KUUMA NGOTHI-INĨ | NO ŨKUHĨRĨRIE NGAI
Hihi nĩ Ũiguaga Ũkuhĩrĩirie Ngai?
“Gũkorũo na ũrata wa hakuhĩ hamwe na Ngai gũtũmaga ũigue wĩ na ũgitĩri, na ũiganĩire. Mũndũ aiguaga ta hingo ciothe Ngai akoragwo akĩrũmbũiya mabataro make.”—CHRISTOPHER, MWANAKE MŨNINI KUUMA GHANA.
“Ngai nĩ onaga mathĩna marĩa mothe tũragerera, na agatuonia wendo na gũtũrũmbũiya makĩria ya ũrĩa tũngĩĩrĩgĩrĩra.”—HANNAH, MŨIRĨTU WA MĨAKA 13 KUUMA ALASKA, BŨRŨRI WA AMERIKA (U.S.)
“Kũmenya atĩ nĩ ũrĩ na ũrata wa hakuhĩ na Ngai nĩ gũtũmaga ũigue ũndũ mwega mũno wa kũhorera ngoro!”—GINA, MŨTUMIA WA MĨAKA 40 NA KĨNDŨ WA KUUMA JAMAICA.
To Christopher, Hannah, na Gina maiguaga ũguo. Andũ aingĩ kuuma thĩ yothe nĩ metĩkĩtie matarĩ na nganja atĩ Ngai nĩ amonaga marĩ arata ake. Hihi wee ũiguaga atĩa? Hihi nĩ ũiguaga ũkuhĩrĩirie Ngai? Hihi no wende gũkorũo wĩ hakuhĩ nake, kana o na kũmũkuhĩrĩria makĩria? No gũkorũo nĩ wĩyũragia atĩrĩ: ‘Hihi no kũhoteke mũndũ o na arĩ kĩũmbe kĩnini, akorũo na ũrata wa hakuhĩ hamwe na Ngai Mwene Hinya Wothe? Angĩkorũo nĩguo-rĩ, kũngĩhoteka atĩa?’
NO TŨHOTE GŨKUHĨRĨRIA NGAI
Bibilia nĩ yonanagia atĩ mũndũ no ahote kũgĩa na ũrata wa hakuhĩ hamwe na Ngai. Yugaga atĩ Ngai eetire Iburahimu ũrĩa warĩ ithe wa rũrĩrĩ rwa Isiraeli “mũrata wakwa.” (Isaia 41:8) Ningĩ rora wone ciugo njega iria ciandĩkĩtwo thĩinĩ wa Jakubu 4:8: ‘Kuhĩrĩriai Ngai, nake nĩ ekũmũkuhĩrĩria inyuĩ.’ Kwoguo hatarĩ nganja, no kũhoteke kũgĩa na ũrata wa hakuhĩ hamwe na Ngai. No tondũ Ngai ndonekaga-rĩ, ũngĩhota atĩa ‘kũmũkuhĩrĩria’ na gũkenera ũrata wa hakuhĩ hamwe nake?
Nĩguo tũhote kuona macokio ma kĩũria kĩu, ta wĩcirie makinya marĩa mũndũ oyaga rĩrĩa arenda gũtuma ndũgũ na mũndũ ũngĩ. Ũndũ wa mbere nĩ kũmenyana marĩĩtwa. Thutha ũcio, o ũrĩa marĩthiaga makĩaranagĩria kaingĩ, makerana maũndũ marĩa mareciria na ũrĩa maraigua, noguo ũrata wao ũthiaga ũgĩkũraga. Na mangĩĩrutanĩria gwĩkana maũndũ mega, ũrata wao ũthiaga ũgacĩrĩte biũ. Ũguo noguo gũthiaga harĩ gũkũra kwa ũrata witũ hamwe na Ngai. Reke tuone ũrĩa ũndũ ũcio wĩkĩkaga.
Icunjĩ Ingĩ Hihi Ũngĩenda Gũthoma
MŨRANGĨRI
Wee nĩ ũĩ Rĩĩtwa rĩa Ngai? Nĩ Ũrĩhũthagĩra?
Ngai nĩ emenyithanĩtie kũrĩ ithuĩ akoiga ũũ: “Niĩ nĩ niĩ Jehova; rĩu nĩrĩo rĩĩtwa rĩakwa”
