Jehova Ngai nĩwe Kĩhumo kĩa muoyo. (Thaburi 36:9) Na githĩ ũndũ ũcio ndũronania atĩ Ngai o ũcio no ahote gũcokia andũ arĩa makuĩte muoyo? Bibilia nĩ ĩtũheaga ũũma atĩ nĩ ageka ũguo ihinda rĩrĩa rĩroka. (Thoma Atũmwo 24:15) No ageka ũguo nĩkĩ?

Muoroto wa Mũũmbi witũ kuuma tene warĩ mũndũ atũũre tene na tene gũkũ thĩ. (Kĩambĩrĩria 1:31; 2:15-17) Na ũguo noguo endaga harĩ mũndũ. Nĩ aiguaga ũũru mũno rĩrĩa arona ũtũũro witũ ũiyũre mathĩna na tũgĩtũũra o matukũ manyinyi.—Thoma Ayubu 14:1, 14, 15.

Hihi Ngai ombire mũndũ atũũre igũrũ? Aca. Ngai ombire araika matũũrage igũrũ. Ombire andũ matũũre gũkũ thĩ. (Kĩambĩrĩria 1:28; Ayubu 38:4, 7) Tũrĩ na ũndũ ũcio meciria-inĩ, ta ririkana andũ arĩa Jesu aariũkirie. Aacokirie andũ muoyo magĩikara o gũkũ thĩ. O ũndũ ũmwe na ũcio, andũ aingĩ arĩa makaariũkio ihinda rĩrĩa rĩroka magaacokio muoyo matũũre o gũkũ thĩ.—Thoma Johana 5:28, 29; 11:44.

O na kũrĩ ũguo, Ngai nĩ athuurĩte andũ anini mariũkio matũũre kũrĩa igũrũ, marĩ na mĩĩrĩ ya roho. (Luka 12:32; 1 Akorintho 15:49, 50) Arĩa mariũkagio matũũre kũrĩa igũrũ magaatuĩka athamaki hamwe na Kristo igũrũ rĩa thĩ.—Thoma Kũguũrĩrio 5:9, 10.