KUUMA NGOTHI-INĨ | HIHI NĨ KŨRĨ ŨTŨŨRO ŨNGĨ MŨNDŨ AKUA?
Hihi Kũrĩ na Kĩĩrĩgĩrĩro Harĩ Arĩa Makuĩte?
Hihi arĩa makuĩte no macoke muoyo?
MACOKIO MA BIBILIA: ‘Kwĩ hingo ĩroka arĩa othe me thĩinĩ wa mbĩrĩra makaigua mũgambo wa Jesu, na moime kuo.’—Johana 5:28, 29.
Jesu nĩ eeranĩire atĩ, rungu rwa Ũthamaki wake hingo ĩroka, arĩa othe marĩ thĩinĩ wa Mbĩrĩra nĩ makoima. Fernando ũrĩa ũgwetetwo gĩcunjĩ-inĩ kĩa mbere oigire ũũ: “Nĩ ndaagegire mũno rĩrĩa ndaathomire Johana 5:28, 29 riita rĩa mbere. Rĩandĩko rĩu rĩatũmire ngĩe na kĩĩrĩgĩrĩro kĩa ma, na ngĩambĩrĩria gwĩciria ũhoro wa ihinda rĩũkĩte ndĩ na mwĩhoko.”
Mahinda-inĩ ma tene, Ayubu nĩ eerĩgagĩrĩra atĩ thutha wake gũkua Ngai nĩ akaamũcokia muoyo. Ayubu oririe ũũ: “Mũndũ aakua-rĩ, nĩkũngĩhoteka acoke muoyo rĩngĩ?” Agĩcoka agĩcokia ũũ arĩ na ũũma: “Niĩ ndeterera matukũ makwa mothe ma gũtũũra ita-inĩ [thĩinĩ wa Mbĩrĩra], o nginya hingo yakwa ya kwaũrũo ĩkinye. Hĩndĩ ĩo wetana, na niĩ ndagwĩtĩka.”—Ayubu 14:14, 15.
Kũriũka kwa Lazaro nĩ gũtũheaga mwĩhoko wa mahinda mokĩte
Ũhoro wa kũriũka ndwarĩ ũndũ mũgeni harĩ Maritha mwarĩ wa nyina na Lazaro. Thutha wa Lazaro gũkua, Jesu eerire Maritha ũũ: ‘Mũrũ wa nyũkwa nĩ ekũriũka.’ Nake agĩcokia ũũ: “Nĩnjũĩ nĩakariũka gũkĩriũkwo mũthenya wa ithirĩro.” Jesu akĩmwĩra atĩrĩ: “Nĩ niĩ kũriũka na nĩ niĩ muoyo; ũrĩa wĩĩ’hokete niĩ, o na aakua, no agatũũra muoyo.” (Johana 11:23-25) Jesu agĩcoka akĩriũkia Lazaro o hĩndĩ ĩyo! Ũhoro ũcio wa magegania ũtuonagia maũndũ manene marĩa mageekĩka hĩndĩ yũkĩte. Ta hũũra mbica andũ makĩriũkio thĩinĩ wa thĩ yothe!
Hihi nĩ kũrĩ andũ makaariũkio mathiĩ igũrũ?
MACOKIO MA BIBILIA: Kiugo kĩa Ngai kĩonanagia atĩ kũriũkio kwa Jesu kwarĩ ngũrani na kwa arĩa angĩ anana maandĩkĩtwo thĩinĩ wa Bibilia. Andũ acio anana maacokire muoyo magĩikara o gũkũ thĩ. Ĩndĩ tũthomaga ũũ igũrũ rĩgiĩ kũriũka kwa Jesu: ‘Jesu Kristo nĩ aathiire igũrũ, agaikaraga guoko-inĩ kwa ũrĩo kwa Ngai.’ (1 Petero 3:21, 22) Hihi no Jesu tu warĩ ariũkio na athiĩ igũrũ? Jesu eerĩte atũmwo ake ũũ: “Na ndathiĩ ndamũthondekera handũ, nĩ gũcoka ngacoka, ndĩmũtware mũgaikarage o harĩ niĩ, nĩguo harĩa ndĩ, na inyuĩ mũgĩage ho.”—Johana 14:3.
Kristo aathiire igũrũ na akĩharĩrĩria handũ nĩ ũndũ wa arutwo amwe ake. Mũthia-inĩ, arĩa makaariũkio mathiĩ igũrũ magakorũo marĩ andũ 144,000. (Kũguũrĩrio 14:1, 3) No hihi arũmĩrĩri acio a Jesu magathiĩ kuo gwĩka atĩa?
Magaakoragwo na wĩra mũingĩ mũno! Maandĩko matwĩraga ũũ: “Gũkena, na gũthera-rĩ, nĩ ũrĩa ũgwatanĩire kũriũka kũu kwa mbere; acio-rĩ, gũkua kũrĩa gwa kerĩ gũtirĩ na hinya kũmeke ũndũ o na ũrĩkũ; no rĩrĩ, magatuĩka athĩnjĩri Ngai o na Kristo, na mathamakage hamwe nake mĩaka ngiri ĩmwe.” (Kũguũrĩrio 20:6) Arĩa makaariũkio mathiĩ igũrũ magatuĩka athamaki na athĩnjĩri Ngai hamwe na Kristo igũrũ rĩa thĩ.
Nĩa makaariũkio thutha ũcio?
MACOKIO MA BIBILIA: Bibilia nĩ ĩkoragwo na ciugo ici cia mũtũmwo Paulo iria ciatongoririo na roho wa Ngai: ‘Ngagĩtũũra ndĩĩhokete Ngai, ngĩĩrĩgagĩrĩra atĩ kwĩ hĩndĩ gũkariũkio andũ arĩa athingu o na arĩa matarĩ athingu, o ta ũrĩa andũ aya o nao matũire merĩgĩrĩire.’—Atũmwo 24:15.
Kiugo kĩa Ngai nĩ gĩtũheaga ũũma atĩ andũ bilioni nyingĩ arĩa makuĩte nĩ magaacoka muoyo
Nĩa magaakorũo marĩ a gĩkundi kĩu Paulo eetire “arĩa athingu”? Reke tuone ngerekano ĩmwe. Mũthuri mwĩhokeku wetagwo Danieli eerirũo ũũ mũthia-inĩ wa ũtũũro wake: “Nĩũkahurũka, na rĩrĩa matukũ macio magathira ũkorũo ũrũngiĩ harĩa ũtuĩrĩirũo hatuĩke igai rĩaku.” (Danieli 12:13) Danieli agokĩra kuuma toro-inĩ wa gĩkuũ atũũre kũ? “Arĩa athingu nĩo makagaya thĩ, na gũtũũra mamĩtũũre o nginya tene.” (Thaburi 37:29) Jesu nake aarathĩte ũũ: “Gũkena-rĩ, nĩ arĩa ahoreri, nĩ gũkorũo nĩmakagaya thĩ.” (Mathayo 5:5) Danieli o hamwe na athuri na atumia angĩ ehokeku makaariũkio matũũre gũkũ thĩ tene na tene.
Nĩa magaakorũo marĩ a gĩkundi kĩu Paulo eetire “arĩa matarĩ athingu”? Nĩ andũ bilioni nyingĩ arĩa maatũũrire na magĩkua, na aingĩ ao mationire mweke wa gũtaũkĩrũo nĩ ma cia Bibilia na gũcihũthĩra ũtũũro-inĩ wao. Thutha wa kũriũkio, nĩ makaahota kũmenya na kwenda Jehova * na Jesu. (Johana 17:3) Arĩa magaathuura gũtungatĩra Ngai nĩ makagĩa na kĩĩrĩgĩrĩro gĩa gũtũũra tene na tene o ta Jehova.
Arĩa othe megũthuura gũtungatĩra Ngai nĩ makaagĩa na kĩĩrĩgĩrĩro gĩa gũtũũra tene na tene marĩ na ũgima mũkinyanĩru wa mwĩrĩ na gĩkeno
Thĩ ĩgaakorũo ĩhaana atĩa?
MACOKIO MA BIBILIA: Ngai ‘nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo.’ (Kũguũrĩrio 21:4) “Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo.”—Isaia 65:21.
Ta hũũra mbica ũgĩikara kũndũ ta kũu ũrĩ hamwe na andũ arĩa wendete arĩa magaakorũo mariũkĩtio! No kĩũria nĩ gĩkĩ, Ũngĩkorũo na ma atĩa atĩ andũ nĩ makaariũkio?
^ kĩb. 15 Jehova nĩ rĩĩtwa rĩa Ngai ta ũrĩa rĩonanĩtio thĩinĩ wa Bibilia.
