Mũigua wa Mahoya Nũũ?
Mũigua wa Mahoya Nũũ?
ANGĨKORŨO nĩ kũrĩ Mũigua wa mahoya, no mũhaka akorũo nĩwe Mũũmbi. Nũũ ũngĩ ũngĩhota gũthoma meciria maku tiga Ũrĩa wathondekire tombo wa mũndũ? Nũũ ũngĩ ũngĩcokia mahoya na ahe andũ ũteithio ũrĩa marabatara? No no wĩyũrie ũũ: ‘Hihi nĩ ũndũ wa ũũgĩ gwĩtĩkia atĩ nĩ kũrĩ Mũũmbi?’
Andũ aingĩ meciragia atĩ mũndũ gwĩtĩkia atĩ nĩ kũrĩ Mũũmbi, no mũhaka aregane na maũndũ marĩa marĩ kuo ũmũthĩ ma sayansi. No gwĩciria atĩ wĩtĩkio harĩ Ngai ndũngĩiguana na sayansi ti ũhoro wa ma. Ta wĩcirie ũhoro wa maũndũ maya.
◼ Ũtuĩria wa ica ikuhĩ ũrĩa wekirũo harĩ profesa a sayansi 1,646 thĩinĩ wa yunibacĩtĩ 21 nene cia Amerika, woonanirie atĩ no mũndũ ũmwe harĩ andũ atatũ wathuurire ciugo “Ndiĩtĩkĩtie Ngai” kuonania mawoni mao.
Ũũma nĩ atĩ athomi aingĩ a sayansi nĩ metĩkĩtie atĩ Ngai arĩ kuo.
Maũndũ Maronania atĩ nĩ Kũrĩ Mũũmbi
Hihi twagĩrĩirũo o gwĩtĩkia tu tũtarĩ na ũira atĩ Mũigua wa mahoya arĩ kuo? Aca. Rĩĩciria atĩ mũndũ gũkorũo na wĩtĩkio nĩ kuuga hingo ciothe etĩkie tu atarĩ na ũira ti rĩa ma. Bibilia yugaga atĩ wĩtĩkio ‘nĩguo ũmenyithanagia atĩ maũndũ marĩa matonekaga marĩ ho.’ (Ahibirania 11:1) Kwa ngerekano-rĩ, ndũngĩona rũhuho no no wone maũndũ marĩa rũhuho rwĩkaga ta kũinainia mathangũ ma mĩtĩ rĩrĩa rũrahurutana; kwoguo no wĩtĩkie atĩ nĩ kũrĩ rũhuho. O ũndũ ũmwe-rĩ, o na gũtuĩka tũtingĩona Mũigua wa mahoya, no tuone maũndũ mangĩtũma twĩtĩkie biũ atĩ no mũhaka akorũo kuo.
Tũngĩona kũ maũndũ ma gũtuonia atĩ Ngai nĩ akoragwo kuo? Tũrabatara o kũrora maũndũ marĩa matũthiũrũrũkĩirie. Bibilia yugaga ũũ: “Nĩ ũndũ-rĩ, gũtirĩ nyũmba ĩtarĩ na ũrĩa wamĩakire; ĩndĩ mwaki wa indo ciothe no Ngai.” (Ahibirania 3:4) Hihi nĩ ũretĩkania na ciugo icio? Hihi rĩrĩa watarania ũrĩa maũndũ makoragwo mabangĩtwo gũkũ thĩ na igũrũ, kĩhumo kĩa muoyo, kana ũrĩa tombo wa mũndũ ũkoragwo ũthondeketwo na njĩra ya magegania gũkĩra kĩndũ kĩngĩ o gĩothe thĩinĩ wa thĩ, nĩ ũkuona atĩ no mũhaka gũkorũo na kĩndũ kĩrĩ na hinya ũkĩrĩte wa andũ. *
No maũndũ marĩa matũthiũrũrũkĩirie matingĩtũruta maũndũ mothe megiĩ Ngai. Kũrora ũũmbi nĩguo tuone maũndũ maronania atĩ Ngai arĩ kuo nĩ ta kũigua makinya ma mũndũ ũroka no ndũramuona tondũ mũrango nĩ mũhinge. Nĩ ũramenya atĩ harĩ mũndũ ũroka, no nũũ? Nĩgetha ũmenye, ũrabatara kũhingũra mũrango. Tũrabatara gwĩka ũndũ o ta ũcio nĩgetha tũmenye Mũũmbi.
Bibilia nĩyo mũrango wa kũmenya Ngai. Wahingũra mũrango ũcio na wĩcirie ũhoro wa morathi mamwe marĩa makoragwo ho na ũrĩa maahingire, nĩ ũkũgĩa na ũira atĩ Ngai arĩ kuo. * No makĩria ma ũguo, maũndũ marĩa mandĩke megiĩ ũrĩa Ngai aahiũranagia na andũ nĩ monanagia ũrĩa Mũigua ũcio wa mahoya atariĩ.
Mũigua wa Mahoya Atariĩ Atĩa?
Bibilia ĩguũragia atĩ Mũigua wa mahoya nĩ wa ma biũ—ũrĩa wee ũngĩmũmenya. Hatarĩ nganja, ũcio nowe ũngĩhota gũgũthikĩrĩria na njĩra aragwĩciria. Nĩ ũndũ ũtũtigaga tũtarĩ na nganja twathoma ũũ: “Wee mũigua wa mahoya-rĩ, arĩa othe me mwĩrĩ magokaga o harĩ wee.” (Thaburi 65:2) Nĩ aiguaga arĩa mamũhoyaga marĩ na wĩtĩkio. Na nĩ arĩ rĩĩtwa. Bibilia yugaga ũũ: “Mũndũ mwaganu, Jehova amũikaraga haraya, ĩndĩ nĩaiguaga kũhoya kwa ũrĩa mũthingu.”—Thimo 15:29.
Jehova no akene kana arakare. Nĩ “Ngai mwene wendani” na ‘Ngai ũrĩa ũkenaga.’ (2 Akorintho 13:11; Gũcokerithia Maathani 30:9) Ũhoro wĩgiĩ ũrĩa aaiguire rĩrĩa thĩ yaiyũrĩte maũndũ moru, Bibilia yugaga ũũ: “Ũndũ ũcio ũkĩmũiguithia ũũru ngoro.” (Kĩambĩrĩria 6:5, 6) Kuuga atĩ Ngai arehagĩra andũ mĩnyamaro nĩguo amagerie ti ũhoro wa ma. Bibilia yugaga ũũ: “Kũrogira Mũrungu angĩĩka ũndũ mwaganu!” (Ayubu 34:10) O na kũrĩ ũguo, no wĩyũrie ũũ: ‘Angĩkorũo Ngai nĩwe Mũũmbi mwene hinya wothe-rĩ, etĩkagĩria mĩnyamaro ĩthiĩ na mbere nĩkĩ?’
Jehova nĩ aheete andũ ũhoti wa kũhũthĩra wĩyathi wa gwĩthuurĩra, na ũndũ ũcio nĩ ũtuonagia ũndũ mũna wĩgiĩ ũrĩa Ngai atariĩ. Na githĩ tũtikenagĩra wĩyathi wa gwĩthuurĩra ũrĩa tũkwenda gũtũũra? No ũndũ wa kĩeha nĩ atĩ, andũ aingĩ nĩ mahũthagĩra ũũru wĩyathi wao na makerehere mĩnyamaro na makarehere andũ angĩ. Haha harĩ na kĩũria twagĩrĩire kuoya ihinda gwĩciria ũhoro wakĩo na njĩra ndikĩru: Ngai angĩeheria mĩnyamaro atĩa ategũtunya andũ wĩyathi wao? Nĩ tũkwarĩrĩria kĩũria kĩu gĩcunjĩ-inĩ kĩrĩa kĩrũmĩrĩire.
[Ũhoro wa magũrũ-inĩ]
^ kĩb. 8 Nĩguo wone ũhoro makĩria wĩgiĩ maũndũ maronania atĩ Ngai arĩ kuo, rora broshua Maswali Matano Muhimu Kuhusu Chanzo cha Uhai na ibuku Je, Kuna Muumba Anayekujali? iria icabĩtwo nĩ Aira a Jehova.
^ kĩb. 10 Broshua Kitabu kwa Ajili ya Watu Wote na ibuku Biblia—Neno la Mungu au la Binadamu? macabĩtwo nĩ Aira a Jehova nĩguo magũteithie wone ũira atĩ Bibilia ĩkoragwo ĩtongoretio nĩ roho wa Ngai.
[Mbica karatathi ka 5]
Hihi Ndini nĩ Itũmaga Ũgĩe na Nganja?
Ũndũ wa kĩeha nĩ atĩ, ndini nĩcio itũmaga andũ aingĩ magĩe na nganja kana nĩ kũrĩ Mũigua wa mahoya ũrĩ tha. Ndini kwĩingĩria maũndũ-inĩ ma mbaara, wĩki-naĩ, na gwĩtĩkĩria ciana ihũthĩrũo ũũru nĩ gũtũmĩte nginya andũ mahoyaga moige ũũ: “Niĩ ndiĩtĩkĩtie Ngai.”
Nĩ kĩĩ gĩtũmaga kaingĩ ndini itũme andũ meke maũndũ moru? Andũ oru mekaga maũndũ moru na rĩĩtwa rĩa ndini. Bibilia nĩ yarathĩte atĩ Ũkristiano nĩ ũngĩkaahũthĩrũo gwĩka maũndũ moru. Mũtũmwo Paulo eerire arori Akristiano ũũ: “Gatagatĩ-inĩ kanyu nĩharĩũkĩra andũ mekwaria maũndũ ma ũtũrĩka, nĩ getha magucagĩrĩrie arutwo mamarũmagĩrĩre.”—Atũmwo 20:29, 30.
Ngai nĩ arakaragio mũno nĩ ndini cia maheeni. Kwaria ma-rĩ, Kiugo kĩa Ngai, Bibilia, kiugaga atĩ ndini cia maheeni irĩ na mehia ma gũita “thakame . . . ya andũ arĩa othe maanakĩũragwo gũkũ thĩ.” (Kũguũrĩrio 18:24) Tondũ ndini cia maheeni nĩ iremetwo nĩ kũruta andũ ũhoro wa Ngai wa ma, ũrĩa ngumo yake nene nĩ wendo, ndini icio irĩ na mehia ma gũita thakame maitho-inĩ ma Ngai.—1 Johana 4:8.
Mũigua wa mahoya nĩ aiguagĩra tha andũ arĩa othe mahinyagĩrĩrio nĩ ndini. Ica ikuhĩ, wendo wa Ngai harĩ andũ nĩ ũgũtũma atuĩre hinga ciothe cia ndini akĩhũthĩra Jesu. Jesu oigire ũũ: “Mũthenya ũcio andũ aingĩ nĩmakanjũria, Mwathani ũyũ, Mwathani ũyũ, githĩ tũtiigana kũratha mohoro na rĩĩtwa rĩaku . . . ? Na hĩndĩ ĩo nĩngamoimĩrĩria ndĩmere atĩrĩ, Gũtirĩ hĩndĩ ndamũũĩ; umai kũrĩ niĩ, inyuĩ mwĩkaga waganu.”—Mathayo 7:22, 23.
