Arata a hakuhĩ maikaraga makĩaranagĩria kaingĩ kũringana na ũrĩa maũndũ mao marametĩkĩria, hihi kũgerera thimũ, e-mail, intaneti, marũa, kana o ene gũcemania. Nĩ ũndũ ũcio, nĩguo tũgĩe na ũrata wa hakuhĩ hamwe na Ngai no nginya twaranagĩrie nake kaingĩ. No hihi tũngĩka ũguo atĩa?

No twarie na Jehova kũgerera mahoya. O na kũrĩ ũguo, kwaranĩria na Ngai na njĩra ya mahoya gũtihaana ta ũrĩa twaranagĩria na andũ a riika riitũ. No nginya tũmenyage atĩ hingo ĩrĩa tũrahoya, tũkoragwo tũkĩaranĩria na Mũũmbi witũ, Ũrĩa Mũtũgĩru Mũno igũrũ na thĩ. Ũndũ ũcio wagĩrĩirũo gũtũma tũmũhoe tũrĩ na gĩtĩo kĩnene mũno. Ningĩ nĩguo mahoya maitũ maiguo nĩ Ngai, nĩ harĩ maũndũ marĩa twagĩrĩirũo kũhingia. Reke tũthuthurie maũndũ matatũ.

Wa mbere, twagĩrĩirũo kũhoya Jehova Ngai arĩ o we wiki, no ti kũrĩ Jesu, “atheru,” kana mũhianano. (Thama 20:4, 5) Bibilia yugaga ũũ: ‘Menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho.’ (Afilipi 4:6) Wa kerĩ, no nginya tũhoe kũgerera rĩĩtwa rĩa Jesu Kristo, Mũrũ wa Ngai. Jesu we mwene aataarĩirie ũũ: ‘gũtirĩ mũndũ ũkinyaga gwĩ Ithe witũ, atokĩire harĩ niĩ.’ (Johana 14:6) Wa gatatũ, mahoya maitũ no nginya maringane na wendi wa Ngai. Bibilia yugaga ũũ: ‘Twahoya ũndũ waganĩrĩire na kwenda gwake, nĩatũiguaga.’ *—1 Johana 5:14.

Ningĩ, ũrata ndũngĩtũũra angĩkorũo no mũndũ ũmwe waragia harĩ arata erĩ. O ta ũrĩa arata makenagĩra kwaranĩria, nĩ twagĩrĩirũo kũreka Ngai atwarĩrie, na tũgathikagĩrĩria rĩrĩa araria. Hihi wee nĩ ũĩ ũrĩa Ngai atwaragĩria?

Ũmũthĩ, Jehova Ngai “atwaragĩria” kũgerera Kiugo gĩake kĩrĩa kĩandĩke, nĩkĩo Bibilia. (2 Timotheo 3:16, 17) Tũngiuga ũguo nĩkĩ? Wĩcirie ngerekano ĩno: Hĩndĩ ĩrĩa wamũkĩra marũa kuuma kũrĩ mũrata, thutha wa kũmathoma, no wĩre andũ ũũ ũcanjamũkĩte, “Nĩ ndaigua ũhoro kuuma kũrĩ mũrata wakwa!” No ndanakwĩra ũhoro ũcio na kanua, nĩ kwandĩkwo ũkwandĩkĩtwo. Na njĩra o ta ĩyo, hĩndĩ ĩrĩa ũrathoma Bibilia, ũrareka Jehova akwarĩrie. Nĩ ũndũ ũcio, Gina, ũrĩa tũkũgwetete gĩcunjĩ-inĩ kĩa mbere, oigire ũũ: “Ngwĩciria atĩ, angĩkorũo nĩ ngwenda Ngai anyonage ndĩ mũrata wake, no nginya thomage ‘marũa’ marĩa atwandĩkĩire—nĩmo Bibilia.” Agĩcoka akĩongerera ũũ: “Gũthoma Bibilia o mũthenya nĩ gũtũmĩte nguhĩrĩrie Ngai makĩria.” Hihi wee nĩ ũrekaga Jehova akwarĩrie o mũthenya na njĩra ya gũthoma Kiugo gĩake Bibilia o mũthenya? Ũngĩka ũguo, nĩ ũrĩiguaga ũkuhĩrĩirie Ngai makĩria.