngĩ akiuga ũũ: “‘Na githĩ to tũthiĩ mũcemanio-inĩ ũmwe wao tũgatuĩrie?’ Na ũguo noguo twekire. O na gũtuĩka twarĩ na nganja na maũndũ marĩa twaiguaga, amwe aitũ magĩthiĩ na mbere gũthiaga mĩcemanio tondũ tu Aira a Jehova nĩ maamonagia ũrata mũno.

“O na kũrĩ ũguo, mũthenya ũmwe wa Kiumia nĩ ndaiguire ũndũ wagarũrire mwerekera wakwa. Mwaria nĩ aataarĩirie kĩrĩa gĩtũmaga andũ manyarirĩke. Ndiakoretwo ndaũkĩirũo atĩ mũndũ ombĩtwo arĩ mũkinyanĩru na atĩ mehia na gĩkuũ ciambĩrĩirie na mũndũ ũmwe na thutha ũcio igĩtheerema kũrĩ andũ othe. Ningĩ mwaria ũcio agĩtaarĩria bata wa gĩkuũ kĩa Jesu harĩ gũcokeria andũ kĩrĩa gĩateirũo nĩ mũndũ wa mbere. * (Aroma 5:12, 18, 19) O rĩmwe, ngĩtaũkĩrũo nĩ ũhoro ũcio. Ngĩmenya atĩ ‘kũna nĩ kũrĩ Ngai ũtũrũmbũyagia.’ Ngĩthiĩ na mbere kwĩruta Bibilia na riita rĩa mbere ũtũũro-inĩ wakwa, ngĩmenya atĩ nĩ ingĩahoire kũrĩ mũigua wa mahoya wĩ ho.”

◼ Allan, ũrĩa o nake ũgwetetwo gĩcunjĩ-inĩ kĩa mbere. “Mũthenya ũmwe Aira a Jehova nĩ mookire kũhunjia gwitũ mũciĩ, na mũtumia wakwa akĩmanyita ũgeni tondũ nĩ aakenagio  nĩ ũhoro ũrĩa maragia wĩgiĩ gũtũũra tene na tene thĩinĩ wa thĩ. Nĩ ndaarakarire. Kwoguo, ngĩtiga ageni acio rumu ya metha-inĩ, ngĩĩta mũtumia wakwa tũgĩthiĩ riko na ngĩmwĩra ũũ: ‘Tiga ũrimũ. Ũngĩtĩkia maũndũ ta macio atĩa!’

Mũtumia wakwa akĩnjĩra ũũ: “‘Thiĩ harĩ o ũmonie harĩa mahĩtagĩria.’

“Hatarĩ nganja, ndingĩahotire gwĩka ũguo. No maarĩ ega mũno na makĩndigĩra ibuku rĩgiĩ kana muoyo nĩ kũũmbwo wombirũo kana nĩ kwĩyumĩria. Rĩarĩ na ihooto ciataarĩirio wega na ciarĩ na maũndũ ma kũnyita mbaru nginya ngĩona nĩ njagĩrĩirũo kũmenya ũhoro wĩgiĩ Ngai makĩria. Ngĩambĩrĩria kwĩruta Bibilia na Aira a Jehova, na o na ihenya ngĩmenya atĩ ũrĩa yugaga nĩ ngũrani mũno na ũrĩa wothe ndeciragia wĩgiĩ ndini. O ũrĩa ndeerutaga ũhoro wĩgiĩ Jehova, noguo ndambĩrĩirie kwerekeria mahoya makwa kũrĩ we. Nĩ ndaarĩ na mĩerekera ĩtarĩ mĩega, na kwoguo ngĩhoya Jehova ũteithio. Nĩ nyonaga na ma atĩ Jehova nĩ aacokirie mahoya makwa.”

◼ Andrew ũrĩa ũikaraga England. “O na gũtuĩka ndaarĩ na mawoni marũmu na nĩ ndendete maũndũ ma sayansi, ndetĩkĩtie ũrutani wa kũgarũrũka kwa indo o tondũ tu andũ angĩ nĩ  mooigaga atĩ nĩ wa ma. Ndaagaga gwĩtĩkia atĩ nĩ kũrĩ Ngai tondũ wa maũndũ marĩa mothe moru mekĩkaga.

“O na kũrĩ ũguo, rĩmwe na rĩmwe nĩ ndeyũragia ũũ: ‘Angĩkorũo nĩ kũrĩ Ngai kũu igũrũ-rĩ, maũndũ moru mekĩkaga nĩkĩ? Wĩki-naĩ na mbaara cingĩhĩte ũguo nĩkĩ?’ Ingĩacemanirie na moritũ, rĩmwe na rĩmwe nĩ ndaahoyaga ũteithio, no ndioĩ ndaahoyaga ũũ.

“Mũndũ ũmwe agĩcoka akĩhe mũtumia wakwa trakti ĩcabĩtwo nĩ Aira a Jehova ĩrĩa ĩkoragwo na kĩongo Je! Ulimwengu Huu Utaokoka? Nĩ ndeecũranĩtie ũhoro wa kĩũria kĩu kaingĩ. Trakti ĩyo ĩgĩtũma ndĩcirie mũno ũhoro wa Bibilia, ‘Hihi macokio mayo nĩ marabatara gũthuthurio?’ Thutha ũcio, ndĩ rũtha, mũndũ ũmwe akĩhe ibuku Biblia—Neno la Mungu au la Binadamu? * Rĩrĩa ndaamenyire atĩ Bibilia nĩ ĩtwaranaga na sayansi ya ma, ngĩona nĩ ndaabataraga kwĩruta makĩrĩa ũhoro wĩgiĩ Bibilia. Kwoguo rĩrĩa Mũira ũmwe wa Jehova aanjũririe kana no nyende kwĩruta Bibilia nake, ngĩtĩkĩra. Rĩrĩa ndamenyire muoroto wa Jehova, ngĩigua kũna nĩ ndamũmenya, Ngai ingĩahotire kwaria nake na njĩra ya mahoya.”

◼ Jan, ũrĩa warereirũo London kanitha-inĩ wa Prostestant. “Ũhinga thĩinĩ wa ndini na kũingĩha kwa mĩnyamaro nĩ gwatũmire ndigane na ndini. Ningĩ ngĩtigana na mathomo makwa na ngĩambĩrĩria kũina na gũthaaka ngita nĩguo nyone mbeca. Hĩndĩ ĩyo nĩrĩo ndaacemanirie na Pat. Aarereirũo ndini-inĩ ya Gatoreki na nĩ aatiganĩte na ndini o ta niĩ.

“Twaikaraga nyũmba yaatiganĩirio tũrĩ na andũ angĩ maatigĩte cukuru arĩa mendaga mũno maũndũ ma ndini cia kuuma Asia. Twahũthagĩra mathaa maingĩ ũtukũ kwarĩrĩria bata wa ũtũũro. O na gũtuĩka tũrĩ na Pat tũtietĩkĩtie nĩ kũrĩ Ngai, nĩ tuonaga atĩ no mũhaka gũkorũo nĩ kũrĩ ‘hinya ũrĩa ũtũmaga ũtũũro ũthiĩ na mbere.’

“Thutha wa gũthaamĩra mwena wa rũgongo wa England tũgĩetha wĩra wa kũina, mwana witũ wa mbere agĩciarũo. Ũtukũ ũmwe mwana akĩrwara, na ngĩĩkora ngĩhoya Ngai iteetĩkĩtie. Kahinda kanini thutha ũcio, ũrata witũ na Pat ũgĩthũka na ngĩoya mwana ngĩmũtiga. O rĩngĩ, ngĩhoya ũteithio, ngĩciria hihi ndahota gũthikĩrĩrio. Pat agĩka o ũguo, o na gũtuĩka ndiamenyaga.

“Mũthenya o ũcio, Aira erĩ a Jehova makĩringaringa mũrango wa Pat na makĩmuonia motaaro mamwe magĩhũthĩka ma Bibilia. Pat akĩhũũrĩra thimũ na akĩnjũria kana no njĩtĩkĩre kwĩruta Bibilia hamwe nake na Aira a Jehova. Thutha wa kahinda kanini tũkĩĩruta atĩ, nĩguo tũkenie Jehova no mũhaka twandĩkĩthie kĩhiko gitũ kũringana na watho. Twoonire ũndũ ũcio ũrĩ mũritũ mũno tondũ wa mathĩna marĩa twarĩ namo.

“Nĩ tweendaga kũmenya makĩria ũhoro wĩgiĩ kũhinga kwa morathi ma Bibilia, gĩtũmi kĩa andũ manyamarĩke, na Ũthamaki wa Ngai nĩ kĩĩ. O kahora, nĩ twamenyire atĩ Ngai nĩ atũrũmbũyagia, na tweendaga gwĩka o ũrĩa oigĩte. Tũkĩhikania kũringana na watho. Ũũgĩ wa Kiugo kĩa Ngai nĩ ũtũteithĩtie kũrera ciana citũ ithatũ. Twĩ na ma atĩ Jehova nĩ aathikĩrĩirie mahoya maitũ.”

Wĩthuthurĩrie Ũira wee Mwene

O ta andũ angĩ milioni nyingĩ, acio magwetetwo thĩinĩ wa gĩcunjĩ gĩkĩ matiaheenirio nĩ ndini cia maheeni na nĩ maamenyire kĩrĩa gĩtũmaga Ngai etĩkĩrie mĩnyamaro. Hihi nĩ wona atĩ harĩ andũ acio othe ũtaũku wa ma wa Bibilia nĩguo wamateithirie metĩkie atĩ kũna Jehova nĩ aiguaga mahoya?

Hihi no wende gũthuthuria maũndũ maronania atĩ Ngai arĩ kuo? Aira a Jehova nĩ megũkena gũgũteithia wĩrute ma ĩgiĩ Jehova na ũrĩa ũngĩkuhĩrĩria ‘Mũigua wa mahoya.’—Thaburi 65:2.

[Ũhoro wa magũrũ-inĩ]

[Mbica karatathi ka 10]

“Rĩrĩa ndaamenyire muoroto wa Jehova, ngĩigua kũna nĩ ndamũmenya, Ngai ingĩahotire kwaria nake na njĩra ya mahoya”

[Mbica karatathi ka 9]

Wĩtĩkio wa ma ũkoragwo wĩhocetie harĩ ũira wa ma na harĩ kwenda kũmenya ũũma wĩgiĩ Ngai