Kĩu nĩ kĩũria kĩa bata tondũ Jesu nĩ eerĩte mwĩki-naĩ ũrĩa moragirũo hĩndĩ ĩmwe nake atĩ nĩ mangĩgakorũo nake Ikenero. Jesu oigire ũũ: “Ngũkwĩrĩra na ma atĩ, ũũmũthĩ ũrĩkorwo na niĩ Ikenero.” (Luka 23:43, The Holy Bible in Gĩkũyũ Language) Jesu ndaigana kuga kũrĩa Ikenero rĩu rĩgakorũo. Gũkĩrĩ ũguo-rĩ, hihi Jesu eendaga kuga atĩ mangĩathire na mwĩki-naĩ ũcio igũrũ?

Reke twambe tũthuthurie kana mwĩki-naĩ ũcio aarĩ na ngumo iria ciagĩrĩire harĩ ũtũũro wa igũrũ. Andũ arĩa makoragwo na kĩĩrĩgĩrĩro gĩa gũthiĩ igũrũ makoragwo mabatithĩtio na maĩ na roho mũtheru na nĩ ũndũ ũcio magatuĩka arutwo a Jesu aitĩrĩrie maguta. (Johana 3:3, 5) Ũndũ ũngĩ nĩ atĩ nĩ marũmagĩrĩra biũ ithimi cia Ngai cia mĩtugo na magakorũo na ngumo ta wĩhokeku, wĩkindĩru, na kũiguanĩra tha. (1 Akorintho 6:9-11) Ningĩ no mũhaka matũũre marĩ ehokeku harĩ Ngai na harĩ Kristo nginya mũthia wa ũtũũro wao gũkũ thĩ. (Luka 22:28-30; 2 Timotheo 2:12) Mahingia maũndũ macio norĩo tu monanagia atĩ nĩ magĩrĩire kũriũkio makaaheo wĩra wa bata mũno wa gũtungatĩra igũrũ marĩ athĩnjĩri Ngai na athamaki hamwe na Kristo mĩaka ngiri ĩmwe.—Kũguũrĩrio 20:6.

Ngũrani na ũguo, mwĩki-naĩ ũcio, aatũũraga arĩ kĩmaramari na agĩkua arĩ o kĩmaramari. (Luka 23:32, 39-41) Nĩ ma nĩ onanirie mwerekera mwega rĩrĩa eerire Jesu ũũ: “Ĩtĩkĩra gũkandirikana rĩrĩa ũgoka ũgwatĩte ũthamaki waku.” (Luka 23:42) O na kũrĩ ũguo, ndaatuĩkĩte mũrutwo mũbatithie na mũitĩrĩrie maguta wa Jesu, na ndaatũũrĩte mũtũũrĩre wa wĩhokeku. Hihi nĩ ũgwĩciria atĩ Jesu nĩ angĩamwĩrĩire ũthamaki wa igũrũ hamwe na arũmĩrĩri ake ehokeku, arĩa maakoretwo monanĩtie wĩkindĩru wao?—Aroma 2:6, 7.

Kwa ngerekano-rĩ, mũndũ angĩkũhoya mũhera thutha wa kũiya mbeca ciaku, wahota gũtua itua rĩa kwaga kũmũthitanga. O na kũrĩ ũguo-rĩ, hihi no ũmwĩhokere biacara kana famĩlĩ yaku? Maũndũ ta macio ũngĩmehokera o arĩa wĩhokete biũ. Noguo kũrĩ harĩ arĩa maheetwo kĩrĩgĩrĩro gĩa gũthiĩ igũrũ, no mũhaka monanie biũ atĩ nĩ makaarũmia ithimi cia Ngai cia ũthingu rĩrĩa magaakorũo magĩthamakĩra andũ. (Kũguũrĩrio 2:10) O na gũtuĩka mwĩki-naĩ ũcio nĩ onanirie mwerekera mwega ndagĩka ya mũthia-rĩ, ndaagĩire na mweke wa kuonania ũndũ ũcio.

No githĩ Jesu nderire mũgeri ngero ũcio atĩ mangĩakorirũo nake igũrũ mũthenya o ũcio? Ũguo tiguo kwarĩ tondũ o na Jesu we mwene ndaambatire igũrũ mũthenya ũcio aakuire. Aaikarire matukũ matatũ “thĩinĩ wa ngoro ya thĩ,” nĩkuo mbĩrĩra-inĩ. (Mathayo 12:40; Mariko 10:34) O na thutha wa kũriũka, aaikarire gũkũ thĩ matukũ 40 mbere ya kwambata igũrũ. (Atũmwo 1:3, 9) Nĩ ũndũ ũcio, gũtingĩahotekire mũgeri ngero ũcio makorũo na Jesu igũrũ mũthenya ũcio.

Gũkĩrĩ ũguo-rĩ, nĩ Ikenero rĩrĩkũ mũgeri ngero ũcio angĩathiire? Thutha wa kũriũka agaakorũo thĩinĩ wa Paradiso gũkũ thĩ, ĩrĩa ĩgaathamakwo nĩ Jesu. (Atũmwo 24:15; Kũguũrĩrio 21:3, 4) Nĩguo wĩrute makĩria ũhoro wa Paradiso ĩyo na maũndũ marĩa Ngai endaga twĩke, aranĩria na ũmwe wa Aira a Jehova.