Ndeereti Hamwe na Mũira wa Jehova​—Hihi Andũ Othe Ega Mathiaga Igũrũ?

AIRA A JEHOVA nĩ makenagĩra kwarĩrĩria ũhoro wa Bibilia na andũ arĩa angĩ. Hihi nĩ kũrĩ kĩũria kĩa Bibilia wĩyũragia? No wende kũmenya makĩria ũhoro wĩgiĩ wĩtĩkio wa Aira a Jehova kana gĩtũmi kĩa meke maũndũ ũrĩa mekaga? Angĩkorũo nĩguo-rĩ, ndũkaanage kũũria hĩndĩ ĩrĩa ĩngĩ mũgaacemania na ũmwe wa Aira wa Jehova. Nĩ agaakenera kwarĩrĩria maũndũ ta macio nawe.

Gĩkĩ kĩrũmĩrĩire nĩ kĩonereria kĩa ndeereti ĩrĩa Mũira wa Jehova angĩkorũo nayo hamwe na mũndũ ũngĩ. Ta reke tũtue atĩ Mũira wa Jehova wĩtagwo Njoroge nĩ aaceera mũciĩ wa mũthuri wĩtagwo Mwangi.

Andũ Arĩa Magaathiĩ Igũrũ Makaarutaga Wĩra Ũrĩkũ Kuo?

Njoroge: Weciria ũhoro wa mahinda marĩa mokĩte-rĩ, hihi wonaga ta maũndũ mekwagĩra, ta megũthũka makĩria, kana ta megũikara o ro ũguo marĩ?

Mwangi: Ndĩrona ta maũndũ mekwagĩra. Nĩ ndĩriragĩria mũno gũthiĩ igũrũ ngaikarage na Mwathani.

Njoroge: Kĩu nĩ kĩĩrĩgĩrĩro kĩega mũno. Bibilia nĩ yaragĩrĩria ũhoro mũingĩ wĩgiĩ igũrũ na andũ arĩa magaathiĩ kuo. Hihi ũrĩ weciria andũ arĩa magaathiĩ igũrũ makaarutaga wĩra ũrĩkũ kuo?

Mwangi: Tũgaakorũo hamwe na Ngai tũtũũre tũmũgoocaga.

Njoroge: Ũcio nĩ ũndũ mwega mũno. Bibilia nĩ yaragĩrĩria to gĩtĩo kĩrĩa arĩa magaathiĩ igũrũ makaaheo no ningĩ nĩ nginya ũhoro wĩgiĩ wĩra ũrĩa magaakorũo naguo.

Mwangi: Wĩra ũrĩkũ?

Njoroge: Nĩ wĩra ũrĩa ũgwetetwo thĩinĩ wa Kũguũrĩrio 5:10. Mũhari ũcio ugaga ũũ: “Ũkĩmatua [Jesu] kĩrĩndĩ gĩa gũthamakagĩrũo nĩ Ngai witũ na ũkĩmatua amũthĩnjagĩri; nao nĩo a gũthamakaga thĩ.” Hihi Mwangi nĩ wona wĩra ũrĩa arĩa magaathiĩ igũrũ makaarutaga?

Mwangi: Mũhari ũcio woiga atĩ magaathamakaga igũrũ rĩa thĩ.

Njoroge: Ũcio nĩ ũndũ ũngĩtũkenia mũno, kana tiguo?

Magaathamakĩra Andũ Arĩkũ?

Njoroge: Na githĩ ndũgwĩtĩkania na niĩ atĩ angĩkorũo acio magaathiĩ gũtuĩka athamaki, no mũhaka gũkorũo na andũ arĩa magaathamakĩrũo nĩo? Ningĩ-rĩ, hakĩrĩ bata ũrĩkũ wa thirikari gũtarĩ na raiya?

Mwangi: Ĩĩ nĩ ma, hatingĩkorũo na bata.

Njoroge: Kwoguo-rĩ, kĩũria kĩega gĩa kũũria nĩ gĩkĩ, Magaathamakĩra andũ arĩkũ?

Mwangi: Ngwĩciria tũgaathamakĩra andũ arĩa magaakorũo gũkũ thĩ matakuĩte na magathiĩ igũrũ.

Njoroge: No kũhoteke ũguo angĩkorũo andũ othe ega mathiaga igũrũ. No nĩ harĩ ũndũ ũngĩ tũngĩciria. Hihi no akorũo atĩ andũ amwe—andũ amwe ega—matigaathiĩ igũrũ?

 Mwangi: Niĩ ndirĩ ndaigua Mũkristiano o na ũmwe wĩtĩkĩtie ũguo.

Njoroge: Ndoria kĩũria kĩu tondũ wa ũrĩa tũthomaga thĩinĩ wa Thaburi 37:29. No ũthome mũhari ũcio?

Mwangi: Ĩĩ. Ũroiga ũũ: “Arĩa athingu nĩo makagaya thĩ, na gũtũũra mamĩtũũre o nginya tene.”

Njoroge: Nĩ wega. Hihi nĩ wona kũrĩa andũ aingĩ ega magaatũũra?

Mwangi: Mũhari ũcio woiga atĩ magaatũũra gũkũ thĩ.

Njoroge: Ũguo nĩguo kũrĩ—na to gwa kahinda kanini. Ta rora wone atĩ mũhari ũcio woiga ũũ: “Mamĩtũũre o nginya tene.”

Mwangi: No gũkorũo ũguo nĩ kuuga atĩ gũtirĩ hĩndĩ gũtagaakorũo kũrĩ na andũ ega gũkũ thĩ. Rĩrĩa twakua na twathiĩ igũrũ, andũ angĩ ega nao magaciarũo magacoka ithenya riitũ.

Njoroge: Andũ aingĩ no mecirie atĩ ũguo nĩguo mũhari ũcio wendaga kuuga. No rĩrĩ, no kũhoteke atĩ mũhari ũcio wendaga kuuga ũndũ ngũrani na ũguo? No ũkorũo wendaga kuuga atĩ andũ arĩa ega magaatũũra gũkũ thĩ tene na tene?

Mwangi: Ndirĩ na ũũma biũ.

Paradiso Gũkũ Thĩ Mahinda Mokĩte

Njoroge: Ta wĩcirie ũrĩa mũhari ũngĩ wa Bibilia ugaga igũrũ rĩa ũtũũro wa gũkũ thĩ mahinda mokĩte. Reke tũthome Kũguũrĩrio 21:4. Ũhoro wĩgiĩ andũ acio magaatũũra mahinda macio-rĩ, mũhari ũcio ũroiga ũũ: “Nake [Ngai] nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.” Na githĩ kĩu ti kĩĩrĩgĩrĩro kĩega!

Mwangi: Nĩ kĩega. No ngwĩciria mũhari ũcio ũroiga ũrĩa ũtũũro ũgaakorũo ũtariĩ kũũrĩa igũrũ.

Njoroge: Nĩ ma atĩ andũ arĩa magaathiĩ igũrũ nĩ magaakenera irathimo o ta icio. No ta rora mũhari ũcio rĩngĩ. Ũroiga gũgaathiĩ atĩa harĩ gĩkuũ?

Mwangi: Ũroiga atĩ “gĩkuũ gĩtirĩ hingo gĩgacoka kũgĩa.”

Njoroge: Ũcio nĩ ũhoro wa ma. Nĩ ũgwĩtĩkania na niĩ atĩ nĩguo kĩndũ kĩĩrũo gĩtigacoka kũgĩa rĩngĩ no mũhaka gĩkorũo kĩrarĩ ho.

Mwangi: Hatarĩ nganja ũguo nĩguo kũrĩ.

Njoroge: No gũtirĩ kwagĩa na gĩkuũ kũũrĩa igũrũ, kana nĩ kũrĩ kwagĩa? Gũkũ thĩ tu nokuo andũ makuaga.

Mwangi: Hmm. Nĩ ndĩrabatara gwĩciria ũhoro ũcio makĩria.

Njoroge: Mwangi, Bibilia ĩrutanaga atĩ andũ amwe ega nĩ magaathiĩ igũrũ no andũ arĩa aingĩ magaatũũra gũkũ thĩ tene na tene. O na nĩ njũũĩ atĩ nĩ ũrĩ waigua ciugo ici ciũĩkaine mũno: “Gũkena-rĩ, nĩ arĩa ahoreri, nĩ gũkorũo nĩmakagaya thĩ.”—Mathayo 5:5.

Mwangi: Ĩĩ, ndanaigua mũhari ũcio ũgĩthomwo kanitha-inĩ maita maingĩ.

Njoroge: Angĩkorũo andũ arĩa ahoreri makagaya thĩ-rĩ, na githĩ ũguo ti kuuga atĩ magaatũũra gũkũ thĩ? Andũ acio magaatũũra thĩ nĩ magaakenera irathimo iria ciĩranĩirũo ibuku-inĩ rĩa Kũguũrĩrio. Nĩ makoona thĩ yothe ĩgarũrũkĩte biũ tondũ Ngai nĩ akeeheria maũndũ mothe moru—nginya gĩkuũ.

Mwangi: Rĩu nĩ ndĩranyita ũrĩa ũroiga, no ndigwĩciria atĩ mũhari ũmwe tu wa Bibilia kana ĩĩrĩ nĩ mĩiganu ya gwĩkĩra ũndũ ũcio mũkonde.

Njoroge: Hatarĩ nganja ti mĩiganu. Nĩ kũrĩ maandĩko mangĩ maragĩrĩria ũrĩa ũtũũro ũgaakorũo ũtariĩ gũkũ thĩ mahinda mokĩte. No nguonie handũ nyendete gũthoma mũno, angĩkorũo wĩ na ndagĩka cigana ũna.

Mwangi: Ĩĩ, no ũnyonie.

“Ũrĩa Mwaganu Acoke Aagwo”

Njoroge: Tũgũthomete mũhari wa 29 wa Thaburi 37. Reke tũcoke ibuku-inĩ rĩu rĩa thaburi. Rĩu tũgũthoma mũhari wa 10 na 11. No wende gũthoma mĩhari ĩyo?

 Mwangi: Ĩĩ nĩ ngũthoma. “Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho. No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”

Njoroge: Nĩ ngatho. Kũringana na mũhari wa 11, “andũ arĩa ahoreri,” kana andũ arĩa ega magaatũũra kũ?

Mwangi: Mũhari ũcio woiga “makagaya thĩ.” O na kũrĩ ũguo-rĩ, ndĩreciria atĩ mũhari ũcio ũroiga ũhoro wa ũmũthĩ tondũ andũ ega nĩkuo maikaraga.

Njoroge: Ũcio nĩ ũhoro wa ma. No rĩrĩ, ta rora wone atĩ mũhari ũcio ningĩ nĩ woiga atĩ andũ arĩa ega magekenagĩra tondũ wa “kũingĩhĩrũo nĩ thayũ.” Gũtikoragwo na thayũ mũingĩ thĩinĩ wa thĩ ũmũthĩ, kana tiguo?

Mwangi: Gũtikoragwo.

Njoroge: Kwoguo kĩĩranĩro kĩu gĩkaahingio atĩa? No hũthĩre ngerekano ĩno: Ta hũũra mbica ũrĩ na nyũmba nyingĩ cia gũkomborithia. Akombori amwe nĩ ega—nĩ mamenyagĩrĩra nyũmba o na makaiguana na andũ arĩa marigainie nao. O na nĩ ũkenaga nĩ kũmakomborithia nyũmba icio. No angĩ nĩ akombori oru; nĩ mathũkangagia nyũmba na magathĩnia andũ arĩa marigainie nao mũno. Akombori acio oru mangĩaga kũgarũrĩra mĩthiĩre yao-rĩ, ũngĩka atĩa?

Mwangi: No kũmaingata.

Njoroge: Ũguo noguo Ngai arĩka harĩ andũ arĩa oru arĩa matũthiũrũrũkĩirie mũthenya wa ũmũthĩ. Ta rora rĩngĩ mũhari wa 10. Ũroiga atĩ “ũrĩa mwaganu acoke aagwo.” Ũguo nĩ ta kuuga atĩ Ngai nĩ “akaaingata” andũ arĩa matũmaga arĩa angĩ mage thayũ. Hĩndĩ ĩyo andũ arĩa ega nĩ makaahota gũkenera ũtũũro gũkũ thĩ me na thayũ. Nĩ ndĩramenya atĩ ũhoro ũcio wa andũ ega gũtũũra gũkũ thĩ tene na tene nĩ ngũrani na ũrĩa wanarutwo.

Mwangi: Ũcio nĩ ũhoro wa ma, ndirĩ ndaigua ũndũ ũcio kanitha-inĩ itũ.

Njoroge: Na o ta ũrĩa ugire gũthoma o rĩandĩko rĩmwe kana merĩ megiĩ ũhoro ũcio ti kũiganu. Hatarĩ nganja, nĩ tũrabatara gũthuthuria ũrĩa Bibilia ĩrĩ yothe yugaga igũrũ rĩgiĩ mahinda mokĩte ma andũ arĩa ega. No kũringana na maandĩko marĩa twathoma ũmũthĩ-rĩ, nĩ ũkuona ta kũngĩhoteka atĩ andũ amwe ega magaathiĩ igũrũ, nao andũ arĩa angĩ aingĩ ega matũũre tene na tene gũkũ thĩ?

Mwangi: Ndirĩ na ma. No kuumana na maandĩko macio twathoma kũroneka ta arĩ guo. No mũhaka ndĩcirie ũhoro ũcio makĩria.

Njoroge: Ũgĩĩciria ũhoro ũcio makĩria-rĩ, no gũkorũo na ciũria ingĩ ũngĩĩyũria. Kwa ngerekano-rĩ, ĩ andũ ega arĩa maatũũraga mbere itũ? Hihi othe nĩ maathire igũrũ? Angĩkorũo matiathire-rĩ, marĩkũ rĩu?

Mwangi: Icio nĩ ciũria njega mũno.

Njoroge: Hihi no ngũteithie na maũndũ merĩ. Wa mbere, reke ngwandĩkĩre maandĩko maigana ũna marĩa maraarĩrĩria ũhoro ũcio. * Wa kerĩ, no nyende gũcoka rĩngĩ twarĩrĩrie maandĩko macio thutha wa gũkorũo ũcarĩtie mahinda ma kũmathoma na kũmeciria. Ũguo nĩ wega?

Mwangi: Ĩĩ, ũguo nĩ wega. Nĩ ngatho mũno.

[Kohoro ka magũrũ-inĩ]