Wĩrute Kuumana Na Kiugo Kĩa Ngai

Nĩ Maũndũ Marĩkũ Magekĩka Mũthenya wa Cira?

Gĩcunjĩ gĩkĩ kĩrĩ na ciũria hihi wanooria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Mũthenya wa Cira nĩ kĩĩ?

O ta ũrĩa honanĩtio thĩinĩ wa mbica ĩrĩa ĩrĩ mwena wa ũrĩo, andũ aingĩ meciragia atĩ Mũthenya wa Cira andũ bilioni nyingĩ makaarehwo mbere ya gĩtĩ kĩa ũthamaki kĩa Ngai na macirithio kũringana na ciĩko iria maaneka—amwe maheo muoyo kũrĩa igũrũ na angĩ maikio icua-inĩ. O na kũrĩ ũguo, Bibilia yonanagia atĩ muoroto wa Mũthenya wa Cira nĩ kũhonokia andũ kuumana na wagi wa kĩhooto. (Thaburi 96:13) Ngai nĩ athurĩte Jesu na akamũtua Mũcirithania ũrĩa ũgaacokeria andũ kĩhooto.—Thoma Isaia 11:1-5; Atũmwo 17:31.

2. Mũthenya wa Cira ũgaacokia kĩhooto atĩa?

Rĩrĩa mũndũ wa mbere, Adamu, aaremeire Ngai akĩendaga, aatũmire njiarũa ciake ciothe ikorũo rungu rwa mehia, mĩnyamaro na gĩkuũ. (Aroma 5:12) Nĩguo arũnge ũndũ ũcio ũtarĩ wa kĩhooto, Jesu nĩ akaariũkia andũ bilioni nyingĩ. Ibuku rĩa Kũguũrĩrio rĩonanagia atĩ ũndũ ũcio ũgekĩka hĩndĩ ya wathani wa Jesu wa mĩaka ngiri.—Thoma Kũguũrĩrio 20:4, 11, 12.

Andũ arĩa makaariũkio matigaacirithio kũringana na maũndũ marĩa meekĩte matanakua no magaacirithio kũringana na maũndũ marĩa mageeka rĩrĩa maũndũ marĩa marĩ “mabuku-inĩ” marĩa magwetetwo thĩinĩ wa Kũguũrĩrio 20 makaaguũrio. (Aroma 6:7) Mũtũmwo Paulo oigire atĩ arĩa makaariũka na magĩe na mweke wa kwĩruta ũhoro wa Ngai nĩ “arĩa athingu o na arĩa matarĩ athingu.”—Thoma Atũmwo 24:15.

  3. Mũthenya wa Cira ũkaahingia maũndũ marĩkũ?

Andũ arĩa maakuire matamenyete Jehova Ngai na kũmũtungatĩra nĩ makaagĩa na mweke wa kũgarũrũka na gwĩka ũrĩa kwagĩrĩire. Meka ũgũo, kũriũka kwao gũgaatuĩka “iriũkĩro rĩa muoyo.” O na kũrĩ ũguo, andũ amwe arĩa makaariũkio, matikenda kwĩruta njĩra cia Jehova. Kũriũka kwao gũgatuĩka “iriũkĩro rĩa gũcirithio.”—Thoma Johana 5:28, 29; Isaia 26:10; 65:20.

Mũthia-inĩ wa mĩaka ngiri ya Mũthenya wa Cira, Jehova nĩ agaakorũo acokeirie andũ arĩa athĩki ũkinyanĩru ũrĩa mũndũ aarĩ naguo o kĩambĩrĩria. (1 Akorintho 15:24-28) Na githĩ kĩu ti kĩĩrĩgĩrĩro kĩega mũno harĩ andũ arĩa othe athĩki! Igerio-inĩ rĩa mũthia, Ngai nĩ akoohora Shaitani ũrĩa Mũcukani, ũrĩa ũgaakorũo ahingĩrĩtwo irima rĩtarĩ gĩturi kwa ihinda rĩa mĩaka ngiri ĩmwe. Shaitani nĩ akaageria o rĩngĩ kweheria andũ kũrĩ Jehova, no arĩa makaaregana nake magaakenera ũtũũro wa tene na tene gũkũ thĩ.—Thoma Isaia 25:8; Kũguũrĩrio 20:7-9.

4. Nĩ mũthenya ũrĩkũ ũngĩ wa cira ũkaaguna andũ?

Bibilia ningĩ nĩ ĩhũthagĩra “mũthenya ũrĩa wa cira” kuonania ũndũ ũrĩa ũkaarehe mũthia wa mũtabarĩre ũyũ. Mũthenya ũcio wa cira ũgooka na ihenya o ta Mũiyũro wa hĩndĩ Nuhu, ũrĩa waniinire andũ arĩa othe maarĩ oru. Ũhoro wa gĩkeno nĩ atĩ, kwanangwo kwa “andũ arĩa matetigagĩra Ngai” nĩ gũgaatũma kũgĩe na thĩ njerũ ‘kũrĩa gũgaatũũra ũthingu.’—Thoma 2 Petero 3:6, 7, 13.

Nĩgetha wone ũhoro makĩria, rora karatathi ka 213-215 thĩinĩ wa ibuku rĩrĩ, Bibilia Ĩrutanaga Atĩa Kũna?, rĩrĩa rĩcabĩtwo nĩ Aira a Jehova.

[Mbica karatathi ka 16]

“The Last Judgement,” bY Gustave Doré, 1832-1883

[Mbica karatathi ka 16]

Engravings by Doré