Nĩ ũrĩ waiguithio ũũru mũno nĩ mũndũ nginya ũkarĩra?— * No gũkorũo ithuothe twanaigua ũguo. Rĩmwe na rĩmwe nĩ tũiguaga ta tũngĩrĩra nĩ kũigua ũũru ngoro. Andũ amwe no matũigĩrĩre maũndũ moru na matarĩ ma ma. Ũndũ ũcio no ũtũtuurithie mũno, githĩ tiguo?— O na Ngai no aigue ũũru ngoro angĩigĩrĩrũo maũndũ atekĩte. Reke twarĩrĩrie ũndũ ũcio na tuone ũrĩa tũngĩkenia Ngai handũ ha kũmũtuuria ngoro.

Bibilia nĩ yugaga atĩ andũ amwe arĩa moigaga nĩ meendete Ngai nĩ ‘maamũiguithirie kĩeha kana kũmũtuuria ngoro.’ Nĩ ma, nĩ ‘maathirĩkirie kana makĩrakaria’ Ngai! Reke tuone kĩrĩa gĩtũmaga Jehova atuurũo rĩrĩa twarega gwĩka ũrĩa aatwĩra.

Andũ a mbere erĩ arĩa Jehova ombire nĩ maamũtuurithirie mũno. Andũ aya erĩ maigirũo Paradiso ĩrĩa yetagwo ‘mũgũnda wa Edeni.’ Andũ acio erĩ nĩ arĩkũ?— Ũrĩa wombirũo mbere nĩ Adamu, Hawa agĩcoka akĩũmbwo. Reke tuone ũrĩa meekire magĩtuuria Jehova ngoro.

Thutha wa Jehova kũmaiga mũgũnda-inĩ wa Edeni, aamerire maũrorage. Agĩcoka akĩmeera atĩ nĩ marĩgĩaga ciana na matũũranie hamwe nacio mategũkua mũgũnda-inĩ ũcio. No mbere ya Adamu na Hawa magĩte ciana, ũndũ mũũru mũno ũgĩkĩka. Hihi nĩ ũĩ nĩ ũndũ ũrĩkũ?— Mũraika ũmwe agĩtũma Hawa ahĩtĩrie Ngai, na thutha-inĩ agĩtũma Adamu o nake ahĩtĩrie Jehova. Reke tuone ũrĩa ũndũ ũcio wekĩkire.

Mũraika ũcio aatũmire nyoka, kana nyamũ ya thĩ yoneke ta arĩ yo yaaragia. Hawa agĩkenio nĩ ũrĩa nyoka ĩyo yamwĩraga, yaamwĩrire atĩ egũtuĩka “o ta  Ngai.” Kwoguo agĩka ũrĩa eerirũo eke nĩ nyoka ĩyo. Hihi nĩ ũramenya eerirũo eke atĩa?—

Hawa nĩ aarĩire itunda rĩa mũtĩ ũrĩa Jehova eerĩte Adamu matikanarĩe. Mbere ya Ngai kũũmba Hawa, nĩ eerĩte Adamu ũũ: “Mũtĩ o wothe ũrĩa wĩ mũgũnda ũyũ-rĩ, nĩũrekereirio ũũrĩage; no rĩrĩ, mũtĩ ũrĩa wa kũmenyithania wega o na ũũru, ndũkanaũrĩe, nĩ gũkorũo mũthenya ũrĩa ũkaũrĩa, no mũhaka ũgakua.”

Hawa nĩ aamenyaga ũguo. No aathire o na mbere kũrora mũtĩ ũcio na akĩona atĩ ‘nĩ mwega wa kuuma irio, o na atĩ nĩ wa kwendeka ũkĩonwo na maitho, agĩgĩtua maciaro maguo, akĩmarĩa.’ Thutha ũcio akĩhe Adamu “o nake akĩrĩa.” Ũgwĩciria Adamu aarĩire nĩkĩ?— Gĩtũmi nĩ tondũ Adamu nĩ eendete Hawa makĩria ma ũrĩa eendete Jehova. Akĩenda kũmũkenia handũ ha gũkenia Ngai. No gwathĩkĩra Jehova nĩ kwa bata makĩria gũkĩra gwathĩkĩra mũndũ ũngĩ o wothe!

Hihi nĩ ũraririkana nyoka kana nyamũ ya thĩ ĩrĩa yaarĩirie Hawa? O ta ũrĩa mũndũ angĩtũma kandori kahaane ta kararia, harĩ mũraika ũmwe watũmire nyoka ĩhaane ta ĩraria. Nĩ mũgambo wa ũ woimaga harĩ nyoka?— Warĩ mũgambo wa “nyamũ-ya-thĩ o ĩrĩa ya tene, na noyo ũrĩa wĩtagwo Mũcukani na agetwo Shaitani.”

Hihi nĩ ũĩ ũrĩa ũngĩka nĩguo Jehova akene?— Nĩ na njĩra ya kũgeria hingo ciothe gwetha njĩra cia kũmũkenia. Shaitani oigaga atĩ no atũme mũndũ o wothe eke ũrĩa ekũmwĩra eke. Kwoguo Jehova atwĩraga ũũ: “Mũrũ [kana mwarĩ] wakwa, tuĩka mũndũ mũũgĩ, ũgĩkenagie ngoro yakwa, ’hotage gũcokeria o ũrĩa ũngĩ’nyenya kana ũthirĩkagia.” Shaitani nĩ athirĩkagia Jehova. Oigaga atĩ no atũme mũndũ o wothe aage gwathĩkĩra Jehova. Kwoguo, kenagia Jehova na njĩra ya kũmwathĩkagĩra na kũmũtungatagĩra! Hihi nĩ ũrĩgeragia gwĩka ũguo?—